Mituna na batangi

◼ Jéhovah Nzambe azalaki ye moko kosolola na Adam to ezalaki nde na nzela ya Liloba, Mwana na ye bobele moko moko?

Biblia ezali koyanola polele mpenza te na motuna oyo. Nzambe akokaki ye moko kosolola na Adam, mwana na ye oyo ezakaki moto na kokoka, na Eden, kasi emonani ete azalaki kosolola elongo na ye na nzela ya Liloba.

Mbala mingi, Biblia ezali koloba ete Nzambe asalaki makambo mosusu na mabaku oyo, na solo mpenza, azalaki kosala yango na nzela ya anzelu moko to baanzelu ebele. Na ndakisa tozali kotanga na Genese 1:1 ete: “Na ebandeli Nzambe azalisaki likoló mpe mabele.” Soko wana ekokaki kozala nyonso oyo Biblia elobaki mpo na ebandeli na molongo, tokokaki kosukisa ete Nzambe azalisaki yango ye moko, lokola nde na maboko na ye moko. Kasi Makomami ya boklisto na greke mazali kopesa biso bosikisiki oyo bolandi: ’’Na nzela na ye (Mwana na Nzambe) biloko nyonso bizalisamaki, biloko na likolo mpe biloko na mabelé, biloko bikomonanaka mpe biloko bizangi komonana . . . . Biloko nyonso bizalisamaki na nzela na ye mpe mpo na ye.’’ (Bakolose 1:16, 17). Mikapo mosusu mizali kondimisa ete Mwana azalaki na mokumba kati na kozalisama na molongo. (Yoane 1:3,10; Baebele 1:1, 2). Nzokande, mokumba yango ezalaki ya mosali oyo alandi Jéhovah, ye oyo azali mobandisi to nkolo mosala na kozalisama, mpe liziba na nguya oyo kozalisama ezalaki na yango mposa.​—Nzembo 19:1.

Nzambe alobaki na moto ya liboso ete: “Yo okoki kolya mbuma na nzete nyonso na elanga.” (Genese 2:16, 17) Jéhovah azalaki na mpo sa te ya appareil mecanique moko to électronique na ndakisa, to eloko oyo ekoki komema mongongo to radio te. Mosenzeli ya le ler Aout 1989 (n 15/89) elobaki mpo na yango ete: ‘(moto) azalaki komona te oyo azalaki koloba. Mongongo ezalaki kouta na efandelo ezangi komonana mpe ezalaki koloba na ye. Ezalaki mongongo ya Mozalisi na ye, mongongo na Oyo akelaki ye. . . .(Moto) azalaki na mposa ya radio te, lokola bazali kosala yango na mikolo na biso, mpo na koyoka mongongo na Nzambe. Nzambe asololaki na ye kozanga ete asalela eloko mosusu.”

Nzambe asololaki na Adam na nzela ya anzelu moko, mbala mosusu Logos, oyo akómaki Yesu? Ekoki kozala bongo. Na kozalaka na bokatikati, charles Russell akomaki: “Kati na elanga na Eden. mbala mosusu Yesu azalaki Momonisi na Nzambe epai na Adam.“ (La Tour de Garde. ler Février 1915 ebimeli ya Lingelesi). Ntango molai Mwana ya liboso na Nzambe azalaki na mosala monene oyo ya “Liloba”, to Momemi na nsango, ya Tata na ye epai na baanzelu mpe bato. (Yoane 1:1; 12:49, 50. Emoniseli 1:1, 2). Na yango, ata soko lisolo na Genese ezali kopesa likanisi ete Nzambe asololaki ye moko na Adam na eleko oyo Adam azalaki bobele ye moko, yango elongoli te likoki oyo ete Nzambe asalaki yango na nzela ya anzelu moko, ata mpe Liloba, Mwana na ye na Likolo. Ekoki kozala bongo, mpamba te na ebandeli Jehovah asalelaki Logos mpo na kozalisa moto mpe esengo na ye (Logos) ezalaki kati na bana na bato’.​—Masese 8:22, 31; Yoane 1:3.

Totalela na ndakisa likambo oyo lisalemaki ntango Moise abutaki na ngomba Sinai. Tozali kotanga na Exode 19:21-24 ete: ”Jéhovah alobelaki Moise ete . . . Mpe Moise alobelaki Jehovah ete . . . Kasi Jehovah alobelaki ye ete.’‘ Mpe lisolo ya bopesi na Mibeko Zomi ebandi na maloba oyo: “Nzambe alobaki maloba oyo nyonso.” (Exode 20:1). Ba versets oyo ezali te komonisa ete Nzambe ye moko nde alobaki mpo na Mibeko? Likanisi yango ekoki lisusu kolendisama ntango tozali kotanga ete Nzambe asololaki na Moise ”boye na miso na ye”.​—Exode 33:11.

Kasi engengiseli mosusu epesamelaki biso na ntina na likambo yango. Ntoma Paulo akomaki mpo na Mibeko ete: “Epesamaki na baanzelu, na maboko na moyokanisi.” (Bagalatia 3:19). Nsima lisusu, akesenisaki na lolenge ya sikisiki mitinda oyo Nzambe apesaki kati na Mibeko na oyo baklisto bazwaki na nzela na Yesu‘ “Soko liloba lisakolami na minoko na baanzelu ebongaki mpe mabunga nyonso mpe kozanga botosi nyonso ezwaki etumbu . . . tokokima boni soko tokotyola lobiko monene boye, oyo esakolamaki liboso na Nkolo na biso (Yesu) mpe elendisami mpo na biso na bango bayokaki yango?’ (Baebele 2:2, 3). Na yango, Nzambe alobaki mpo na Mibeko na mongongo na ye moko te, asalelaki mpe Logos te. kasi aponaki kosalela baanzelu mosusu.

Eloko nini tosengeli kosimba na nyonso wana? Ntango tozali kotanga ete Nzambe asololaki na bato, tozali komona ete mbala mingi asalaki yango na nzela na bikelamu na elimu ya botosi oyo balobaki mpo na ye. (Tala Genese 18:2, 3, 33; 19:1; Exode 3:2-4; Basambisi 6:11. 12, 20-22). Mpo ete Yesu abengami Liloba, tokoki kokanisa solo ete Nzambe asalelaki ye mingi mpo na kosolola na bikelamu na ye mosusu. Ezalaki bongo elongo na Adam, mwana na kokoka na Nzambe? Ekokaki mpenza kozala bongo.​—Luka 3:38.

Na nsima lisusu, ezali solo ete, ntango Logos azalaki na mabelé, na mbala misato Tala alobaki polele mpo ete ye “Adam na nsuka’’ akoka koyoka ye. (1 Bakolinti 15:45;Matai 3:16, 17;17:1-5;Yoane 12:28-30). Na mabaku oyo, mpo na nini Nzambe akokaki kosolola na Mwana na ye oyo alingi mingi, to kosolola mpo na ye, na nzela na anzelu moko? Ebongi mpenza na kokanisa ete ezali Jéhovah ye moko nde alobaki: Mwana na ye na kokoka, mpe ata bato na kozanga kokoka baoyo bazalaki wana, bayokaki mongongo na Nzambe ye moko. Nsima na kozalisa Adam, Tala oyo azalaki na bolingo mingi epai na ekelamu na kokoka, akokaki kosolola elongo na ye kozanga kosalela ekelamu mosusu. Nzokande, na kotalela nyonso oyo touti komona. ekoki mpenza kozala ete asalelaki Liloba.