-
Bokonzi ya Nzambe ezali nini?Sepelá na bomoi libela na libela!—Boyekoli ya Biblia
-
-
7. Mibeko ya Bokonzi ya Nzambe eleki mibeko ya baguvɛrnema nyonso ya mokili
Baguvɛrnema ya mokili etyaka mibeko oyo bakanisaka ete ekobatela bato mpe ekomemela bango bolamu. Bokonzi ya Nzambe mpe etyá mibeko oyo bato oyo yango ekoyangela basengeli kotosa. Tángá 1 Bakorinti 6:9-11, mpe na nsima yanolá na mituna oyo:
Okanisi nini, mokili elingaki kozala ndenge nini soki bato nyonso bazalaki kotosa mibeko ya Nzambe?a
Mpo na yo, ebongi mpenza ete Yehova asɛnga bato oyo bazali na nse ya Bokonzi na ye bátosa mibeko na ye? Mpo na nini?
Nini emonisi ete bato oyo bazali kotosa mibeko yango te bakoki kobongwana? —Talá vɛrsɛ 11.
Baguvɛrnema ya mokili etyaka mibeko mpo ebatela bato mpe ememela bango bolamu. Bokonzi ya Nzambe etyá mibeko ya malamu koleka mpo na kobatela bato oyo yango ekoyangela mpe mpo na bolamu na bango
-
-
Biblia elobi nini na likambo etali kosangisa nzoto?Sepelá na bomoi libela na libela!—Boyekoli ya Biblia
-
-
LITEYA 41
Biblia elobi nini na likambo etali kosangisa nzoto?
Bato mingi bayokaka nsɔni kolobela makambo etali kosangisa nzoto. Nzokande, ntango Biblia elobelaka likambo yango, elobaka polele, kasi na ndenge oyo ebongi. Makambo oyo Biblia elobi ezali mpo na bolamu na biso. Makambo yango ebongi mpenza mpo Biblia euti epai ya Yehova, Nzambe oyo akelá biso. Ayebi oyo eleki malamu mpo na biso. Ayebisi biso makambo oyo tokoki kosala mpo tósepelisa ye, mpe makambo oyo ekosalisa biso tósepela na bomoi libela na libela.
1. Ndenge nini Yehova atalelaka kosangisa nzoto?
Yehova nde apesá moto binama ya kobotela. Asalá yango mpo mwasi ná mobali oyo babalaná básangisaka nzoto mpe bázala na esengo. Mwasi ná mobali basangisaka nzoto kaka mpo na kobota bana te, kasi mpe mpo na komoniselana bolingo mpe lolango na ndenge oyo ebongi. Yango wana Liloba ya Nzambe elobi: “Sepelá na mwasi ya bolenge na yo.” (Masese 5:18, 19) Yehova asɛngi bakristo oyo babalá bázala sembo epai ya balongani na bango, mpo bákwea te na ekobo.—Tángá Baebre 13:4.
2. Wapi lolenge ya kosangisa nzoto oyo Nzambe alingaka te?
Biblia eyebisi biso ete “bato ya pite [to oyo basangisaka nzoto na ndenge ya mbindo] . . . bakozwa libula ya Bokonzi ya Nzambe te.” (1 Bakorinti 6:9, 10) Bato oyo bakomaki Biblia basalelaki liloba ya Grɛki pornéïa mpo na kolobela pite to makambo ya kosangisa nzoto na ndenge ya mbindo. Yango esangisi makambo lokola: (1) kosangisa nzotoa kati na bato mibale oyo babalani te, (2) kosangisa nzoto mibali na mibali to basi na basi, mpe (3) kosangisa nzoto ná nyama. Tosepelisaka Yehova mpe tozwaka bolamu ntango ‘toboyaka pite’ to makambo ya kosangisa nzoto na ndenge ya mbindo.—1 Batesaloniki 4:3.
KƆTÁ NA MOZINDO
Luká koyeba ndenge okoki koboya pite mpe bolamu oyo okozwa soki otikali pɛto na makanisi.
