Aleki mbula nkama kasi azali na bomoi ya ntina

ELIN azali na kati ya bato 60 ya ekólo Suède oyo bauti kotánga bango ete bazali na mbula 105 mpe koleka. Ye azali na mbula 105. Atako afandaka na ndako mpo na mibange mpe abimaka te, azangisaka te kosakola mpo azali Motatoli ya Yehova banda mbula koleka 60.

Mpo na kosakola, Elin asalaka ndenge ntoma Paulo azalaki kosala ntango azalaki na likoki ya kobima te mpo bazalaki kokɛngɛla ye. Paulo azalaki koteya bato oyo bazalaki koya kotala ye. (Misala 28:16, 30, 31) Ndenge moko mpe, Elin asimbaka mabaku nyonso mpo na koyebisa nsango malamu ya Biblia epai ya bato ndenge na ndenge oyo bayaka na ndako yango ya mibange, na ndakisa bato oyo bapɛtolaka ndako, minganga, bato oyo babongisaka bango nsuki mpe bato mosusu. Mbala na mbala, bandeko ya lisangá ya Elin basɛngaka bayekoli na bango ya Biblia ete bákendaka kotala Elin mpo bázwa mayele epai na ye.

Bandeko ya lisangá basepelaka na bomoto ya Elin mpe na ndenge alukaka koyeba makambo. Ndeko moko alobi boye: “Alingaka mpenza koyeba makambo nyonso oyo ezali kosalema na lisangá. Ayebi bankombo ya bana nyonso ata mpe ya baoyo bayei sika na lisangá.” Bato mingi bayebi mpe ete Elin akabaka, asɛkisaka basusu, mpe azali na makanisi ya malamu mpo na bomoi.

Nini esalisaka Elin azala na esengo mpe abosana te ete bomoi na ye ezali na ntina? Mikolo nyonso, atángaka mopako ya mokolo na mwa buku Tótángaka Makomami mokolo na mokolo, ebimisami na Batatoli ya Yehova. Asalelaka talatala oyo emonisaka makomi minene (loupe) mpo na kotanga mwa eteni ya Biblia mikolo nyonso. Elin abongisaka makita nyonso, mpe atako kolɔngɔnɔ ya nzoto na ye epekisaka ye ayanganaka, bandeko batyelaka ye masolo nyonso na bakasɛti. Kotánga Biblia mokolo na mokolo mpe mikanda oyo elimbolaka Biblia mpe kobosana te makita ya boklisto ekoki kosalisa biso tózala na bomoi ya esengo mpe ya ntina ata soki tozali na mbula nini.​—Nzembo 1:2; Baebele 10:24, 25.