Mopesi na “makabo nyonso malamu”

“Mokolo moko, moteyi moko ya Lingomba na Protestá ayaki kotala ngai. Alingaki koyeba lolenge nini nazalaki kotambwisa Lingomba na ngai. Nayebisaki ye ete: . . . ‘Topesaka lifuti te; eloko moko te oyo ekotinda bato na koswana. Tosengaka mabonza te.’ Atunaki ete: ‘Bozwaka mosolo ndenge nini?’ Nayanolaki ete: ‘Tala, Dr.​—, soki nayebisi yo bosolo ya likambo, okondima te. Wana bato bamonisi bosepeli mpo na nzela oyo, bazali komona te ete kitunga ya mabonza elekisami liboso na bango. Kasi bazali komona ete esengeli kobimisa mosolo. Bazali komilobela bango moko ete, “Ndako oyo ezali kosenga mosolo. . . . Lolenge nini nakoki kopesa mwa mosolo moke mpo na yango?”’ Atalaki ngai lokola nde alingaki koloba ete: ‘Okanisi ete nazali nani​—mwana moke?’ Nalobaki ete: ‘Tala, Dr.​—, nazali koyebisa yo polele. . . . Soki moto moko azwi mapamboli mpe azali na makoki, akolinga kosalela yango mpo na Nkolo. Soki azali na makoki te, mpo na nini tosengeli kopusa ye na kosala yango?’”

​—Charles T. Russell, prezidá wa yambo ya Watch Tower Society, “Mosenzeli” ya Yulí 15, 1915 (ebimeli ya Lingelesi).

TOZALI kopesa mpo ete Yehova Nzambe azalaki moto ya liboso na kopesa. Bokabi na ye ebandaki uta kalakala mpenza na kozalisama ya​—ekelamu na ye ya liboso mpenza, “Mwana se moko, na ye.” (Yoane 3:16, NW) Na bolingo, apesaki likabo ya bomoi epai na bikelamu mosusu.

Mwana na Nzambe, Yesu Klisto, azali likabo lileki monene ya Yehova mpo na biso. Kasi, Mwana na Nzambe azali ye moko nsuka ya bokabi na Nzambe te. “Ngolu na Nzambe oyo eleki monene” ezali oyo ntoma Paulo abéngi ete “likabo likoki kolobama te” ya Yehova. (2 Bakolinti 9:14, 15, NW) Ezali polele ete likabo wana esangisi liboke mobimba ya malamu mpe boboto oyo Nzambe apesi na libota na ye na nzela ya Yesu. Ngolu motindo yango ezali mpenza monene na boye ete eleki makoki na bato ya kolimbola to kolobela yango. Nzokande, bokabi na Nzambe bozali naino na makambo mosusu mingi kati na yango.

Esili koleka ntango molai, mokonzi moko amonisaki mayele mpe komikitisa wana andimaki ete biloko nyonso malamu apesaki lokola makabo bizalaki ya Yehova. Alobaki ete: “Nyonso na likoló mpe na nse ezali na yo. Bokonzi mpe ezali na yo, ɛ Yehova, mpe yo okokumisama nkolo likoló na nyonso. . . . Kasi ngai nazali nani mpe bato na ngai bazali nani ete tokoka kopesa yo eloko na mitema na lolenge oyo? Mpo ete biloko nyonso bikoutaka na yo mpe topesi yo bobele biloko na yo moko.”​—1 Ntango 29:11-14, NW.

Ndakisa ya Nzambe

Yakobo, moyekoli na Yesu Klisto, ayebaki ete Yehova Nzambe azalaki liziba na biloko nyonso oyo ezali malamu na makambo nyonso. Bobele makabo ya kokoka nde mautaka na ye. Yakobo akomaki ete: “Makabo nyonso malamu mpe mabongi makokitaka na nse longwa na Tata na moi. Ye azali na kobongwana te, akoyeisa ata molili moke mpe te.”​—Yakobo 1:17, NW.

