Bazwaki mbano mpo ete batambolaki na bosembo nyonso

YEHOVA apambolaka mpe apesaka mbano na basaleli na ye ya sembo. Bakoki kozela mwa ntango liboso ete bámona kokokisama ya mokano ya Nzambe, kasi oyo nde bosepeli wana moto azwi mapamboli na ye!

Yango emonisamaki malamu esili koleka soko bambula nkóto mibale na likambo likómelaki Zekalia, nganga moyuda mpe Elisabɛta, mwasi na ye, bango nyonso mibale bazalaki bato na libota ya Alona. Nzambe alakaki kopambola Yisraele na kopesáká bango bana soki balandaki kosalela ye na bosembo nyonso. Alobaki lisusu ete bana bazali lipamboli. (Levitike 26:9; Nzembo 127:3) Nzokande, Zekalia mpe Elisabɛta bazalaki na bana te mpe basilaki mpenza kopusana na mbula.​—Luka 1:1-7.

Makomami malobi ete Zekalia mpe Elisabɛta “Bango yɔnsɔ mibale bajalaki bayɛngɛbɛni na miso na Njambe, batambolaki na mibeko mpe na malako na [Yehova] na libunga tɛ.” (Luka 1:6) Balingaki Nzambe mingi na boye ete ezalaki mpo na bango bozito te mpo na kolanda kosalela Nzambe na bosembo nyonso mpe kotosa mibeko na ye.​—1 Yoane 5:3.

Mapamboli oyo bamizelaki na yango te

Tiká tózonga na nsuka ya eleko oyo molungé ebandaka to na ebandeli ya eleko ya molungé ya mobu 3 L.T.B. Elode Monene azalaki koyangela lokola mokonzi na Yuda. Mokolo moko, nganga Zekalia akɔtaki na Esika Mosantu kati na Tempelo na Yelusaleme. Wana bato bayanganaki na libándá ya tempelo mpo na kobondela, atumbi mpaka na malasi na etumbelo ya wolo. Mbala mosusu lokola yango etalelami ete ezali mosala moleki ntina kati na misala ya mokolo na mokolo, yango esalemaki nsima ya kopesa mbeka. Nganga akokaki kozwa libaku kitoko wana bobele mbala moko kati na bomoi na ye.

Zekalia akamwaki na oyo amonaki, anzelu ya Yehova atelemaki na lobɔkɔ ya mobali ya etumbelo ya mpaka na malasi! Nganga mobangé wana abulunganaki mpe azalaki na bobangi mingi. Kasi anzelu alobaki ete: “Banga tɛ, Jekalia, mpɔ ete libɔndɛli na yɔ eyokani, mpe mwasi na yɔ Elisabɛta akobotela yɔ mwana mobali, mpe okobianga nkombo na ye Yoane.” Ee, Yehova ayokaki mabondeli ya Elisabɛta mpe ya Zekalia oyo mautaki mpenza na motema.​—Luka 1:8-13.

Anzelu abakisi ete: “Esɛngɔ ekojala na yɔ mpe kosepela mingi, mpe bato mingi bakoyoka esɛngɔ na kobotama na ye, mpɔ ete akojala moto monɛnɛ na miso na [Yehova], mpe akomɛla masanga tɛ, sɔkɔ elɔkɔ na kolangwisa tɛ; mpe akotonda na [elimo santu, NW] longwa na libumu na mama na ye.” Yoane akozala Monasili bomoi na ye mobimba mpe akotonda bongo na elimo santu ya Nzambe. Anzelu akóbi: “Akojongisa bato na Yisalaele mingi epai na [Yehova] Njambe na bango. Ye mpe akokɛnda liboso na ye na [elimo, NW] mpe na nguya na Eliya. Akojongisa mitema na batata epai na bana, mpe bato na nkanja na njela na mayɛlɛ na bayɛngɛbɛni, mpɔ na kobɔngisɛla [Yehova] libota likobɔnga mpenja.”​—Luka 1:14-17.

Zekalia atunaki ete: “Nayeba oyo boni? mpɔ ete ngai mobange, mpe mwasi na ngai mpe asili konuna.” Anzelu azongisaki monɔkɔ ete: “Ngai Gabaliele, oyo akotɛlɛmaka liboso na Njambe, mpe natindamaki koloba na yɔ mpe kotɔndɔla na yɔ makambo oyo. Nde sasaipi okojala emimi, okokoka kosolola tɛ kino mokɔlɔ makambo oyo makobima, jambi ondimi maloba na ngai tɛ, oyo makokoka na elaka na yango.” Wana Zekalia abimaki na tempelo, akokaki koloba te, mpe bato basosolaki ete amoni emonaneli. Nyonso oyo akokaki kosala, azalaki kolakisa yango na bilembo, kosaleláká bongo bikela mpo na komonisa makanisi na ye. Wana mosala na ye mosilaki, azongaki na ndako na ye.​—Luka 1:18-23.

