Yesu, bomoi na ye mpe mosala naye

Kotekama mpe kokangama

MINUIT esili koleka ntango Yuda akomi na elanga ya Getesemane, liboso na etuluku monene oyo ezwami kati na yango basoda, banganga minene mpe Bafalisai. Banganga bayokanaki mpo na kopesa ye palata na misolo 30 mpo ete ateka Yesu.

Mwa moke liboso, ntango babenganaki ye na elambo ya Elekeli, emonani polele ete akendaki mbala moko epai na banganga minene. Bango bayanganisaki noki basali na bango elongo na limpinga moko ya basoda. Mbala mosusu Yudasi amemaki bango liboso naino na esika epai kuna Yesu mpe bantoma na ye basalaki elambo ya Elekeli. Komonáká ete balongwaki wana, ebele na bato oyo bazalaki na bibundeli, na miinda mpe na mpaka (torches), babimaki longwa na Yelusaleme kolandáká Yudasi, mpe bakatisaki lobwaku na cédron.

Soki Yudasi azali komema molongo na bato wana epai na ngomba ya Olive, ezali mpo ete ayebi esika nini bakoki kokuta Yesu. Poso oyo eutaki koleka, na ntango bazalaki kosala mibembo mpe katikati na Béthanie mpe Yelusaleme, Yesu mpe bantoma na ye mbala mingi bazalaki kotelema na elanga ya Getesemane mpo na kopema mpe kosolola. Nzokande, na ngonga oyo, na ntembe te Yesu azali kati na molili na nse na banzete ya olive; na bongo ndenge nini basoda bakoyeba ye? Mbala mosusu bamonaki ye naino liboso te. Yudasi apesaki bango elembo, na kolobáká ete: “Soko nakopwepwa nani, ye wana. Bokanga ye mpe bokenda na ye malamu.”

Yudasi akambi ebele na bato na elanga, amoni Yesu elongo na bayekoli na ye, mpe akei mbala moko liboso na ye, Alobi na ye, “mbote, Labi! Mpe apwepwi ye.

Yesu azongisi. “Moninga ozali awa mpo na nini? Mpe na nsima, ye moko ayanoli na motuna, alobi ete: “Yuda, ozali kokaba Mwana na moto na lipwepwe?” Kasi tokoloba lisusu te na ntina na moteki oyo! Yesu apusani epai na kongenga ya mpaka mpe ya miinda. mpe atuni: “Bozali koluka nani?” Bamosusu bayanoli, “yesu na nazarete”

Ayebisi na komibimisaka na molende nyonso liboso na bango ete, “ngai oyo. Ekamwi bango mpo na molende na ye mpe koyebáká te soki likambo nini ezali kozela bango, mibali yango bazongi nsima mpe bakwei na mabelé,

Yesu akobi na kimya nyonso, “nalobi na bino ete, ngai oyo; soko bozali koluka ngai, tika ete baoyo bakenda na bango.” Mwa ngonga moke liboso, kati na chambre kuna na étage, Yesu abondelaki Tata na ye na kolobáká ete, abatelaki na bosembo nyonso bantoma na ye ya sembo mpe ete moko te kati na bango ebungaki bobele mwana na libebi.” Mpo ete liloba na ye ekokana, asengi bongo ete batika bayekoli na ye bakende.

Lokola basoda bazalaki komibongisa, batelemi mpe babandi kokanga Yesu basinga, bantoma bamoni likambo oyo ekobima nsima mpe batuni ete: “Nkolo, tobeta na mopanga?” Liboso ete Yesu akoka koyanola, Petelo asimbi moko na mipanga mibale oyo bantoma bamemaki mpe abeti Malakusu, moombo ya nganga m onene. Azwi moto ya moombo te, kasi akati ye litoi ya mobali.

Yesu apekisi na kolobáká ete, “botika; ekoki boye.” Na nsima, kosimbaka litoi na ye, asilisi mpótá. Apesi na bongo liteya moko monene, na koyebisáká na Petelo ete: “Zongisa mopanga na yo na esika na yango. Mpamba te baoyo nyonso bakosimba mopanga bakokufa na mopanga. Okanisi te ete nakoki kobondela Tata na ngai mpe ye akotindela ngai pwasa koleka bibele zomi na mibale na baanze?”

Yesu andimi kokangama Alimboli: “Nde nzela nini makomi makokokana ete makambo mabima boye?” Mpe abakisi: “Kopo oyo epesi Tata epai na ngai, namela yango te?” Atosaki na mobimba mpenza na mokano ya Nzambe na ntina na ye.

Na nsima Yesu alobi epai na bibele ete: “Bobimi nde na mipanga mpe na nzete kokanga ngai lokola mpo na moyibi? Nafandaki na tempelo kolakisa mokolo na mokolo nde bokangaki ngai te. Na oyo nyonso ekoki ete makomi na basakoli makokana.”

Nsima na koloba boye, limpinga na basoda, komanda mpe basali ya Bayuda bakangi Yesu mpe balingi ye basinga. Komonáká bongo, bantoma batiki ye mpe bakimi. Nzokande, elenge mobali moko, ekoki kozala moyekoli Malako, atikali elongo na bibele. Mbala mosusu azalaki kati na ndako epai kuna Yesu asalaki Elekeli mpe na nsima alandaki bibele ntango bakendaki. Sikawa bayebi ye, mpe bato mosusu bameki kokanga ye. Kobwakaka bilamba na ye ya pepele, akimi bolumbu.​—Matai 26:47-56; Malako 14:43-52; Luka 22:47-53; Yoane 17:12;18:3-12.

◆ Mpo na nini Yuda azali na elikya ya kokuta Yesu kati na elanga ya Getesemane?

◆ Ndenge nini Yesu amonisi ete azali komibanzabanza mpo na bantoma na ye?

◆ Petelo asali nini mpo na kobikisa Yesu, kasi Yesu alobi na ye nini?

◆ Ndenge nini Yesu amonisi ete atosi na mobimba mpenza na mokano na Nzambe na ntina na ye?

◆ Ntango bantoma batiki Yesu, nani atikali, mpe likambo nini likomeli ye?