3. Kimá pite
Yozefe, elenge mobali moko ya sembo aboyaki kosangisa nzoto na mwasi moko. Tángá Ebandeli 39:1-12, mpe na nsima yanolá na mituna oyo:
Mpo na nini Yozefe akimaki?—Talá vɛrsɛ 9.
Okanisi nini, Yozefe azwaki ekateli oyo ebongi? Mpo na nini?
Ndenge nini bilenge bakoki komekola Yozefe mpe kokima pite? Talá VIDEO.
Yehova alingi ete biso nyonso tóboya pite to makambo ya kosangisa nzoto na ndenge ya mbindo. Tángá 1 Bakorinti 6:18, mpe na nsima yanolá na mituna oyo:
Makambo nini ekoki komema moto na kosala pite?
Ndenge nini okoki kokima pite?
4. Okoki kolonga komekama
Mpo na nini ekoki kozala mpasi moto atika pite? Talá VIDEO, mpe na nsima yanolá na mituna oyo elandi.
Na video yango, ntango ndeko amonaki ete makanisi mpe makambo oyo azalaki kosala ekoki kosala ete azala sembo te epai ya mwasi na ye, asalaki nini?
Na bantango mosusu, ata bakristo ya sembo basalaka makasi mpo na kobatela makanisi na bango pɛto. Okoki kosala nini mpo otika kokanisa makambo ya mbindo? Tángá Bafilipi 4:8, mpe na nsima yanolá na mituna oyo:
Tosengeli kokanisaka makambo nini?
Ndenge nini kotánga Biblia mpe komipesa na mosala ya Yehova esalisaka biso tókwea na lisumu te?
5. Mibeko ya Yehova ezali mpo na bolamu na biso
Yehova ayebi oyo eleki malamu mpo na biso. Ayebisi biso oyo tokoki kosala mpo tózala pɛto na makanisi mpe bolamu oyo tokozwa soki tosali bongo. Tángá Masese 7:7-27 to talá VIDEO, mpe na nsima yanolá na mituna oyo elandi.
Ndenge nini elenge mobali moko atambolaki na nzela oyo ememaki ye na lisumu? —Talá Masese 7:8, 9.
Na kotalela Masese 7:23, 26, pite to makambo ya kosangisa nzoto na ndenge ya mbindo ekoki komema makama ya minene. Soki totikali pɛto na makanisi, makambo nini ya mabe ekokómela biso te?
Ndenge nini makanisi ya pɛto ekoki kosalisa biso tósepela na bomoi libela na libela?
Bato mosusu bakanisaka ete makambo oyo Nzambe alobi na Biblia mpo na kosangisa nzoto mibali na mibali to basi na basi emonisi ete azangi bolingo. Kasi Yehova azali Nzambe ya bolingo mpe alingi ete moto nyonso asepela na bomoi libela na libela. Mpo na kozwa bomoi yango, tosengeli kotosa mibeko na ye. Tángá 1 Bakorinti 6:9-11, mpe na nsima yanolá na motuna oyo:
Na miso ya Nzambe, kaka kosangisa nzoto mibali na mibali to basi na basi nde ezali mabe?
Mpo na kosepelisa Nzambe, biso nyonso tosengeli kobongola bomoi na biso. Kosala bongo ezali mpenza na ntina? Tángá Nzembo 19:8, 11, mpe na nsima yanolá na mituna oyo:
Okanisi nini, mibeko ya Yehova oyo etali bizaleli malamu ebongi mpenza? Mpo na nini?
Yehova asalisi bato mingi bátosa mibeko na ye oyo etali bizaleli malamu. Akoki mpe kosalisa yo
SOKI MOTO ALOBI NA YO: “Kosangisa nzoto ezali na yango mabe te soki bato balingani.”
Okoloba nini?
NA MOKUSE
Kosangisa nzoto ezali likabo oyo Yehova apesá mwasi ná mobali oyo babalaná mpo básepela.
Bozongeli
Pite to makambo ya kosangisa nzoto na ndenge ya mbindo esangisi makambo nini?
Nini ekosalisa biso tóboya pite to makambo ya kosangisa nzoto na ndenge ya mbindo?
Bolamu nini tokozwa soki totosi mibeko ya Yehova na oyo etali bizaleli malamu?
