Na ndakisa, meká komanyola likoló na maloba ya ntoma Paulo kati na 2 Bakolinti 7:1: “Balingami, awa ezali biso na bilaka oyo, tómipɛtola na mbindo nyonso na nzoto mpe na [elimo, NW] mpe tókokisa ezaleli na biso na bulɛɛ kati na nsɔ́mɔ na Nkolo.” Kangá ntina ya maloba yango. Omituna yo moko, ‘Wapi “bilaka oyo” Paulo alobeli?’ Na kotángáká lisoló mobimba, okomona ete vɛrsɛ́ oyo ezali liboso elobi ete: “Yango wana, bóbima kati na bango, mpe bókabwana na bango. Nzambe alobi bongo. Bómama eloko na mbindo te, mpe boye nakoyamba bino. Nakozala tata epai na bino, mpe bino bokozala bana na ngai babali mpe bana na ngai basi. Nkolo-na-Nguya-Nyonso alobi bongo.”​—2 Bakolinti 6:17, 18.

Toli ya Paulo ya ‘komipɛtola na mbindo’ ekómi sikawa na nguya koleka! Lokola nguya oyo ezali kopusa biso na kosala yango, Nzambe alaki ‘koyamba biso,’ elingi koloba ete akobatela biso. Okoki komituna yo moko ete ‘nakoki kozala na boyokani ya pene elongo na ye​—lokola oyo ya mwana mobali to mwana mwasi elongo na tata na ye?’ Likanisi ya ‘koyambama’ to kolingama na Nzambe ya mayele mpe ya bolingo, ezali kosepelisa yo, boye te? Soki likanisi yango liyelaka yo te, talá lolenge batata ya bolingo bamonisaka yango epai ya bana na bango. Sikawa kanisá ete boyokani motindo yango ezali kati na yo mpe Yehova! Ntango ozali kokanisa yango mingi, mposa ya boyokani motindo wana ekokóla epai na yo.

Kasi simbá likambo oyo: Boyokani ya pene elongo na Nzambe ekoki kosalema bobele soki yo ‘okosimba eloko na mbindo te.’ Omituna yo moko ete: ‘Komela likaya ezali te kati na “biloko na mbindo” oyo Nzambe aboyi? Kosalela yango ekozala “mbindo na nzoto,” oyo ekomemela kolɔngɔ́nɔ́ ya nzoto na ngai lolenge nyonso ya makámá, boye te? Lokola Yehova azali Nzambe ya pɛto to ya “bulɛɛ,” akondima lolenge nazali komikómisa mbindo boye?’ (1 Petelo 1:15, 16) Simbá lisusu ete Paulo akebisi mpe na ‘mbindo ya elimo,’ to bopusi ya makanisi. Omituna ete: ‘Komibebisa yango ezali nde na bopusi na lolenge na ngai ya kokanisa? Nakokende nde mosika mpo na kokokisa mposa na ngai, kino mbala mosusu kotya kolɔngɔ́nɔ́ na ngai, libota na ngai, to ata etɛlɛmɛlo na ngai liboso na Nzambe na likámá? Kino wapi natiki nzela ete komela likaya ebebisa bomoi na ngai?’ Na kotaleláká mituna ya kobulunganisa motindo wana okoki mpenza kozwa mpiko ya kotika!

Liboso ete bábanda koyekola solo, babalani yango balónaki banzeté ya betel 1 300 na lopango na bango. Atako esengelaki mbula mitano liboso ete banzeté yango ekoka kokɔmɛla, na ntango yango elingaki kobanda kobota malamu, bakokaki kolikya kozwa dolare 77 000 na mbula. Wana eleko ya bobuki mbuma ya liboso ebɛlɛmaki, Monsieur mpe Madame Lin basengelaki kozwa ekateli monene. Basilaki koyeba na nzela ya boyekoli na bango ya Biblia ete baklisto basengeli komipɛtola “na mbindo nyonso na nzoto mpe na [elimo, NW]” na koboyáká kosalela, to kolendisa bizaleli ya mbindo lokola komela likaya, kosalela bilangwiseli, to kolya mbuma ya betel. (2 Bakolinti 7:1) Basengelaki kosala nini?

Na kopusama na lisosoli oyo litungisami, Monsieur Lin azwaki ekateli ya kotika koyekola. Bobele na ntango yango Madame Lin atɛkisaki mbuma ya betel oyo babukaki na banzeté mosusu ya kala kati na elanga na bango mpe azwaki mosolo dolare 3 000. Yango ezalaki sé elakiseli ya litomba oyo balingaki kozwa mosika te soki babateli banzeté na bango. Nzokande, Lisosoli ya Monsieur Lin elandaki kotungisa ye.

Abundaki na likambo yango kino mokolo moko, asɛngaki na Batatoli ya engumba na bango ete bákatela ye banzeté yango. Batatoli balimbwelaki ye ete yango ezalaki ekateli na ye moko; na yango, asengelaki ‘komema bozito na ye’ mpe asengelaki kokata banzeté na ye ye moko. (Bagalatia 6:4, 5) Balendisaki ye ete amikundola elaka ezali kati na 1 Bakolinti 10:13, oyo elobi ete: “Emekeli moko ekomeli bino te oyo ezangi epai na bato nyonso. Nzambe azali sembo; ye oyo akotika bino te ete bómekama na koleka nguya na bino, kasi esika moko na emekeli, akobongisa ekimelo ete bókoka koyika mpiko.” Lisusu, Batatoli batindaki ye na kokanisa, kolobáká ete: “Soki biso tokateli yo banzeté yango, okoki koyoka mawa mpo na yango mpe kotalela ete biso nde tobebisi banzeté yango.” Nsima ya mwa ntango, mokolo mosusu Madame Lin alamusamaki na makɛlɛlɛ ya mosumane (scie) ya kurá. Mobali na ye mpe bana bazalaki kokata banzeté ya betel!

Monsieur Lin amonaki ete Yehova azali sembo na elaka na Ye. Azwaki mosala oyo epesaki ye lisosoli ya pɛto, kopesáká ye likoki ya kokóma mosanzoli ya Yehova. Azwaki batisimo na liyangani ya zongazonga ya Batatoli ya Yehova na Apríli 1996.