Mituna na batangi

◼ Yoane 18:15 ezali koloba mpo na moyekoli moko oyo ayebanaki na nganga monene. Ezali bongo moyekoli oyo, engebene Malako 14:51, 52, akimaki “bolumbu” liboso?

Te; emonani lokola ete, ezali nde ntoma Yoane oyo nganga monene ayebaki, nzokande ezali moyekoli Malako oyo akimaki “bolumbu.”

Soki tolingi kotalela makambo wana na lolenge yango elandanaki, esengeli na biso liboso kozonga kati na elanga ya Getesemane. Ntango Yesu akangamaki, bantoma babangaki. “Bango nyonso batikaki ye mpe bakimaki.” Kati na lisolo ya Malako, verset oyo elandi nsima ekotisi mobulungano: “Elenge mobali moko alandi ye, ye azalaki kolata bobele elamba moko. Bakangi ye, nde atiki elamba na ye, akimi bolumbu.”​—Malako 14:50-52.

Ezalela ya liboso na bantoma 11 eyokani te na oyo ya moyekoli wana, oyo atangami nkombo te; ezali bongo malamu na kosukisa ete ezalaki mpenza ntoma te. Likambo wana eyebisami bobele kati na Evanzile oyo ekomamaki na Yoane Malako, moko kati na bayekoli ya ebandeli mpe ndeko na Barnabas. Tokoki bongo kokanisa ete azali ’’elenge mobali’’ oyo abandaki kolanda Yesu nsima na kokangama na ye, kasi oyo akimaki bolumbu ntango bato balingaki kokanga ye mpe lokola.​—Misala 4:36; 12:12, 25; Bakolose 4:10.

Na boumeli ya butu, ntoma Petelo ye mpe alandaki Yesu na mosika. Kino wana, bokokani bozali; elenge moyekoli (Malako) abandaki kolanda Yesu; kasi azongaki na ye, nzokande, na nsima, bantoma mibale oyo bakimaki babandaki kolanda Nkolo na bango, nsima ya kokangama na ye. Ezali kotangama boye kati na Evanzile ya Yoane: “Simona Petelo mpe moyekoli oyo mosusu balandi Yesu. Moyekoli yango ayebani na nganga monene mpe aingeli na Yesu elongo na lopango na nganga monene.”​—Yoane 18:15.

Ntoma Yoane asaleli nkombo “Yoane” ntango azali kolobela Yoane Mobatisi, kasi azali komibenga ye moko te na nkombo wana. Na ndakisa, azali kolobela “moyekoli moko oyo azali kotatola na ntina na makambo yango, mpe oyo akomaki makambo yango.” Alobi lisusu ete: “Ye oyo amoni boye asili kotatola, mpe litatoli na ye ezali solo; ye wana ayebi mpe azali koloba solo.” (Yoane 19:35; 21:24) Tala lisusu Yoane 12:23: “Moko na bayekoli na ye,ye oyo Yesu alingaki, azalaki kofanda penepene na ntolo na ye.” Yango esalemaki mwa ntango moke liboso na kokangama na Yesu. Ngonga mingi na nsima, na mokolo wana, Yesu, oyo akakisamaki na nzete, asalelaki moyekoli moko na lolenge ekeseni, moyekoli oyo Yoane azali kolobela kati na elobeli se moko: ’’Emoni Yesu mama na ye mpe moyekoli molingami na ye, azalaki kotelema pembeni, [Yesu] alobi na mama na ye ete: ‘Mama, tala mwana na yo!’”​—Yoane 19:26, 27; tala Yoane 21:7, 20.

Ezalela wana ya Yoane, oyo ya kobomba nkombo na ye, ezali komonana polele kati na Yoane 18:15. Lisusu, nsima na lisekwa na Yesu, tozali komona Yoane mpe Petelo esika moko kati na lisolo moko, na Yoane 20:2-8. Tala likambo oyo emonisi ete ntoma Yoane azali “moyekoli oyo nganga monene ayebaki.” Biblia ezali koyebisa biso te ntina mpo na yango ntoma mogalilé (Yoane,) ayebaki nganga monene to oyo ye ayebanaki epai na ye. Nzokande, soki mosali mwasi oyo azalaki na ekuke atikaki ye kokota kati na lopango, elongo na Petelo, ezali mpo ete ayebanaki na bato ya ndako na nganga monene.