Ozali komikundola?

Osepelaki na botángi ya banimero ya Linɔ́ngi ya Mosɛnzɛli oyo ebimaki? Soki ɛɛ, okosepela komikundola makambo malandi:

◻ Mpo na nini tosengeli kotyela bato oyo Yehova azali kopona mpo na kokamba libota na ye motema?

Yehova aponaka bato oyo bazali na makoki ya sikisiki oyo esengeli mpo na kokamba bato na ye na ndenge oyo ye alingi na eleko moko ya sikisiki.​—15/8, lokasa 14.

◻ Liteya nini tokoki kozwa na likambo ya Yona?

Yona amibanzabanzaki mingi mpo na ye moko kasi mpo na basusu te. Tózwa liteya na likambo ya Yona mpe tómitya biso moko mpe mayoki na biso na esika ya mibale.​—15/8, lokasa 19.

◻ Na ndimbola nini tokoki koloba ete “nkombo ya Yehova ezali ndako molai na nguya”? (Masese 18:10)

Koluka libateli na nkombo ya Nzambe elimboli kotya elikya epai na Yehova ye moko. (Nzembo 20:1; 122:4) Elimboli kopesa mabɔkɔ na bokonzi na ye, kobatela mibeko mpe mitinda na ye, kondimela bilaka na ye, mpe kosambela se ye. (Yisaya 50:10; Baebele 11:6)—1/9, lokasa 10.

◻ Ndakisa nini tokoki kozwa na lolenge oyo Paulo atatolaki liboso na bakonzi?

Paulo asalelaki bokɛngi ntango azalaki koloba liboso na Mokonzi Akalipa. Alobelaki makambo oyo ye na Akalipa bazalaki kondima. Bobele bongo, tosengeli kolobela mingi makambo kitoko ya nsango malamu, kobenda likebi mingi likoló na bilikya oyo biso na bayoki na biso tozali na yango. (1 Bakolinti 9:22)—1/9, lokasa 31.

◻ Banani bazali kozwa litomba na motema molai ya Yehova?

Lokola Yehova azali na motema molai, bamilio ya bato lelo oyo bazali kozwa libaku ya kobikisama na “mokolo ya Yehova” oyo ekoya. (2 Petelo 3:9-15) Motema molai na ye ezali mpe kopesa mokomoko na biso libaku ya ‘koluka sikawa nzela ya kobika na biso na nsɔmɔ mpe na kolɛnga.’ (Bafilipi 2:12)—15/9, lokasa 20.

◻ Libongoli ya Biblia ya Septante ezalaki na motuya nini?

Biblia ya Septante ekokisaki mosala monene ya kopalanganisa boyebi ya Yehova mpe ya Bokonzi na ye oyo etambwisami na Yesu Klisto. Biblia ya Septante epesaki nzela na Bayuda oyo bazalaki koloba lokota ya Greke na bato ya mabota mosusu ete bándima nsango malamu ya Bokonzi.​—15/9, lokasa 30.

◻ Lisese ya mwana na kilikili ezali koteya biso nini na ntina na Nzambe?

Ya liboso, Yehova azali “na mawa mpe na ngɔlu, akoyoka nkanda noki te mpe aleki na boboto mpe na solo.” (Exode 34:6) Ya mibale, azali ‘na mposa ya kolimbisa,’ ntango moto moko ya masumu abongoli motema mpo ayokela ye mawa. (Nzembo 86:5)—1/10, nkasa 12, 13.

◻ Ntango nini bato bakofanda na kimya ndenge Yisaya 65:21-25 elaki?

Lokola bazali basambeli ya Yehova oyo basangani lelo oyo kati na paladiso ya elimo, bapakolami mpe “bampate mosusu” bazali na kimya euti na Nzambe. (Yoane 10:16) Mpe kimya yango ekozala na Paladiso ya mabelé, ntango ‘mokano ya Nzambe ekosalema na nse lokola esalemaka na likoló.’ Na ntango yango maloba ya mosakoli Yisaya makokokisama nyonso. (Matai 6:10)—15/10, lokasa 24.

◻ Mpo na nini baklisto basalaka anivɛrsɛrɛ ya libala kasi ya mokolo ya kobotama te?

Biblia emonisi libala lokola eloko moko ya mabe te. Soki babalani basepeli kolekisa ntango mpo na kosala anivɛrsɛrɛ ya libala na bango mpo na kokanisa esengo ya libaku yango mpe kolendisa ekateli na bango ya kosala makasi mpo libala na bango elonga, wana ezali ekateli na bango moko. Nzokande, na oyo etali anivɛrsɛrɛ ya mokolo ya kobotama, Biblia elobeli bobele oyo ya bapakano, mpe emonisi makambo mabe oyo masalemaki na bafeti yango.​—15/10, nkasa 30, 31.

◻ Na lisese oyo Paulo asaleli na 1 Bakolinti 3:12, 13, “mɔ́tɔ” elimboli nini, mpe baklisto nyonso basengeli koyeba likambo nini?

Biso nyonso tokutanaka na mɔ́tɔ kati na bomoi na biso: komekama ya kondima na biso. (Yoane 15:20; Yakobo 1:2, 3) Biso nyonso tosengeli koyeba ete moto nyonso oyo tozali koteya ye akomekama. Soki tozali koteya malamu te, nsuka na yango ekoki kozala likama, ndenge Paulo akebisaki. (1 Bakolinti 3:15)—1/11, lokasa 11.

◻ Na ndimbola nini Noa ‘atambolaki elongo na Nzambe’? (Genese 6:9)

Noa atambolaki elongo na Nzambe na boye ete asalaki makambo oyo Nzambe atindaki ye asala. Lokola Noa amipesaki na kosala mokano ya Yehova, asalaki boninga makasi elongo na Nzambe.​—15/11, lokasa 10. ◻ Kozanga koyeba ntango ya sikisiki oyo Nzambe akoboma bato mabe epesi biso mabaku nini?

Yango ezali kopesa biso libaku ya komonisa ete tolingaka mpenza Yehova mpe tolingi kotambola na banzela na ye libela na libela. Lisusu ezali komonisa ete tozali sembo epai na Nzambe mpe totii motema na lolenge oyo asalaka misala na ye. Lisusu, ezali kosalisa biso na kosɛnzɛla mpe kolala mpɔngi te na elimo. (Matai 24:42-44)—15/11, lokasa 18.

◻ Kondimela “nkombo ya Mwana na Nzambe” elimboli nini?

(1 Yoane 5:13) Elimboli kotosa mibeko nyonso ya Klisto, bakisa mpe mobeko oyo elobi ete “bólingana kati na bino.” (Yoane 15:14, 17) Bolingo elukaka malamu ya basusu. Bolingo etalaka mposo te, lingomba te, to etɛlɛmɛlo ya moto na bomoi te.​—1/12, lokasa 7.

◻ Mpo na nini bato ‘bayinaka’ Batatoli ya Yehova?

(Matai 10:22) Batatoli ya Yehova bayinami bobele mpo na bantina oyo baklisto ya ekeke ya liboso banyokwamaki na yango. Ya liboso, bato mingi basepelaka te na ndenge oyo Batatoli ya Yehova batosaka bindimeli ya lingomba na bango. Ya mibale, bato mosusu bazali kokosela bango makambo—ekoki kozala lokuta mpenza to mpe kobongola mateya na bango.​—1/12, lokasa 14.