“Tiká liloba na bino ezala ntango nyonso . . . elɛngi na mungwa”
1. Kozala na maloba ya elɛngi lokola mungwa elimboli nini?
1 “Tiká liloba na bino ezala ntango nyonso kitoko, eyeisama elɛngi na mungwa, mpo na koyeba ndenge oyo bosengeli kopesa moto moko na moko eyano.” (Kols. 4:6) Kozala na maloba ya elɛngi lokola mungwa elimboli koyeba kopona maloba mpe koloba makambo oyo ekosepelisa bato oyo bazali koyoka yo. Yango ezali mpe na ntina mingi na mosala ya kosakola.
2. Nini esalisaki Yesu apesa mwasi Mosamalia litatoli?
2 Ndakisa ya Yesu: Ntango Yesu azalaki kopema pene na libulu ya mai, apesaki litatoli na mwasi moko Mosamalia oyo ayaki kotoka mai na libulu yango. Na lisolo na bango, mwasi yango alobelaki mbala na mbala makambo oyo emonisaki ete Bayuda ná Basamalia bazalaki koyokana te. Mwasi yango alobaki mpe ete Basamalia bazali bakitani ya Yakobo, nzokande Bayuda bazalaki kondima ata moke te ete Basamalia bautá mpe na libota ya Bayuda. Na esika ete Yesu akweisa makanisi na ye, ayebisaki ye nde makambo oyo elendisaki ye. Yango esalisaki Yesu apesa litatoli na mwasi yango mpe na mibali mosusu ya engumba.—Yoa. 4:7-15, 39.
3. Ndenge nini tokoki kolanda ndakisa ya Yesu ntango tozali kosakola?
3 Ntango tozali kosakola, tosengeli kobosanaka te ete mokano na biso ezali ya “kosakola nsango malamu ya makambo ya malamu.” (Lom. 10:15) Tosengeli koyebisa moto makanisi ya Biblia oyo ekosepelisa ye mpe ekolendisa ye, kasi te komonisa ye lokola nde toyaki kokweisa bindimeli na ye. Soki abimisi likanisi moko ya libunga, tosengeli te kosembola ye mbala moko. Na makanisi nyonso oyo abimisi, ezali ata na likanisi moko te ya malamu oyo ekoki kotinda biso tópesa ye longonya? Mbala mosusu, tokoki kaka kopesa ye vɛrsɛ mbala moko mpe kotuna ye boye: “Osilá kokanisa na likambo oyo?”
4. Tosengeli kosala nini soki moto oyo tozali kosolola na ye abimisi maloba ya kofinga?
4 Tokosala nini soki moto abimisi maloba ya kofinga to ya ntembe? Tosengeli kokoba kosolola na ye mpe kosalela ye makambo na boboto mpe na limemya. (2 Tim. 2:24, 25) Soki moto aboyi koyoka nsango malamu ya Bokonzi, ekozala malamu tósɛnga ye bolimbisi mpe tókata lisolo na mayele.—Mat. 7:6; 10:11-14.
5. Ndenge nini boboto ya ndeko mwasi moko ebimisaki mbuma malamu?
5 Mbuma malamu: Ndeko mwasi moko amekaki kopesa litatoli na mwasi moko ya kartye na bango, kasi mwasi yango asilikaki mbala moko mpe akómaki kofinga ye. Na boboto nyonso, ndeko mwasi yango ayebisaki ye boye: “Limbisá ngai; nayebaki te ete ekosilikisa yo. Otikala malamu.” Pɔsɔ mibale na nsima, mwasi yango ayaki na ndako ya ndeko mwasi, asɛngaki ye bolimbisi, mpe andimaki ete ndeko mwasi yango ateya ye. Mbala mingi, maloba ya malamu ebotaka mbuma malamu!—Mas. 15:1; 25:15.
6. Mpo na nini tosengeli kozalaka na maloba ya elɛngi ntango tozali kosakola?
6 Tosengeli kosala makasi tózalaka ntango nyonso na maloba ya elɛngi ntango tozali kosakola nsango malamu. Ata soki moto aboyi koyoka biso na mbala oyo, ntango mosusu akosepela koyoka Batatoli ya Yehova oyo bakotala ye mbala ya nsima.