Ozali nde “kobɛtabɛta makolo na nsɔngɛ ya mangenda”?

NA NTANGO ya kala, mpo na kotindika banyama oyo ememaka mikumba, mbala mingi bazalaki kosalela lingenda moko molai oyo nsuka na yango ezalaki na ebende oyo ezali nsɔngɛ. Soki nyama eboyi kotosa ntango bazali kotuba yango nsɔngɛ ya ebende ya lingenda, nini ezalaki kosalema? Ezalaki nde komiyokisa mpasi.

Yesu Klisto oyo asekwi alobelaki mangenda ntango abimelaki Saulo, mobali oyo azalaki kokende kokanga bayekoli ya Yesu. Na katikati ya kongɛnga makasi, Saulo ayokaki Yesu alobi ete: “Saulo, Saulo, mpo na nini ozali konyokola ngai? Kobɛtabɛta makolo na nsɔngɛ ya mangenda ezali mpasi mpo na yo.” Lokola Saulo azalaki konyokola baklisto, azalaki nde kobundisa Nzambe, elingi koloba ete azalaki kosala likambo oyo ekokaki se kosukela ye mabe.​—Misala 26:14.

Kozanga ete tóyeba yango, ekoki nde mbala mosusu kosalema ete biso mpe tozali ‘kobɛtabɛta makolo na nsɔngɛ ya mangenda’? Biblia elobi ete “maloba ya bato ya mayele” ezali lokola fimbo oyo etindikaka biso liboso mpe ezongisaka biso na nzela ya malamu. (Mosakoli 12:11) Soki totikeli toli ya Liloba ya Nzambe nzela, ekoki kopesa biso makasi mpe kotambwisa biso malamu. (2 Timote 3:16) Soki toboyi kotosa toli yango oyo ezali kolakisa biso nzela ekoki se kosukela biso mabe.

Saulo ayokaki maloba ya Yesu, abongwanaki, mpe akómaki ntoma Paulo, moklisto oyo alingamaki mingi. Soki tozali kotosa toli ya Nzambe, na ntembe te tokozwa mapamboli ya seko.​—Masese 3:1-6.

[Maloba mpo na kolimbola eutelo ya bafɔtɔ na lokasa 32]

L. Chapons/​Illustrirte Familien-Bibel nach der deutschen Uebersetzung Dr. Martin Luthers