MAKANISI MOSUSU
Luká koyeba ntina oyo Nzambe alingi ete liboso mwasi ná mobali báfanda esika moko basengeli kobalana.
“Biblia elobi nini mpo na libala ya makango?” (Lisolo oyo ezali na Internet)
Talá mpo na nini mibeko ya Biblia oyo etali kosangisa nzoto mibali na mibali to basi na basi emonisi te ete tosengeli koyina bato oyo bazali kosala yango.
“Kosangisa nzoto mibali na mibali to basi na basi ezali mabe?” (Lisolo oyo ezali na Internet)
Talá ndenge mibeko ya Nzambe oyo etali kosangisa nzoto ebatelaka biso.
Na lisolo “Bapesaki ngai limemya,” talá makambo etindaki mobali moko oyo azalaki kosangisa nzoto na mibali abongola bomoi na ye mpo na kosepelisa Yehova.
“Biblia ebongolaka bato” (Linɔ́ngi ya Mosɛnzɛli ya 01/04/2011)
a Yango esangisi makambo lokola, kolɛmbola binama ya kobotela, kosangisa na moto nzoto na esumbeli, mpe kosimbasimba binama ya kobotela ya moto mpo na kolamwisa ye mposa ya kosangisa nzoto.
-
-
Osengeli kosala nini soki osali lisumu moko ya monene?Sepelá na bomoi libela na libela!—Boyekoli ya Biblia
-
-
Atako olingaka Yehova mingi mpe osalaka makasi oboya kosala makambo oyo ekopesa ye mpasi, na bantango mosusu okosala mabunga. Kasi, masumu mosusu ezalaka minene. (1 Bakorinti 6:9, 10) Soki osali lisumu moko ya monene, kokanisa te ete Yehova atiki kolinga yo; akosepela kolimbisa yo mpe akosalisa yo.
1. Osengeli kosala nini mpo Yehova alimbisa yo?
Baoyo balingaka Yehova bayokaka mpenza mawa ntango basali lisumu moko ya monene. Kasi elaka oyo Yehova apesi basaleli na ye esalisaka bango. Elobi: “Ata soki masumu na bino ezali motane makasi, ekokóma mpɛmbɛ lokola nɛjɛ.” (Yisaya 1:18) Soki tobongoli mpenza motema, Yehova akolimbisa biso. Ndenge nini okoki komonisa mpenza ete obongoli motema? Soki oyoki mpenza mawa mpo na mabe oyo osalaki, otiki kosala yango mpe osɛngi Yehova alimbisa yo. Na nsima, osali makasi otika makanisi to bizaleli mabe oyo ememaki yo na lisumu yango, mpe osali makasi otosa mibeko ya pɛto ya Yehova na bomoi na yo.—Tángá Yisaya 55:6, 7.
2. Ndenge nini Yehova asalelaka bankulutu mpo na kosalisa biso ntango tosali lisumu?
Soki tosali lisumu moko ya monene, Yehova ayebisi biso ‘tóbenga bankulutu ya lisangá.’ (Tángá Yakobo 5:14, 15.) Bankulutu yango balingaka Yehova mpe baoyo basalelaka ye. Bazali na makoki ya kosalisa biso tóbongisa boninga na biso ná Yehova.—Bagalatia 6:1.
Ndenge nini bankulutu basalisaka biso ntango tosali lisumu moko ya monene? Bankulutu mibale to misato bakosalela Biblia mpo na kosembola biso. Bakopesa biso batoli oyo ebongi mpe bakosalisa biso mpo tókwea lisusu te na lisumu yango. Bakopesa biso lisusu malendisi mpe makanisi ya ntina oyo ekosalisa biso tókwea lisusu te na lisumu yango. Mpo na kobatela lisangá na etamboli moko ya mabe, bankulutu balongolaka na lisangá moto nyonso oyo asali lisumu ya monene mpe aboyi kobongola motema.
KƆTÁ NA MOZINDO
Luká koyeba ndenge oyo okoki kokóma na botɔndi mingi mpo na lisalisi oyo Yehova apesaka biso ntango tosali lisumu moko ya monene.
