Yesu, bomoi na ye mpe mosala na ye

“Botala moto ye wana!”

KOKAMWÁKÁ na ezaleli na ye mpe koyebáká ete asali likambo te, Pilato aluki mwango mosusu mpo na kotika Yesu. Alobi epai na ebele ete, “Motindo na bino ezali ete nakangwela bino moto moko na ntango na Elekeli.”

Pilato, ye oyo azalaki lisusu na mobomi moko monene na nkombo Barabasi kati na boloko na ye, atuni ete: “Bolingi ete nakangwela bino nani, soko Barabasi to Yesu oyo abengami Klisto?”

Kopusamáká na banganga minene baoyo bayanganisaki bibele, bato balombi ete bakangwela bango Barabasi mpe ete baboma Yesu. Pilato atiki te. Mpo na koyanola, atuni bango lisusu ete: “Bolingi ete nakangwela bino nani kati na bango mibale?”

Bato bangangi ete, “Barabasi.”

Kobangáká, Pilato atuni ete: “Bongo, nasala nini na Yesu oyo abengami Klisto?”

Na mongongo makasi, bato bangangi ete: “Tika ete akakisama na nzete!” “Kakisa ye na nzete! Kakisa ye na nzete!”

Koyebáká ete ebele bazali kosenga liwa ya moto oyo asali likambo moko te, Pilato atuni lisusu ete: “Mabe nini asali? Nazwi likambo moko libongi na kufa mpo na ye te; na bongo nakobeta ye mfimbo mpe nakokangola ye.”

Atako mwango nyonso oyo Pilato asali, ebele na bato bazangi kososola, oyo bapusami na bakonzi ya mangomba, balandi bobele konganga ete: “Tika ete akakisama na nzete!” Wana bapusami na banganga, bato basiliki mingi mpo na Yesu, oyo bazali kosenga liwa na ye. Nzokande emonani ete, mikolo mitano liboso, bamoko na Bayuda wana bakumisaki ye lokola mokonzi ntango akotaki na Yelusaleme! Na boumeli ya ntango nyonso wana, soki bayekoli na Yesu bazali wana, kasi bazali komimonisa te.

Komonáká ete milende na ye mizali mpamba, kasi azalaki nde kobimisa yikiyiki, Pilato azwi mai, asukoli maboko liboso na ebele, mpe alobi ete: “Ngai nazali na likambo na makila na moto oyo te!” Bongo bato bazongisi ete: “Makila na ye mazali likoló na biso mpe likoló na bana na biso!”

Na yango, komonisáká mpenza mposa ya kosepelisa bibele ete bakokisa oyo emonani malamu liboso na bango, Pilato andimi lisengi ya bato mpe akangoli Barabasi. Yesu amemami, alongolami bilamba mpe abetami mfimbo. Kasi kobetama wana esalelamaka te na momeseno na bango. Tala oyo Jounal of the American Medical Assoclation elobi mpo na minyoko ya mfimbo epai na Baloma:

“Mfimbo oyo bazalaki kosalela na momeseno na bango ezalaki mfimbo moko ya mokuse (flagrum to flagellum) ezalaki na nsinga ya mposo na nyama na molai mokeseni, elingámi to mpe te, oyo na katikati na yango batyaki mwa bule mike mingi ya ebende to biteni mikemike ya mokuwa na meme oyo ekoki kozokisa. . . . Basoda Baloma bazalaki kobeta mbala mingi, mpe na makasi na bango nyonso na mikongo ya bakangami, babule ya ebende ezalaki kobimisa matutu minene, nzokande bansinga ya mposo na nyama mpe mikuwa na meme ezalaki kopanza misuni. Wana kobeta ezalaki kolanda, yango ezalaki kopasola misuni oyo mizali na kati, miye mikangani na mikuwa, mpe ezalaki kobimisa ndambo na misuni oyo misanganaki na makila.”

Nsima na monyoko wana, Yesu amemami na ndako ya guvernere, mpe limpinga nyonso ya basoda liyangani. Basoda balandi kotyola ye: basali motólé ya nzube mpe balatisi Yesu. Basimbisi ye mokekele na loboko ya mobali mpe bazipi ye na elamba motane, lokola oyo ekolataka bakonzi. Mpe balobi na ye na kotyola ete: “Mbote, mokonzi na Bayuda!” Lisusu, babwakeli ye nsoi mpe babeti ye. Kobotoláká ye mokekele wana makasi na maboko, babeti ye na motó. kokótisáká lisusu kati na mposo ya motó na ye, banzube ya “motólé” wana ya kookisa nsoni.

Bopolo mpe mpiko monene oyo Yesu amonisi na liboso na momekano wana ekamwisi Pilato kino apusami na komeka mwango mosusu mpo na kobikisa ye. Mpe alobi na bibele ete: “Tala, nazali koya na ye epai na bino mpo boyeba ete namoni likambo kati na ye te.” Mbala mosusu Pilato akanisi ete bakolemba wana bakomona lolenge oyo Yesu akómi likoló na minyoko oyo azwi. Kolatáká motólé ya nzube mpe elamba motane, elongi etondi na makila mpe na bilembo ya mfimbo, Yesu abimi liboso na ebele oyo ya motema makasi. Bongo Pilato alobi ete: “Botala moto ye oyo!”

Atako abomami mpe anyokwami, moto yango azali na ntina mingi kati na Lisolo na bato, ee, azali moto monene oyo akokani na moto mosusu te awa na mabelé. Bopolo mpe kimya na Yesu ezali elembo ya bonene oyo nkutu Pilato asengeli koyeba yango, mpamba te maloba na ye mamonisi limemya mpe mawa oyo azali na yango. Yoane 18:39 kino 19:5; Matai 27:15-47, 20-30; Malako 15:6-19; Luka 23:16-25.

◆Ndenge nini Pilato azali komeka kosala mpo ete Yesu akangolama?

◆Ndenge nini Pilato ameki komilongola na mikumba nyonso?

◆Nini bazali kosalela mpo na kobeta?

◆Ndenge nini Yesu atyolami nsima na kobetama?

◆Mwango nini mosusu Pilato asali mpo na kokangola Yesu?