Ata na likambo ya kopesa makabo, Yakobo amonaki ete Nzambe akeseni mpenza na bato. Bato bakoki kopesa makabo malamu, kasi basalaka ntango nyonso bongo te. Makabo yango makoki kopesama na mokano ya moimi, to makoki kosalelama mpo na komema moto moko ete asala likambo ya mabe. Epai na Yehova kobongwana ezali te; abongwanaka te. Na yango, motindo ya makabo na ye mobongwanaka te. Mazali ntango nyonso peto. Mazali ntango nyonso kotombola bolamu mpe esengo ya bato. Mazali ntango nyonso ya malamu, makosungaka, kasi makopesaka mpasi soko moke te.

Makambo mapusaka na kopesa makabo

Na mikolo ya Yakobo, bakonzi na mangomba oyo bazalaki na lokumu mingi bazalaki kopesa makabo liboso na bato nyonso bobele mpo bamona bango. Bapusamaki na mokano ya mabe. Lokola bazalaki koluka kokumisama na bato, bazalaki kobebisa mitinda na boyengebene oyo ebongaki ete balanda. Nzokande, baklisto basengelaki kokesena. Yesu apesaki bango toli ete: “Sɔkɔ okopɛsa makabo na mawa, oyula mondule liboso na yɔ tɛ lokola ekosalaka bakosi kati na biyanganelo mpe kati na njela ete bato bakumisa bango. Najali koloba na bino na sɔlɔ ete bajali na libonja na bango. Nde yɔ, wana ekopɛsa yɔ makabo na mawa tika tɛ ete lobɔkɔ na yɔ na mwasi loyeba yango ekosala lobɔkɔ na yɔ ya mobali ete likabo na yɔ na mawa lijala na nkuku. Mpe Tata na yɔ oyo akomɔnaka na nkuku akopɛsa yɔ.”​—Matai 6:2-4.

Ntina ya moklisto ya kopesa makabo ezali mpo na kokokisa mposa ya basusu to mpo na kosepelisa bango to mpo na kotombola matomba ya losambo ya solo. Ezali te mpo na komikumisa. Miso ya Yehova matalaka na mozindo kati na motema na biso. Akoki kotala mokano na biso ya mozindo oyo ezali kopusa biso na kopesa makabo ya mawa.

Batatoli ya Yehova bazali kosala makasi ete balanda ndakisa ya Yehova mpe ya Mwana na ye na likambo ya kopesa makabo. Bapesaka oyo bazali na yango. Bazali na nsango malamu ya Bokonzi, mpe bazali kopesa yango mpo na mapamboli ya bazalani na bango. Bayebi oyo Masese 3:9 (NW) elobi: “Kumisa Yehova na biloko na yo ya motuya, mpe na mbuma na liboso na bozwi na yo nyonso.” Mpo ete ba filiales nyonso, masangá nyonso, mpe baklisto nyonso bazali na mposa makasi ya kosala mpo na kopesa nzela na bolamu ya bato banso, lisangá mobimba ya bandeko lizali kokóma makasi na elimo mpe lizali na biloko mingi. Bozwi mingi ya mosuni ememaka te na bozwi ya elimo, kasi bozwi ya elimo ememaka biloko oyo ezali na ntina mpo na mosala ya Yehova.

Mitindo mikeseni ya kopesa makabo

Ezali na mitindo mikeseni oyo moto na moto akoki kopesa makabo mpo na kokólisa nsango malamu. Moko na yango etali Bandako ya Bokonzi (Salles du Royaume). Basangani nyonso ya lisangá basalelaka Ndako ya Bokonzi. Yango esengaka mosolo mpo na kotonga to kofutela, kofuta lotiliki, kotya masini ya kopesa mopepe mpe kobatela yango. Mpo ete ezali na ntina ete moto na moto asimba lisangá, basanduku ya makabo etyami kati na Bandako ya Bokonzi, mpe makabo ya bolingo malamu oyo mapesami mazali mpo kokokisa bamposa ya lisangá. Soki mosolo motikali, lisangá ekoki kozwa ekateli ya kotinda makabo na filiale ya Watch Tower oyo ezali na mboka na bino.

