Kitoko oyo ekosilaka te

“KITOKO ekolimwaka; kitoko ekosilaka,” ezali maloba ya mokomi na ntɔ́ki Walter De la Mare. Yango ezali solo mpo na bafololo kitoko ya cactus oyo emonisami awa. Bonzenga na yango ekosilaka nokinoki.

Moyekoli Yakobo akomaki ete: “Akolimwa [mozwi] lokola fololo ya matiti. Moi ebimi mpe engali, mpe ekaukisi matiti mpe fololo na yango ekwei; kitoko na elongi na yango ebebi. Bongo mpe mozwi akolimwa na bitambweli na ye.”​—Yakobo 1:10, 11.

ati na mokili oyo ebongi na kotyela motema te, bozwi ekoki kolimwa mpenza nokinoki. Lisusu, mozwi​—lokola bato nyonso⁠—​azali na ‘mikolo mingi te, lokola fololo.’ (Yobo 14:1, 2) Yesu apesaki lisese ya moto moko oyo amipesaki mingi na koluka bozwi mpo ete na nsima asepela na yango. Kasi wana akanisaki ete asili kozwa biloko nyonso oyo azalaki na yango mposa mpo na komisepelisa, akufaki. Yesu apesaki likebisi oyo ete: “Moto oyo abombi biloko mpo na ye mpenza nde azali mozwi epai na Nzambe te, azali motindo yango.”​—Luka 12:16-21.

“Mozwi epai na Nzambe.” Yesu alingaki koloba nini? Moto oyo azali mozwi motindo wana azali na “biloko ya motuya kuna na likoló”​—lokumu malamu liboso na Nzambe. Biloko ya motuya motindo wana bikobebaka te. (Matai 6:20; Baebele 6:10) Na esika ete azala lokola fololo oyo ezali kokauka, moto motindo wana akokanisami kati na Biblia na nzeté oyo nkasa na yango ekokauka te. Mpe, tondimisami ete, “nyonso ezali ye kosala ekolónga.”​—Nzembo 1:1-3, 6, MN.