Yesu bomoi na ye mpe mosala na ye

Yesu apesi batoli mosusu liboso na kokende

YESU mpe bantomá na ye balingi kobima na chambre oyo ezali na likoló. Yesu alobi lisusu ete “Nasololi bino makambo oyo mpo ete bobeta libaku te.” Mpe apesi bango likebisi oyo makasi ete: “Bakobimisa bino na biyanganelo. Ee, ntango ekoya wana moto na moto oyo akoboma bino, akobanza ete azali kosalela Nzambe mosala.”

Emonani ete, bantoma batungisami mingi na likebisi yango. Yesu asilaki koyebisa bango ete mokili ekoyina bango, kasi ayebisaki bango te ete bakobomama. Yesu alimboli ete, “Nasololi bino makambo oyo ete, wana ekoya ntango na yango, bokanisa yango mpamba te nasili koloba na bino.” Nzokande, asali malamu na kolendisa bango na kopesáká malako liboso na kokende na ye!

Yesu alandi koloba ete, “Sikawa nakokende epai na Motindi na ngai nde moko na bino te azali kotuna ngai ete: ‘Okokende wapi?’” Mosika te na mpokwa, bayebi epai wapi azalaki kokende, kasi sikawa batungisami mingi mpenza na likambo oyo Yesu auti koyebisa bango ete bazala na mituna mingi te na likambo yango. Yesu ayei koloba ete: “Mpo ete nasololi bino makambo oyo, yango mawa etondisi mitema na bino.” Bantomá bazali na mawa te bobele mpo ayebisi bango ete bakokutana na minyoko makasi mpe bakobomama kasi lisusu mpo ete Nkoló na bango alingi kotika bango.

Yango wana Yesu alimboli bango ete: “Mpamba te ekoyeisa litomba na bino soko nakokende. Mpo ete soki nakokende te, mosungi mpe akoyela bino te.” Kasi soko nakokende nakotinda ye epai na bino.Yesu akozala bobele na esika moko, kasi ntango akokende na likoló, akotinda mosungi, elimo santu ya Nzambe epai na bayekoli na ye, mpe soko epai wapi bakozala na mabelé. Boye, kokende na Yesu ekoyeisa litomba epai na bango.

Yesu alobi ete, elimo santu “ekopamela bamokili na ntina na masumu mpe na ntina na kosambisama.” Lisumu ya bamokili, elingi koloba kozanga kondima na bango epai na Mwana na Nzambe, ekomonisama polele. Lisusu, bilembo ya boyengebene na Yesu ekopesama wana ekomata ye epai na Tata. Likambo oyo ete Satana mpe mokili mabe oyo ye azali koyangela bakokaki te na kobebisa bosembo na Yesu, ezali elembo emonisi ete mokoló na mokili asili kosambisama mpe akweisami.

Yesu alandi koloba ete, “Nazali na makambo mingi ya koloba na bino nde bokoki koyamba yango sikawa te.” Ezali mpo na yango nde Yesu alaki ete na ntango akosopa elimo santu, nguya ya Nzambe oyo ekosalaka mosala, elimo yango ekosalisa bango na kokanga ntina ya makambo yango, na kotalela makoki na bango mpo na kobomba yango.

Oyo bantoma bazalaki kokanga ntina te, ezali mingimingi likambo oyo ete. Yesu akokufa mpe akobimela bango lisusu, wana akosekwa. Yango wana bazali komituna bamoko epai na bamosusu ete: “Oyo nini ezali ye koloba na biso ete: ‘Nsima na ntango moke bokotala ngai te, kasi nsima na mwa ntango moke lisusu, bokomona ngai?,’ mpe ete: ‘mpamba te ngai nakokende epai na Tata?”

Yesu ayebi ete balingi kotuna ye; yango wana alimboli boye ete: “Solo solo nazali koloba na bino ete: bokooka mawa mpe bokolela, nde bamokili bakosepela bino bokooka mawa nde mawa na bino ekobongwana esengo.” Lobi lolandi, na nsima na midi, wana Yesu akobomama, bakonzi ya mangomba bakosepela kasi bayekoli bakooka mawa. Kasi, mawa na bango ekobongwana esengo wana Yesu akosekwa. Mpe esengo na bango ekoumela na ntango akotondisa bango na nguya mpo bazala batemwe na ye, na kosopeláká bango elimo santu ya Nzambe, na mokolo ya Pantekote.

Kokokanisáká ezalela ya bantoma na ye na oyo ya mwasi azali na mpasi ya kobota, Yesu alobi ete: “Mwasi azali na mawa wana ezali ye kobota mpo ete elaka na ye ekoki.” Kasi lokola akanisaka lisusu mpasi na ye te ntango mwana abotami, Yesu amonisi na bayekoli ete: “Bino mpe bozali sikawa na mawa; kasi nakomona bino lisusu (na ntango nakosekwa), mpe mitema na bino mikosepela, mpe moto akolongola bino esengo na bino te.”

Kino ntango wana, bantomá naino basali libondeli te na nkombo na Yesu, kasi sikawa Yesu alobi ete: “Soko bokolomba Tata eloko nini na nkombo na ngai, akopesa bino yango. . . . Mpamba te Tata ye moko alingi bino mpo ete bosili kolinga ngai mpe bondimi ete nayei na mokili lokola momonisi na Tata. Nabimi longwa na Tata mpe nayei na mokili; lisusu nazali kolongwa na mokili mpe nakokende epai na Tata.”

Maloba na Yesu mazali elendiseli na nguya mpo na bantomá. Bango balobi ete: “Na likambo oyo tondimi ete obimi epai na Nzambe.”

Yesu atuni ete: “Bondimi bobele sikawa? Tala ntango ekoya, ee, esili koya, wana bokopanzama moko na moko epai na ye mpenza, mpe bokotika ngai bobele ngai moko.” Ezali likambo limonanaki lokola ete ekosalema te, kasi yango nde esalemaki na butu!

Yesu asukisi ete: “Nasili kosolola na bino makambo oyo ete bozala na kimya kati na ngai.” “Kati na mokili bozali na bolozi, nde boyika mpiko! Nasili kolonga mokili.” Yesu alongaki mokili na kokokisáká mokano na Nzambe na bosembo nyonso atako makambo nyonso oyo Satana mpe mokili oyo ye azali koyangela bamekaki kobebisa bosembo na ye. Yoane 16:1-33; 13:36.

▪ Yesu apesi likebisi nini etungisi bantomá na ye?

▪ Mpo na nini bantomá bazali kotuna te esika oyo Yesu azali kokende?

▪ Likambo nini mpenza oyo bantomá bazali kokanga ntina te?

▪ Yesu asaleli lisese nini oyo ezali komonisa ete mawa ya bantomá ekobongwana esengo?

▪ Engebene Yesu, nini bantomá bakosala mosika te?

▪ Lolenge nini Yesu alongaki mokili?