3. Koloba polele lisumu na biso esalisaka biso
Lisumu nyonso esalaka Yehova mpasi, yango wana tosengeli koyebisa ye yango polele. Tángá Nzembo 32:1-5, mpe na nsima yanolá na motuna oyo:
Mpo na nini ezali malamu tóyebisa Yehova lisumu na biso na esika ya koluka kobomba yango?
Nsima ya koyebisa Yehova lisumu na biso, tosengeli koluka lisalisi ya bankulutu mpo tómiyoka malamu. Talá VIDEO, mpe na nsima yanolá na motuna oyo elandi.
Na video yango, ndenge nini bankulutu basalisaki Canon azongela Yehova?
Lokola bankulutu bazali wana mpo na kosalisa biso, tosengeli koyebisa bango makambo polele mpe kobomba ata eloko moko te. Tángá Yakobo 5:16, mpe na nsima yanolá na motuna oyo:
Mpo na nini ezalaka pɛtɛɛ bankulutu básalisa biso soki toyebisi bango makambo polele?
Yambolá masumu na yo, yebisá bankulutu makambo nyonso polele mpe ndimá lisalisi ya Yehova
4. Yehova amoniselaka basumuki motema mawa
Soki moto oyo asali lisumu moko ya monene aboyi kolanda mibeko ya Yehova, bakolongola ye na lisangá. Tosengeli kokata boninga ná moto yango. Tángá 1 Bakorinti 5:6, 11, mpe na nsima yanolá na motuna oyo:
Kaka ndenge levire evimbisaka farini, kozala moninga ya moto oyo asali lisumu mpe aboyi kobongola motema ekoki kosala nini na lisangá?
Mpo na komekola motema mawa oyo Yehova azalaka na yango mpo na basumuki, bankulutu basalaka makasi mpo na koluka mpe kosalisa baoyo balongolamá na lisangá. Mingi bazongaki na lisangá mpo disiplini, atako ezalaki mpasi, esalisaki bango bázongela makanisi ya malamu.—Nzembo 141:5.
Ndenge nini lolenge oyo Yehova asalelaka basumuki makambo emonisi ete azali makambo makasimakasi te, azali na motema mawa mpe bolingo?
5. Yehova alimbisaka biso soki tobongoli motema
Yesu apesaki ndakisa moko mpo na kosalisa biso tóyeba ndenge oyo Yehova ayokaka ntango moto abongoli motema. Tángá Luka 15:1-7, mpe na nsima yanolá na motuna oyo:
Yango eteyi yo nini mpo na Yehova?
Tángá Ezekiele 33:11, mpe na nsima yanolá na motuna oyo:
Osengeli kosala nini mpo na komonisa ete obongoli mpenza motema?
Ndenge moko na mobateli ya mpate, Yehova atyelaka mpenza bampate na ye likebi
SOKI MOTO ALOBI NA YO: “Nazali kobanga koyebisa bankulutu lisumu oyo nasali mpo bakolongola ngai na lisangá.”
Okoyebisa ye nini?
NA MOKUSE
Soki tosali lisumu moko ya monene kasi toyoki mpenza mawa mpe tozwi ekateli ya kotika mabe, Yehova akolimbisa biso.
Bozongeli
Mpo na nini ezali malamu tóyebisa Yehova masumu na biso?
Tosengeli kosala nini mpo Yehova alimbisa masumu na biso?
Mpo na nini osengeli koluka lisalisi ya bankulutu soki osali lisumu moko ya monene?
MAKANISI MOSUSU
Talá ndenge Yehova amoniselaki mobali moko motema mawa oyo elobelami na Yisaya 1:18.
Ndenge nini bankulutu balukaka kosalisa baoyo basali lisumu moko ya monene?
Talá ndenge tomonisaka bolingo mpe motema mawa epai ya basumuki oyo baboyi kobongola motema
“Lisalisi mpo na baoyo balongolami na lisangá Linɔngi ya Mosɛnzɛli, 08/2024
Na lisolo “Nasengelaki kozongela Yehova,” talá ntina oyo mobali moko oyo atikaki solo amonaki ete Yehova nde asalisaki ye azonga.
“Biblia ebongolaka bato” (Linɔ́ngi ya Mosɛnzɛli ya 01/04/2012)
-