Yesu bomoi na ye mpe mosala na ye

Batoli liboso na kokende

ELAMBO ya ekaniseli esili, kasi Yesu mpe bantóma na ye bazali naino na chambre na ndako kuna na likóló. Yesu akozala lisusu elongo na bango te; kasi azali naino na makambo mingi ya koyebisa bango. Mpo na kolendisa bantóma na ye, Yesu alobaki ete: “Tika ete mitema na bino mitungisama te”, “Bondima Nzambe”. Kasi esengeli kosala mingi koleka. Abakisi boye: “Bondima mpe ngai”.

Yesu alandi koloba: “Na ndako na Tata na ngai bisika bizali mingi”. “Nakokenda kobongisela bino esika . . . ete esika ezali ngai, bino bozala mpe wana lokola.” Kasi bantoma bazali kososola te ete Yesu azali kolobela bango kokende na ye na likoló; yango wana Toma atuni ete: “Nkolo toyebi te soko okokenda wapi. Tokoyeba nzela ndenge nini?”

Yesu azongisi ete: “Ngai nazali nzela, mpe solo, mpe bomoi”. Ya solo, moto akoki kokota epai na Tata na likoló bobele soko andimi ye mpe amekoli lolenge ya bomoi na ye, mpamba te lokola Yesu alobi yango, “moto akokóma epai na Tata te soko na nzela na ngai te.”

Filipe atuni ete: “Nkolo, monisa biso Tata mpe wana ekokoka na biso.” Emonani ete Filipe azali na mposa ete Yesu amonisa bango mpenza Nzambe na lolenge oyo amimonisaki kala epai na Moise, na Elizé mpe na Yisaya. Kasi, na solo mpenza, bantoma bazali mpenza na eloko oyo ezali kitoko koleka bimonaneli motindo wana, ezali yango nde Yesu amonisi awa: “Nazali na bino ntango molai boye nde yo Filipe oyebi naino ngai te? Ye oyo amoni ngai asili komona Tata.”

Yesu azali mpenza komonisa bomoto ya Tata na ye na lolenge ya kokoka, na boye ete kozala esika moko elongo na ye mpe kotala ye ezali lokola soko nde omoni mpenza Tata. Nzokande, Tata aleki Mwana, ezali yango nde Yesu amonisi awa: “Makambo mazali ngai koloba na bino, nasololi yango na monoko na ngai moko te.” Yesu amonisi ete mateya oyo ye azali kopesa mauti nde na Tata na ye oyo azali na likoló.

Ezali mpenza likambo na kolendisa mpo na bantoma na koyoka Yesu koloba na bango sikawa ete: “Moto oyo akondima ngai, akosala mpe misala oyo nazali kosala, mpamba te ngai nazali kokende epai na Tata.” Alingi koloba te ete bayekoli na ye bakozwa nguya ya kosala makamwisi koleka oyo ya ye. Kasi alingi nde koloba ete, bakosala mosala na bango mikolo mingi, na etando eleki monene, mpe na mokili mobimba.

Nsima na kokende na ye, Yesu akobosana bayekoli na ye te. Alaki bango ete: ”Likambo nini likolomba bino na nkombo na ngai, ngai nakosala yango.” Abakisi lisusu ete: “Nakobondela Tata mpe akopesa bino Mosungi mosusu ete afanda na bino libela, elimo ya solo.” Nsima mpenza, ntango akomata na likoló, Yesu akosopa elimo santu, mosungi yango mosusu likoló ya bayekoli na ye.

Kokende na Yesu ebelemi, mpe alobi ete: “Nsima na mwa ntango moke, bamokili bakomona ngai lisusu te.’’ Yesu akozala ekelamu ya elimo oyo moto moko te na mokili akomona ye. Kasi azali kolaka lisusu na bantóma na ye ya sembo ete: “Bino bokomona ngai mpo ete ngai nazali na bomoi mpe bino bokozala na bomoi.” Ya solo, ezali bobele te ete Yesu akobimela bango na nzoto ya bomoto nsima na lisekwa na ye, kasi, na ntango oyo ebongisami, akosekwisa bango lokola bikelamu ya elimo mpo ete bakoka kofanda elongo na ye na likoló.

Sikawa, Yesu apesi lilako oyo kitoko: “Oyo azali na malako na ngai mpe azali kotosa yango, ye wana azali molingi na ngai. Mpe molingi na ngai akolingama na Tata na ngai, mpe nakolinga ye mpe nakomimonisa epai na ye.”

Na ntango oyo, ntoma Yuda, ye oyo abengami lisusu Thaddée, akati ye maloba ete: “Nkolo, ntina nini okomimonisa epai na bino nde epai na bamokili te?”

Yesu ayanoli ete: “Soko moto nani akolingaka ngai, akotosa liloba na ngai, mpe Tata na ngai akolinga ye . . . Ye oyo akolingaka ngai te, akotosa maloba na ngai te.” Na kokesena na bayekoli na ye ya botosi, bamokili bazali kosepela na mateya na Klisto te. Mpe ye azali komimonisa na bango te.

Na boumeli ya mosala na ye awa na mabelé, Yesu ateyaki makambo mingi epai na bantoma na ye. Ndenge nini bakomikundola makambo yango nyonso, mingi mpenza na ntango bazali kokanga ntina te, lokola kino sikawa? Likambo na esengo mpenza, Yesu apesi elaká oyo: ’’Mosungi, elimo santu oyo Tata akotinda na nkombo na ngai, ye akolakisa bino makambo nyonso mpe akokundwela bino makambo nyonso masili ngai koloba na bino.’’

Mpo na kolendisa bango lisusu, Yesu alobi boye: “Nazali kotikela bino kimya, nazali kopesa bino kimya na ngai moko . . . Mitema na bino mitungisama te, mibanga mpe te!” Solo mpenza, Yesu azali kokende, kasi alimboli boye ete: “Soki bolingaki, mbele bosepeli ete nazali kokende epai Tata, mpamba te Tata aleki ngai.”

Sikawa, ntango oyo Yesu azali kolekisa elongo na bango etikali mingi te, Yango nde alobi boye: “Nakosolola na bino lisusu mingi le, mpamba te, mokóló na mokili azali koya mpe azali na eloko kati na ngai te.” Satan le Diable, ye oyo akolaki epai na Yuda mpe ayangelaki motema na ye, nde azali mokóló ya mokili Kasi mposa mabe moko ezali te kati na Yesu oyo Satana akoki kozwela yango litomba mpo na kopengola ye na mosala ya Nzambe. Yoane 14:1-31; 13:27; Luka 22:3, 4; Exode 24:10; 1 Mikonzi 19:9-13;Yisaya 6:1-5.

▪ Yesu akei epai wapi, mpe eyano nini Toma azwi na ntina na nzela oyo basengeli kokende?

▪ Na ndenge emonani, Filipe atuni nini epai na Yesu?

▪ Mpo na nini ye oyo amoni Yesu asili mpe komona Tata?

▪ Na ndimbola nini bayekoli na Yesu bakosala misala minene koleka oyo ya ye?

▪ Na ndimbola nini Satana azalaki na eloko te kati na Yesu?