Tosengeli kotinda mabondeli epai na Yesu?

BASUSU bakanisaka ete ebongi kotinda mabondeli epai na Yesu. Na Allemagne, wana bazalaki bana mike, bato mingi basilaki koteyama ete liboso ya kolya basengeli kokanga mabɔkɔ na bango mpe kopesa matɔ́ndi epai na Yesu Klisto.

Engebene Biblia, Yesu azali mpenza na etɛlɛmɛlo moko monene kuna na makoló. Nzokande, yango elimboli ete tosengeli kotinda mabondeli epai na ye? Okoki mbala mosusu kozala kati na baoyo, mpo na bolingo na bango epai na Yesu, bazali kotinda mabondeli na bango epai na ye, kasi Yesu ye moko akanisaka nini na ntina na mabondeli motindo wana?

Ya liboso, mpo na nini mituna oyo mibimi? Mpamba te Biblia elobi na ntina na Yehova Nzambe ete azali “Moyoki ya mabondeli.” Na yango, ezali likambo ya kokamwa te na komona ete basaleli ya Yehova ya ntango ya kala, na ndakisa, Bayisraele, bazalaki kobondela bobele Yehova Nzambe, Mozwi-na-Nguya-Nyonso.​—Nzembo 5:1, 2; 65:2, NW.

Makambo mabongwanaki ntango Yesu, Mwana na Nzambe, ayaki awa na mabelé mpo na kosikola bato longwa na lisumu mpe liwa? Te, mabondeli mazalaki kopesama bobele epai na Yehova. Na ntango azalaki awa na mabelé, Yesu ye moko azalaki mbala mingi kobondela tata na ye ya likoló, mpe ateyaki basusu ete básalaka bongo. Kanisá naino na ntina na libondeli ya ndakisa, oyo ebengamaka mbala mosusu ete Libondeli ya Nkolo to Tata wa biso, oyo ezali moko na mabondeli oyo eyebani malamu koleka kati na mokili mobimba. Yesu ateyaki biso te ete tótindaka mabondeli epai na ye; apesaki biso elakiseli oyo: “Tata na biso oyo ajali na Likolo, Nkombo na yɔ ejala mosanto.”​—Matai 6:6, 9; 26:39, 42.

Sikawa, tiká tótalela likambo yango na bozindo na kolukáká koyeba soki libondeli ezali mpenza nini.

Libondeli ezali nini?

Libondeli nyonso ezali lolenge moko ya losambo. Búku The World Book Encyclopedia endimi likambo yango, elobi ete: “Libondeli ezali lolenge moko ya losambo oyo kati na yango moto akoki komipesa, kozongisa matɔ́ndi, koyambola masumu, to kotinda malɔmbɔ epai na Nzambe.”

Na libaku moko, Yesu alobaki ete: “Esili kokomama ete, Okokumbamela Nkolo Njambe na yɔ, mpe okosalela bobɛlɛ ye [mosala na bulɛɛ, NW].” Yesu andimaki solo oyo ya moboko ete losambo​—mpe mabondeli⁠—​esengeli kopesama bobele epai na Tata na ye, Yehova Nzambe.​—Luka 4:8; 6:12.

Tóyebaka Yesu kati na mabondeli na biso

Yesu akufaki lokola mbeka ya lisiko mpo na bato, Nzambe asekwisaki ye, mpe atombolaki ye na etɛlɛmɛlo moko monene. Lokola okoki kokanisa yango, oyo nyonso ememaki mbongwana mpo na oyo etali mabondeli oyo makoki kondimama. Na ndimbola nini?

Ntoma Paulo alobeli bopusi makasi oyo etɛlɛmɛlo ya Yesu ezali na yango likoló na mabondeli, na maloba oyo: “Yango wana Njambe anɛtɔli ye mingi mpe apɛsi ye nkombo koleka nkombo mosusu yɔnsɔ, ete na nkombo na Yesu [mabɔlɔngɔ] yɔnsɔ makumbama, yango na Likolo mpe yango na mokili, mpe yango na nse na mokili, mpe ete ndemo yɔnsɔ iyambolaka ete YESU KLISTO YE NKOLO mpɔ na nkɛmbɔ na Njambe Tata.”​—Bafilipi 2:9-11.