Ntina ya bosepeli

Lokola elakamaki, mosika te Elisabɛta azalaki na ntina ya kosepela. Azwaki zemi, kolongoláká bongo nsoni ya bokomba. Ndeko na ye Malia mpe azalaki na bosepeli mingi, mpo ete bobele anzelu yango moko, Gabaliele, ayebisaki ye ete: “Tala, okojua jemi mpe okobota mwana mobali, mpe okobianga nkombo na ye Yesu. Ye akojala monɛnɛ mpe akobiangama Mwana na Oyo-Aleki-Likolo. [Yehova] Njambe akopɛsa ye kiti na bokonji na Dawidi tata na ye.” Malia andimaki na motema moko kokokisa mokumba ya “moombo mwasi ya Yehova.”​—Luka 1:24-38.

Malia akendaki nokinoki na mboka ya Zekalia mpe Elisabɛta na engumba moko ya Yuda, mboka oyo ezali na bangomba. Wana mongongo ya Malia eyokanaki ntango apesaki mbote, mwana oyo azalaki na libumu ya Elisabɛta aninganaki. Na bopusi ya elimo santu ya Nzambe, Elisabɛta angangaki na mongongo makasi ete: “Yɔ opambolami kati na basi mpe mwana na libumu na yɔ apambolami. Mpɔ na nini likambo oyo ebimeli ngai ete mama na Nkolo na ngai ayei epai na ngai? Jambi tala, wana eyokani mongongo na mbɔtɛ na yɔ kati na matoi na ngai, mwana na kati na libumu na ngai apombwi na esɛngɔ. Esɛngɔ na mwasi oyo andimaki, mpɔ ete maloba malobi [Yehova] na ye makokisama.” Malia ayanolaki na bosepeli mingi. Afandaki elongo na Elisabɛta na boumeli soko ya sanza misato.​—Luka 1:39-56.

Yoane abotami

Na ntango oyo elakamaki mobangé Elisabɛta mpe mobangé Zekalia babotaki mwana mobali. Na mokolo ya mwambe, mwana akatamaki ngenga. Biboto balingaki kobénga mwana na nkombo Zekalia, kasi Elisabɛta ayebisi ete: “Bongo tɛ, kasi akobiangama Yoane.” Mobali na ye oyo azalaki koloba te andimaki likanisi na ye? Likoló na libaya akomaki ete: “Nkombo na ye Yoane.” Na mbala moko, lolemu ya Zekalia efungwamaki, mpe abandaki koloba, mpe kosanzola Yehova.​—Luka 1:57-66.

Lokola atondaki na elimo santu, na bosepeli nyonso, nganga wana asakolaki. Alobi lokola nde Mosikoli oyo alakamaki​—‘liseke ya lobiko kati na ndako ya Davidi’​—asilaki kobima na boyokani na kondimana ya Abalayama na ntina na Mombóto mpo na lipamboli ya mabota nyonso. (Genese 22:15-18) Lokola moto oyo atindamaki liboso ya Masiya, mwana ya Zekalia oyo abotamaki na lolenge ya kokamwa ‘akokende liboso na Yehova mpo na kopesa bato boyebi ya lobiko.’ Wana bambula ezalaki koleka, Yoane akólaki mpe akómaki na nguya kati na elimo.​—Luka 1:67-80

Bazwaki mbano monene

Zekalia mpe Elisabɛta bazalaki bandakisa malamu ya kondima mpe ya motema pɛtɛɛ. Balandaki kosalela Yehova na bosembo nyonso atako basengelaki kotalela Nzambe, mpe mapamboli na bango oyo maleki monene mayaki bobele na ntango oyo basilaki kokóma mibangé.

Kasi, oyo nde mapamboli Elisabɛta mpe Zekalia bazwaki! Na nsé ya bopusi ya elimo ya Nzambe, bango nyonso mibale basakolaki. Bazwaki libaku ya kokóma baboti mpe balakisi ya Yoane Mobatisi, oyo atindamaki liboso ya Masiya. Lisusu, Nzambe atalelaki bango ete bazalaki bayengebene. Bobele bongo, lelo oyo baoyo bazali kolanda ezaleli ya kobanga Nzambe bakoki kotalelama lokola bayengebene na miso na Nzambe mpe bakozwa ebele na mapamboli mpo ete bazali kotambola na bosembo nyonso kati na mibeko ya Yehova.