Tikalá ngwi lokola nde ozali komona ye oyo amonanaka te!
“[Mose] atikalaki ngwi lokola nde azali komona ye oyo amonanaka te.”—BAEBELE 11:27, NW.
1. Na Lisolo na ye Likoló ya Ngomba, likambo nini ya kokamwa Yesu alobaki na ntina na Nzambe?
YEHOVA azali Nzambe oyo amonanaka te. Ntango Mose asɛngaki ete amona nkembo na Ye, Yehova alobaki na ye ete: “Okoki kotala elongi na ngai te, mpo ete moto akotala ngai mpe kobika te.” (Exode 33:20) Ntoma Yoane mpe akomaki ete: “Moto ata moko te amoni Nzambe.” (Yoane 1:18) Ata Yesu Klisto ye moko, ntango azalaki moto awa na mabele, akokaki komona Nzambe te. Kasi, na Lisolo na ye Likoló ya Ngomba, Yesu alobaki boye: “Mapamboli epai na bapɛtwi na motema, zambi bakomona Nzambe.” (Matai 5:8) Maloba wana ya Yesu elimboli nini?
2. Mpo na nini tokoki komona Nzambe na miso boye te?
2 Makomami ezali komonisa ete Yehova azali Elimo, amonanaka te. (Yoane 4:24; Bakolose 1:15; 1 Timote 1:17) Na ndenge yango, Yesu alingaki koloba te ete bato bakoki mpenza komona Yehova na miso boye. Ezali solo ete baklisto oyo bapakolami na elimo, nsima ya kosekwa na bango mpe kozwa nzoto ya elimo, bakomona Yehova Nzambe kuna na likoló. Kasi “bapɛtwi na motema” oyo bazali na elikya ya kozwa bomoi ya seko awa na mabele bakoki mpe “komona” Nzambe. Na ndenge nini?
3. Ndenge nini bato bakoki kososola bizaleli mosusu ya Nzambe?
3 Ntango tozali kotalela malamumalamu biloko oyo Yehova akelá, biloko yango eteyaka biso makambo mingi na ntina na ye. Na ndenge yango, tokoki kokamwa na nguya na ye mpe kondima ete azali Nzambe Mozalisi. (Baebele 11:3; Emoniseli 4:11) Mpo na yango, ntoma Paulo akomaki boye: “Longwa na ntango wana ezalisaki ye mokili, makambo ya [Nzambe] mazangi komonana, yango nguya na ye ya seko mpe bonzambe na ye, asili koyebisa yango polele epai na makanisi ya bato kati na misala na ye.” (Baloma 1:20) Na bongo, komona Nzambe oyo Yesu alobelaki elimboli mpe kososola bizaleli mosusu ya Yehova. Komona yango ezali na nzela ya boyebi ya solosolo mpe emonanaka na ndenge ya elimo na ‘miso ya motema.’ (Baefese 1:18) Maloba ya Yesu mpe misala na ye ezali mpe koteya biso makambo mingi mpo na Nzambe. Yango wana, Yesu alobaki ete: “Ye oyo amoni ngai asili komona Tata.” (Yoane 14:9) Yesu amonisaki malamumalamu mpenza ndenge Yehova azali. Na bongo, koyeba bomoi ya Yesu mpe mateya na ye ekoki kosalisa biso na komona, to kososola, bizaleli mosusu ya Nzambe.
Kososola makambo ya elimo ezali na ntina mingi
4. Nini ezali komonisa lelo oyo ete bato balingi makambo ya elimo te?
4 Lelo oyo, bato mingi te bazali na kondima mpe bazali mpenza bato ya elimo. Paulo alobaki ete: “Bato nyonso bazali na kondima te.” (2 Batesaloniki 3:2) Bato mingi bamipesi mobimba na makambo na bango moko mpe bazali na kondima ata moke te epai ya Nzambe. Masumu oyo bamipesi na yango mpe ezaleli na bango ya kozanga kotyela makambo ya elimo likebi ezali kokanga bango miso ya bososoli, mpamba te, ntoma Yoane akomaki ete: “Ye oyo azali kosala mabe amoni Nzambe te.” (3 Yoane 11, NW) Lokola bato yango bamonaka Nzambe na miso te, bazali kosala makambo lokola nde ye mpe azali komona bango te. (Ezekiele 9:9) Lokola bato yango bazali kotyola makambo ya elimo, bakoki mpe kozwa “boyebi ya Nzambe” te. (Masese 2:5) Yango wana mpenza, Paulo akomaki ete: “Moto ya mosuni akoki koyamba makambo ya elimo ya Nzambe te, mpo ete mazali na ye bolema; akoki koyeba yango te zambi [elimo, NW] ekososola yango.”—1 Bakolinti 2:14.
