Bizaleli ya bato na Noele ekoki kotikala mbula mobimba?

“Nkembo na Nzambe kuna na bisika ya likoló, mpe kimya na mabelé na kati ya bato oyo ye amoniseli motema boboto.”​—Luka 2:14.

BAMILIO ya bato bayebi maloba yango ya baanzelu oyo bakendaki koyebisa babateli ya mpate oyo bazalaki kokɛngɛla bibwɛlɛ na bango na butu ete Yesu abotami. Na eleko ya Noele, bato mingi oyo bamibengaka baklisto basalaka makasi bázala na bizaleli ya malamu. Basalaka makasi bázala na esengo, kimya, mpe boboto, bizaleli oyo baanzelu balobelaki ntango bapesaki nsango ya mbotama ya Yesu.

Bizaleli malamu yango esepelisaka ata bato oyo bakipaka makambo ya losambo te na Noele. Bango mpe basepelaka na bizaleli oyo bato bamonisaka na Noele. Lokola bana-kelasi mpe bato mingi ya mosala bazalaka na konje na eleko ya Noele, bazalaka na ntango ya kopema, ya kominanola, mpe ya kozala elongo ná mabota to baninga na bango. Kasi, mpo na bato mingi oyo basambelaka, Noele ezalaka eleko ya kokumisa Yesu Klisto.

Ata soki Noele elimbolaka nini mpo na bango, bato mingi bakondima ete bizaleli mpe makambo malamu oyo bato bamonisaka na eleko yango eumelaka kaka mwa mikolo. Na nsima, bato bazongelaka bizaleli na bango ya kala. Banki moko (Royal Bank of Canada) ebimisaka buku moko ezalaka na masolo ndenge na ndenge; lisolo na yango moko oyo motó ya likambo na yango ezalaki, “Bizaleli ya bato na Noele,” elobaki boye: “Bato mingi oyo bamibengaka baklisto babongaka na nkombo yango kaka na boumeli ya mwa bapɔsɔ na mbula mobimba, bazalaka na boboto epai ya bazalani na bango tii na Bonane; kasi na nsima bazongelaki bizaleli na bango mpe bakanisaka bolamu ya bato mosusu te.” Lisolo yango ebakisi ete likambo ya “mabe mpenza” ezali ete bizaleli ya malamu oyo bato bazalaka na yango na Noele etikalaka “mbula mobimba” te.

Ata soki ondimi makanisi yango to te, yango ezali kotinda biso tómituna mituna ya ntina mingi. Mokolo mosusu bato bakomonisa bizaleli lokola bokabi mpe koyeba komitya na esika ya basusu mpo na libela? Tokoki nde kolikya ete maloba oyo baanzelu basakolaki na butu oyo Yesu abotamaki ekokokisama? Elikya ya kozala na kimya ya solosolo, ezali kaka makanisi ya mpamba?