Nyongo oyo tozali na yango epai ya bato mosusu

¹ Ntoma Paulo ayebaki ete azali na mokumba ya kosakwela bato. Ayebaki ete Yehova apesaki bato ya ndenge nyonso likoki ya kobika na nzela ya makila ya motuya mingi ya Mwana na Ye. (1 Tim. 2:​3-6) Na yango, Paulo alobaki boye: “Ezala epai ya Bagrɛki mpe Babarbare, ezala epai ya bato ya bwanya mpe bazoba nazali na nyongo.” Paulo asalaki na molende mpenza mpe amipesaki mingi na koyebisa bato nsango malamu mpo na kofuta nyongo oyo azalaki na yango epai na bango.​—⁠Lom. 1:​14, 15.

² Lelo oyo, baklisto balukaka koyebisa bazalani na bango nsango malamu na mabaku nyonso ndenge Paulo asalaki. Lokola “bolɔzi monene” ekómi pene, tosengeli kosala nokinoki mpenza mpo na koluka bato ya mitema sembo. Tiká ete bolingo ya solosolo oyo tozali na yango mpo na bato etinda biso tósala na molende mpenza mosala oyo ebikisaka bomoi ya bato.​—⁠Mat. 24:21; Ezek. 33:⁠8.

³ Tófuta nyongo na biso: Lolenge ya malamu koleka ya kokutana na bato ezali kosakola ndako na ndako. Na bateritware oyo bato mingi bazalaka na bandako na bango te, tokoki kosala liste ya bato oyo tokutaki bango na ndako te mpe kozongela bango na bantango mosusu, yango ekoki kosalisa biso tókutana na bato mingi. (1 Kol. 10:33) Tokoki mpe kokutana na bato soki tozali kopesa litatoli na bisika ya mombongo, na balabala, na baparke, na bisika mituka etɛlɛmaka; mpe na telefone. Tokoki komituna boye: ‘Nasalelaka lolenge nyonso ya kosakola mpo na koyebisa bato nsango ya bomoi?’​—⁠Mat. 10:11.

⁴ Mobongisi-nzela moko azalaki na mposa ya kokutana na bato nyonso ya teritware na ye. Na ndako moko, azalaki mbala nyonso kokuta barido ya maninisa ekangami, mpe moto azali te. Kasi mokolo moko, ntango azalaki na mosala ya kosakola te, amonaki motuka moko etɛlɛmi liboso ya ndako yango. Aboyaki kolekisa libaku yango, mpe abɛtaki ngonga ya lopango yango. Mobali moko andimaki mpe basololaki, na nsima, ndeko mwasi yango ná mobali na ye bakómaki kosolola na ye mbala na mbala. Nsukansuka, mobali yango andimaki koyekola Biblia, mpe azali sikoyo ndeko oyo azwi batisimo. Azali na botɔndi ndenge ndeko mwasi wana azalaki koyoka ete azali na nyongo mpe na mokumba ya kosakwela basusu.

⁵ Lokola mikolo etikali ya kotánga, sikoyo mpenza nde ntango ya komipesa na molende nyonso na mosala ya kosakola mpo na kofuta nyongo oyo tozali na yango epai ya bato.​—⁠2 Kol. 6:​1, 2.