Maloba “na nkombo na Yesu [mabɔlɔngɔ] yɔnsɔ makumbama” malimboli ete tosengeli kobondela ye? Te. Maloba ya Greke oyo malobelami awa “ezali komonisa nkombo oyo likoló na yango baoyo bazali kongumba mabɔlɔngɔ na bango bazali kokóma na bomoko, likoló na yango losambo nyonso (πᾶν γόνυ) ezali na bomoko.” (A Grammar of the Idiom of the New Testament, ya G. B. Winer) Ya solo, mpo ete libondeli lindimama, esengeli komonisama “na nkombo na Yesu,” nzokande, epesami epai na Yehova Nzambe mpe ezali mpo na kokumisa ye. Mpo na yango, Paulo alobi ete: “Kati na makambo yɔnsɔ tika ete bisengeli na bino biyebana epai na Njambe na mabɔndɛli mpe na malɔmbɔ.”​—Bafilipi 4:6.

Bobele lokola nzela ekomemaka moto kino na esika moko boye, bobele bongo Yesu azali “nzela” oyo ezali kokamba kino epai na Nzambe Mozwi-na-Nguya-Nyonso. Yesu ateyaki bantoma na ye ete: “Ngai najali njela mpe sɔlɔ mpe bomɔi. Moto akokoma epai na Tata tɛ sɔkɔ na njela na ngai tɛ.” (Yoane 14:6) Na yango, tosengeli kotinda mabondeli na biso epai na Nzambe na nzela ya Yesu, kasi tozali te kotinda yango epai na Yesu ye moko.a

Basusu bakoki kotuna ete: ‘Kasi, moyekoli na ye, Setefano mpe ntoma Yoane balobaki na Yesu kuna na likoló, boye te?’ Ezali bongo. Nzokande, makambo wana matalelaki mabondeli te, lokola Setefano mpe Yoane, moko na moko na bango amonaki Yesu kati na emonaneli mpe basololaki na ye moko mpenza. (Misala 7:56, 59; Emoniseli 1:17-19; 22:20) Omikundola na ntina na likambo oyo ete ata mpe bobele kosolola mpamba elongo na Nzambe ezali libondeli te. Adama mpe Eva basololaki na Nzambe, wana balukaki komilóngisa mpo na lisumu na bango monene, na ntango Ye asambisaki bango engebene lisumu na bango na Edene. Kosolola na bango elongo na ye na motindo wana ezalaki libondeli te. (Genese 3:8-19) Na yango, ekozala sembo te kotánga lisoló oyo Setefano mpe Yoane basololaki elongo na Yesu lokola elembeteli ete tosengeli mpenza kotinda mabondeli epai na ye.

Na ndimbola nini nkombo ya Yesu ‘ebelelami’?

Ozali na mwa ntembe, ozali bobele kokanisa ete ebongi kotinda mabondeli epai na Yesu? Mwasi moko akomaki na biro ya filiale ya la Société Watch Tower ete: “Na mawa nyonso, nandimisami naino te ete baklisto ya liboso babondelaki Yesu te.” Azalaki kokanisa na ntina na maloba ya Paulo oyo mazwami kati na 1 Bakɔlinti 1:2, epai kuna alobaki ete “bato yɔnsɔ baoyo bakobeelelaka nkombo na Nkolo na biso Yesu Klisto na bisika yɔnsɔ.” Nzokande, tosengeli koyeba ete na lokótá ya ebandeli, liloba “kobelela” ekoki kolimbola likambo mosusu, kasi bobele libondeli te.

Na ndimbola nini nkombo ya Yesu ‘ebelelamaki’ bipai binso? Moko na lolenge ya kosala bongo ezalaki oyo ete bayekoli ya Yesu ya Nazarete bandimaki ye polele lokola Masiya mpe “Mobikisi na mokili,” mpamba te basalaki bikamwiseli mingi na nkombo na ye. (1 Yoane 4:14; Misala 3:6; 19:5) Na yango, búku The Interpreter’s Bible elobi ete maloba “kobelela nkombo ya Nkolo na biso . . . elimboli koyambola bokonzi na ye, kasi elimboli te kosambela ye.”