Makabo makoki kotindama na biro ya filiale ya Watch Tower mpo na kobongisa mpe kosunga bamisionere mpe babongisi-nzela monene (pionniers spéciaux) kati na biteni ya mokili epai bato mingi bayoki naino nsango malamu te. Mosolo mosusu mosengami mpo na kopalanganisa nsango malamu motali mosala ya bakɛngɛli-batámboli. Ntoma Paulo, oyo apesaki ndakisa kati na mosala ya mokɛngɛli-motámboli na ekeke ya liboso, akumisaki lisangá ya Filipi: “Botindi kosunga bosenga na ngai koleka mbala mɔkɔ.” (Bafilipi 4:14-16) Longola kobimisa mosolo mpo na mosala ya ntango nyonso, oyo ba filiales nyonso esalaka, esengeli mpe kobatela bandako ya Betele mpe baoyo bafandaka mpe basalaka kuna. Ya solo, kokoma mpe konyata mikanda oyo mizali na makambo kitoko ya nsango malamu ezali mabaku malamu mauti na Nzambe, kasi kokabola mikanda yango ezali mpe na ntina, nyonso wana ezali bongo kosenga mosolo. Lisusu, mosolo mosengami mpo na kobongisa mayangani, kozanga kolobela mosolo mobisami mpo na kobunda na bisambiselo mpo na ‘kokotela mpe kolóngisa nsango malamu engebene mibeko.’​—Bafilipi 1:7.

Ntango oyo mosaleli moko na moko ya Yehova azali kolekisa mpo na kosakola nsango malamu ezali ya bolingo malamu, mpe ezali lolenge moko mpo na mosolo oyo azali kopesa. Ntoma Paulo apesaki toli etali kobomba mosolo ntango nyonso mpo na kosunga bokóli ya losambo ya solo. “Mpo na kokongola makabo na ntina na babulami, . . . na mokolo ya liboso ya poso, moko na moko na bino abatela eloko kati na yango esili ye kozwa.”​—1 Bakolinti 16:1, 2, NW.

Wana moto moko apesi makabo, ntango nyonso ayebaka sikisiki te lolenge nini mosolo yango mokosalelama, kasi akomonaka matomba na yango kati na bokóli ya kosakolama ya Bokonzi. Mbándo (rapports) epesami kati na Annuaire des Témoins de Jéhovah 1993 emonisi ete nsango malamu ya Bokonzi ezali kosakolama kati na mikili mpe bisanga ya mai monene koleka 200, na basakoli baklisto koleka 4 500 000. Mbándo wana ezali ya kolendisa. Makabo nyonso, ya mingi to moke, mazali kosala mpo na bokóli ya nsango malamu na mokili mobimba.

Mosolo mpo na mosala yango mosimbami na bosangisi ya makabo mapesami na bato banso. Basusu bazali na makoki ya kopesa makabo mingi, oyo ezali kosunga mingi mosala ya kosakola. Basusu bakopesaka moke. Kasi baoyo bazali kopesa makabo moke basengeli koyoka nsoni te to kokanisa ete makabo na bango mazali moke mingi. Yehova azali mpenza na mayoki motindo wana te. Yesu amonisaki polele lolenge nini Yehova asepelaki na lomea ya mwasi-mokufeli-mobali. “Amɔnaki mpe mwasi mɔkɔ mobola, oyo akufeli mobali, kotia mea mibale wana, mpe alobaki ete: ‘Na sɔlɔ, nalobi na bino ete mwasi oyo mobola aleki bango yɔnsɔ na kopɛsa makabo, mpɔ ete baoyo yɔnsɔ batii mosɔlɔ molekaki na bango kati na makabo, nde mwasi oyo na kojanga na ye, atii yɔnsɔ ejalaki na ye mpɔ na kolia.’”​—Luka 21:2-4.

