Tóyeba baninga na biso malamu

¹ Boyokani oyo tozali na yango elongo na baninga na biso baklisto esuki te bobele na likambo litali koyangana na makita elongo na bango, kasi esangisi makambo mingi. Tozali kosala engebene mokano ya Nzambe, yango ezali kopesa biso nzela ya kosala boyokani ya elimo elongo na Yesu. (Mko. 3:34, 35) Na eyango, kati na lisangá ya boklisto, tozali kosala boyokani ya libota elongo na bandeko na biso ya elimo, basi mpe mibali, oyo tosengeli kolinga. (Yoa. 13:35) Na bongo, baoyo basangani esika moko na “bana na ndako na Nzambe” basengeli kosala milende ya koyebana bamoko na basusu.​—Ef. 2:19.

² Tóyeba nkombo ya baninga na biso: Toyebaka nkombo ya ndeko mwasi moko na moko oyo basanganaka na etuluku na biso ya Boyekoli ya Mokanda? Na momeseno, etuluku wana ezalaka moke, yango ezali kopesa biso nzela ya koyeba kozanga nkaka nkombo ya bayangani mingi, to mpe ya bango nyonso. Soki toyebi mpenza nkombo na bango te, tokoki koloba solo ete toyebi baninga na biso malamu?

³ Ezali boni mpo na basusu, ezala mpe bana, baoyo bayanganaka na makita na Ndako ya Bokonzi? Ekoki kozala ete tomeseni kokende kotalaka bobele bamoko kati na baninga na biso. Atako yango ezali mabe te mpo na kosepela kozala ntango nyonso elongo na bamoko, tosengeli te kotya ndelo na bolingo na biso, soko mpe kozala na masolo ya kolendisa bobele na ndambo ya bato. Tosengeli ‘kozipola mitema na biso,’ na kosaláká milende mpo na koyeba bandeko na biso nyonso, mibali mpe basi. (2 Kol. 6:11-13) Ya solo, esengeli na biso koyeba nkombo na bango.

⁴ Bandeko mibali oyo batambwisaka makita ya lisangá basengeli kosala molende mpo na koyeba nkombo ya mosangani moko na moko. Soki mosangani moko na moko abyangami na nkombo na ye longwa na ebaelo, akozala na mayoki ete komantere na ye endimami. Bobele na libaku wana, yango ekosalisa basangani ya lisangá na koyebana nkombo kati na bango. Ya solo, ekozala ntango nyonso na bato ya sika to na bapaya kati na bayangani, mpe ekozala mpasi mpo na koyeba nkombo nyonso. Nzokande, na kosaláká milende ntango nyonso, tokolendisa baninga na biso mpe tokomonisa mpo na bango bosepeli ya solo.​—Lom. 1:11, 12.

⁵ Tózwa ekateli ya koyebana malamu: Mingimingi, bakɛngɛli-batamboli bayebaka nkombo ya bandeko mingi, basi mpe mibali. Ndenge nini basalaka mpo na koyeba yango? Na lolenge misato ekeseni: (1) basanganaka mbala na mbala na mosala ya kosakola elongo na bango; (2) engebene makoki na bango, bandimaka mabyangami ya bandeko mibali mpe ya bandeko basi mpe (3) na makita, bazwaka ekateli ya kopesa mbote ezala na mikóló to na bana.

⁶ Na lolenge moko to mosusu, tokoki kokolisa boninga na biso mpe koyeba malamumalamu baninga na biso, boye te? Ya solo, likoki ezali ya kobyanga bango ete tokende na bango elongo kati na mosala ya kosakola. Mosala ya kosakola ndako na ndako, bozongeli ya sika, boyekoli ya Biblia to litatoli na balabala na lisalisi ya bazulunalo ezali bongo myango oyo mibongi mpo na koyebana malamu. Na bantango mosusu, ezali mpe malamu kobyanga basusu epai na biso, ekoki kozala mpo na kolya elongo na bango. Na kozwáká ekateli ya komonisa bosepeli epai na bato ya sika to na baoyo bazalaka na ezaleli ya nsɔninsɔni, tokoki kosala mingi mpo na kolendisa bango na elimo, mpe tokomizwela na yango mbano monene.​—Mis. 20:35; 1 Tes. 5:11.

⁷ Paulo ayebaki baninga na ye malamu. Lokola alobeli mingi kati na bango na nkombo na bango mpenza kati na mikanda na ye, ezali elembeteli ya bosepeli mpe ya bolingo ya solo oyo azalaki na yango mpo na bango. (1 Tes. 2:17; 2 Tim. 4:19, 20) Milende oyo tozali kosala mpo na koyeba baninga na biso malamu, ekopesa biso nyonso matomba.