Koyamba Klisto mpe kozala na kondima kati na makila na ye, oyo esali ete masumu mákoka kolimbisama, ezali mpe “kobelela nkombo ya Nkolo na biso, Yesu Klisto.” (Kokanisá Misala 10:43 mpe 22:16.) Mpe totángaka mpenza nkombo ya Yesu na ntango totindaka mabondeli epai na Nzambe na nzela na ye. Na yango, atako tomonisi ete tokoki kobelela nkombo ya Yesu, kasi Biblia eyebisi te ete tosengeli kotinda mabondeli epai na ye.​—Baefese 5:20; Bakolose 3:17.

Oyo Yesu akoki kosala mpo na biso

Na maloba ya polele, Yesu alakaki epai na bayekoli na ye ete: “Likambo nini likolɔmba bino na nkombo na ngai, ngai nakosala yango.” Yango ezali kosɛnga ete tótinda mabondeli na biso epai na ye? Te. Lilɔmbɔ litindami epai na Yehova​—kasi na nkombo ya Yesu. (Yoane 14:13, 14; 15:16) Tosɛngaka epai na Nzambe ete Mwana na Ye, Yesu, ásalela nguya na ye mpe bokonzi na ye mpo na bolamu na biso.

Lolenge nini Yesu asololaka na bayekoli na ye ya solo lelo oyo? Maloba ya Paulo na ntina na lisangá ya baklisto bapakolami ekoki kozala lokola elakiseli. Akokanisaki yango na nzoto mpe akokanisaki Yesu Klisto na motó. “Motó” ekokisaka bamposa ya biteni mosusu ya nzoto ya elimo na lisalisi ya “matonga mpe bikanganeli,” to banzela mpe bibongiseli ya kopesa lisangá na ye bilei ya elimo mpe litambwisi. (Bakɔlɔsɛ 2:19) Bobele bongo mpe, Yesu azali kosalela “makabo na motindo na bato,” to mibali oyo babongisami malamu na elimo, kokamba lisangá, to kosembola soki yango esengeli. Ezali na ebongiseli moko te oyo ezali kopesa nzela na basangani ya lisangá ete básololaka na Yesu to bátindaka mabondeli epai na ye, kasi basengeli nde​—ee, basengeli mpenza​—kotinda mabondeli epai na Tata na Yesu, Yehova Nzambe.​—Baefese 4:8-12.

Lolenge nini tokoki kokumisa Yesu?

Oyo nde mokumba monene Yesu azali na yango mpo na oyo etali lobiko ya bato! Ntoma Petelo alobaki ete: “Lobiko mpe ejali na moto mosusu tɛ, mpɔ ete nkombo mosusu tɛ esili kopɛsama awa na nse kati na bato ete tókoka kobika mpɔ na yango.” (Misala 4:12) Oyebi malamu bonene ya nkombo ya Yesu?

Kozanga kotinda mabondeli epai na Yesu elimboli te ete tozali kotyola etɛlɛmɛlo na ye. Nzokande, Yesu azali kokumisama na ntango tozali kobondela na nkombo na ye. Lokola bana oyo bakumisaka baboti na bango na kozaláká na botosi, tozali kokumisa Yesu Klisto na kotosáká malako na ye, mingimingi lilako ya sika, kolingana moko na mosusu.​—Yoane 5:23; 13:34.

Mabondeli oyo makoki kondimama

Olingi kopesa mabondeli oyo makoki kondimama? Na yango, tindá yango epai na Yehova Nzambe, mpe salá yango na nkombo ya Mwana na ye Yesu. Luká koyeba mokano ya Nzambe, mpe tiká ete mabondeli na bino mámonisa boyebi yango. (1 Yoane 3:21, 22; 5:14) Zwá nguya kati na maloba oyo mazwami na Njembo 66:20: “Masanjoli epai na Njambe, oyo aboyi libɔndɛli na ngai tɛ mpe alongoli boboto na ye epai na ngai tɛ.”

Lokola tosili komona yango, mabondeli ezali lolenge moko ya losambo oyo esengeli kopesama bobele epai na Nzambe Mozwi-na-Nguya-Nyonso. Na kotindáká mabondeli na biso nyonso epai na Yehova Nzambe, tozali komonisa ete tosimbi malamu toli ya Yesu, ya kobondela ete: “Tata na biso oyo ajali na Likolo.”​—Matai 6:9.

[Maloba na nse ya lokasa]