Ata bozwi na biso ezali mingi to moke, tokoki kopesa na motindo ya kosepelisa Yehova. Mokomi na Nzembo amonisaki malamu lolenge nini tokoki kopesa Mokonzi mpe Mosambisi na biso nkembo. Alobi ete: “Bopesa Yehova lokumu oyo ekoki na nkombo na ye; boya na likabo mpe bokota na lopango na ye.” (Nzembo 96:8, NW) Na yango, tika ete tomekola ndakisa ya bolingo ya Tata na biso ya likoló na kopesáká na esengo nyonso mpo ete ye moto ya liboso ya kopesa biso.

[Etanda na lokasa 30]

LOLENGE BASUSU BAZALI KOPESA MAKABO MPO NA MOSALA YA KOSAKOLA BOKONZI

◻ MAKABO MPO NA KOSIMBA MOSALA YA MOKILI MOBIMBA: Bandeko mingi bazali kobomba mwa mosolo to bazali kokotisa kati na ebongiseli na bango mwa mosolo oyo bazali kotya yango na sanduku ya makabo oyo ezali na likomi: “Makabo mpo na mosala ya la Société na mokili mobimba​—Matai 24:14.” Sanza nyonso, masangá mazali kotinda mbongo oyo ezwami na sanduku yango na biro ya la Société na Brooklyn, New York, to na biro ya filiale oyo ezali penepene.

◻ MAKABO: Makabo ya bolingo makoki kotindama mbala moko na Watch Tower Bible and Tract Society of Pennsylvania, 25 Columbia Heights, Brooklyn, New York 11201, to na filiale ya Watch Tower na mokili na bino. Okoki mpe kopesa biloko ya mpaúni to biloko mosusu ya motuya. Mokanda moko ya mokuse esengeli kokende nzela moko na makabo nyonso mpo na komonisa ete ezali makabo ya bolingo.

◻ MAKABO OYO MAKOKI KOZONGISAMA: Okoki kopesa Watch Tower Society mbongo, oyo ekoki kobatelama kino liwa ya mopesi, oyo akoki komibombela lotómo ya kozwa yango lisusu soki akómi na bosenga.

◻ ASSURANCE: Watch Tower Society akoki kofutamela assurance to kozwa litomba ya mosolo ya pension. Soki ezali bongo, ebongi koyebisa na la Société.

◻ MOSOLO NA BÁNKI: Na mikili misusu, nimero ya mituya ya mosolo na bánki, mosolo oyo mobombami mpe mosolo mobombami ya pension mokoki kofungwama mpo na Watch Tower Society, to kotyama na nkombo ya Watch Tower Society na kufa ya moto yango. Soki ezali bongo, ebongi koyebisa la Société.

◻ LOTÓMO YA MOSOLO: Lotómo ya mosolo ekoki kopesamela na Watch Tower Society na lolenge ya makabo ya libela to na kobateláká makoki ya kozwa mosolo yango naino ozali na bomoi.

◻ MAPANGO TO NDAKO: Mapango, ndako to biloko mosusu oyo ekoki kotekama ekoki kopesama na Watch Tower Society; mokabi akoki kopesa yango libela, to akoki kobatela lotómo ya kofanda kati na yango naino azali na bomoi. Liboso na kopesa biloko nyonso na la Société, esengeli koyebisa ye yango.

◻ MOKANDA YA KOPESA LIBULA: Biloko to ndako to mosolo ekoki kopesama na Watch Tower Bible and Tract Society of Pennsylvania na mokanda ya kozwa libula oyo mondimami na mibeko, to tokoki kopesa la Société lotómo ya kozwa biloko oyo totiki. Biloko oyo bitikami mpo na mangomba makokitisamaka mpako epai na ye oyo apesameli yango. Kopi moko ya mokanda ya kozwa libula to ya boyokani ya kozwa biloko esengeli kotindama na la Société.

Soki ozali na mituna to na mposa ya toli na likambo yango, komá na adresi oyo elandi: Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201, to na filiale ya la Société oyo ezali penepene na esika ofandi.

[Bililingi na lokasa 31]

Lolenge makabo na bino mazali kosalelama:

1. Basáli ya bolingo malamu ya Betele

2. Botongi ya babiro ya filiale

3. Lisungi na ntango ya mpasi

4. Bandako ya Bokonzi

5. Bamisionere