Yesu, bomoi na ye mpe mosala na ye.

Epai na Pilato mpe epai na Hérode

NTANGO Bayuda bafundi Yesu ete amilobi mokonzi, Pilato akóti na ndako mpo na kotuna ye. Yesu ameki kobómba te ete azali mokonzi, kasi alimboli ete Bokonzi na ye ezalaki likámá te mpo na Rome.

Yesu alobi na Pilate ete, ’’Bokonzi na ngai ezali ya mokili oyo te. Soki bokonzi na ngai ezalaki ya mokili oyo, mbele bato na ngai babundi ete nakabama epai na Bayuda te. Kasi bokonzi na ngai bouti wana le’’. Na yango, Yesu alobaki mbala misato ete azali na bokonzi, kasi ezali bokonzi ya mabele te.

Kasi Pilato atuni lisusu: “Boye, yo ozali mokonzi?” Na maloba mosusu, ozali mokonzi atako bokonzi na yo ezali ya mokili oyo te?

Yesu amonisi na Pilato ete asali bosukisi malamu, na koyanoláká: “Yo moko olobi ete nazali mokonzi. Nabotami na ntina oyo, mpe nayei na mokili mpo na oyo ete: natatola mpo na solo. Soko moto nani azali na ngámbo na solo, akoyoka maloba na ngai.”

Na yango, ntina na bomoi na Yesu awa na mabelé ezali mpo na kotatola na ntina na “solo,” mpe mingi mpenza solo likoló na Bokonzi. Yesu amilengeli na kotikala sembo na solo wana, ata soko yango esengi bomoi na ye. Pilato atuni ete “Solo ezali eloko nini?” Kasi azali na mposa ya bandimbola mosusu te. Asili koyoka makambo oyo ekoki mpo na kosambisa.

Pilato azongi epai na ebele na bato oyo bazali libanda ya ndako. Ekoki kozala ete na miso na Yesu, Pilato alobi epai na banganga minene mpe na baoyo bazali elongo na bango ete: “Namoni mabe moko na moto oyo te.”

Wana basiliki mpo na ekateli oyo, ebele babakisi na kolobáká ete: “Azali kotombokisa bato na kolakisáká kati na Yuda mobimba, mpe kobanda Galilé kino awa.”

Maloba na kozanga kososola oyo ya Bayuda esengeli mpenza kokamwisa Pilato. Yango wana, ntango banganga minene mpe mikoló balandaki kongánga, abongwani epai na Yesu mpe alobi ete: “Oyoki te makambo oyo mazali bango kofunda yo?” Kasi Yesu ameki koyanola soko moke te. Nyee oyo afandi liboso na bifundeli na lokuta, ekamwisi Pilato.

Eyokaki ye ete Yesu azali Mogalilé, Pilato azwaki libaku malamu ya komilongola na likambo na ye. Guvernere ya Galilé, Hérode Antipas (mwana ya Hérode le Grand) azali na Yelusaleme mpo na elambo ya Elekeli. Bongo, Pilato atindi Yesu epai na ye. Mwa bambula liboso, Hérode akatisaki Yoane Mobatisi nkingo, mpe azalaki kobanga wana ayokaki nsango ya bikamwiseli oyo Yesu azalaki kosala, mpamba te akanisaki ete Yesu azali Yoane, asekwi kati na bakufi.

Sikawa, Hérode asepeli mingi mpenza na komona Yesu. Ezali te mpo ete azali komibanzabanza likoló na oyo ekokómela Yesu, azali mpe na mposa mpenza te ya koyeba soki bifundeli bisalami likoló na ye bizali solo to lokuta. Kasi azali bobele na mposa ete amona ye mpe azali kolikya ete Yesu asala ekamwiseli.

Kasi Yesu aboi kokokisa mposa ya Hérode. Ya solo, wana Hérode atuni ye, azongisi ata liloba moko te. Wana bayoki nsoni, Hérode mpe basoda na ye batyoli ye mpenza Balatisi ye elamba motané mpe baseki ye mpenza. Bongo, bazongisi ye epai na Pilato. Na nsuka na yango, Pilato mpe Hérode, baoyo bazalaki banguna, bakómi baninga malamu.

Wana Yesu azongi lisusu, Pilato abengi banganga minene mpe mikoló na bato, mpe alobi na bango ete: “Bomemeli ngai moto oyo lokola motombokisi na bato, mpe nasambisi ye liboso na bino. kasi nazwi likambo moko te kati na ye na ntina na bifundeli na bino. Hérode bobele bongo, mpo ete azongiseli biso ye lisusu; mpe asali likambo moko te oyo libongi na kufa. Na bongo, nakobɛta ye mfimbo mpe nakangola ye.”

Na yango, mbala mibale, Pilato alobi ete Yesu azali na likambo te. Alingi kokangola ye, mpo asosoli ete ezali bobele zuwa nde epusi banganga minene ete bakumba Yesu epai na ye. Kasi. wana azali kosala milende na ye mpo na kokangola Yesu, likambo mosusu lipusi ye na kosala bongo. Wana azali na tribinale, mwasi na ye atindeli ye nsango elendisi ye na maloba oyo ete: “Kosala likambo moko te na moyengebene wana, mpamba te nazwi mpasi mingi mpo na ye lelo kati na ndoto (emonani lokola ete, euti na Nzambe).”

Kasi ndenge nini Pilato akoki kokangola moyengebene oyo, lokola eyebi ye ete asengeli kosala yango? Yoane 18:36-38, MN; Luka 23:4-16, MN; Matai 27:12-14, 18, 19, MN; 14:1,2; Malako 15:2-5.

◆ Ndenge nini Yesu ayanoli na motuna na ntina na Bokonzi na ye?

◆ “Solo“ nini Yesu atatolaki na boumeli ya bomoi na ye mobimba awa na mabelé?

◆ Pilato asambisi lolenge nini, mpe ezaleli ya bibele ezali nini, mpe Pilato asali Yesu nini?

◆ Hérode Antipas azali nani, mpo na nini asepeli mingi mpenza na komona Yesu, mpe asali ye nini?

◆ Mpo na nini Pilato alingi kokangola Yesu?