5. Likambo nini bato ya elimo bayebaka?
5 Nzokande, soki tozali bato ya elimo, tokobosana ata na ngonga moko te ete, atako Yehova azali Nzambe oyo amipesaka te na kolandela mbemba nyonso ya mikemike oyo tosalaka, kasi ayebaka ntango oyo tosali likambo na makanisi mpe na bamposa ya mabe. Ya solo, “nzela ya moto izali liboso ya miso ya [Yehova] mpe ye akobanza mpo na bilekelo na ye nyonso.” (Masese 5:21) Soki tokwei na lisumu, tosengeli kobongola motema mpe kosɛnga Yehova bolimbisi, mpamba te tolingaka ye mpe tolingaka te koyokisa ye mawa.—Nzembo 78:41; 130:3.
Nini esalisaka biso tótikala ngwi?
6. Kotikala ngwi elimboli nini?
6 Atako biso tomonaka Yehova na miso te, tóbosanaka ata moke te ete ye amonaka biso. Soki tozali kobosana te ete ye azali mpe tozali na kondima ete azali pene ya baoyo nyonso babelelaka ye, tokotikala ngwi, elingi koloba ete tokotɛngatɛnga te mpo na kozala sembo epai na ye. (Nzembo 145:18) Tokoki kozala lokola Mose, moto oyo Paulo akomaki na ntina na ye ete: “Mpo na kondima, atikaki Ezipito, abangaki nkanda na mokonzi te, zambi [atikalaki ngwi lokola nde azalaki komona Ye oyo amonanaka te, NW].”—Baebele 11:27.
7, 8. Epai wapi Mose azwaki mpiko ya koloba liboso ya Falo?
7 Mpo na kokokisa mokumba oyo Nzambe apesaki ye ya kolongola Bayisalaele na boombo na Ezipito, mbala mingi Mose azalaki kokende kokutana na Falo, mokonzi ya makambo makasi, na ndako na ye oyo etondaki na bato minene ya lingomba mpe bakonzi minene ya basoda. Na ntembe te, bifelo ya ndako ya mokonzi etondaki na bikeko. Kasi Mose, atako azalaki komona Yehova na miso te, ayebaki ete azali; azalaki te lokola bikeko nyonso oyo ezalaki komonisa banzambe ya Ezipito, banzambe oyo bazalaki na bomoi te. Yango wana mpenza Mose azalaki kobanga Falo te!
8 Epai wapi Mose azwaki mpiko ya kokutana mbala na mbala na Falo? Makomami elobi na biso ete “moto yango Mose azalaki na bopɔlɔ mingi, na koleka bato nyonso bazalaki na nse.” (Mituya 12:3) Emonani polele ete elimo na ye ezalaki malamu mpe andimaki ete Nzambe azalaki na ye elongo mpe apesaki Mose mpiko oyo azalaki na yango mposa mpo na kozala momonisi na ‘Ye oyo amonanaka te’ liboso ya mokonzi mabe ya Ezipito. Bato oyo bazali “komona” Nzambe oyo amonanaka te bazali kosala makambo nini mpo na komonisa kondima na bango epai na ye lelo oyo?
9. Eloko nini oyo ekoki kosalisa biso tótikala ngwi?
9 Tokoki komonisa kondima mpe kotikala ngwi lokola nde tozali komona Ye oyo amonanaka te soki tozali kosakola na molende ata soki bazali konyokola biso. Yesu akebisaki bayekoli na ye ete: “Bato nyonso bakoyina bino mpo na nkombo na ngai.” (Luka 21:17) Alobaki na bango lisusu ete: “Moombo aleki nkolo na ye te. Soko basili konyokola ngai, bakonyokola bino lokola.” (Yoane 15:20) Se ndenge Yesu alobaki yango, kaka nsima ya liwa na ye, bayekoli na ye banyokwamaki; bazalaki kokanela bango, kokanga bango mpe kobɛta bango. (Misala 4:1-3, 18-21; 5:17, 18, 40) Atako minyoko engalaki, bantoma mpe bayekoli mosusu ya Yesu bakobaki kosakola nsango malamu na mpiko.—Misala 4:29-31.
10. Ndenge nini elikya oyo tozali na yango ete Yehova abatelaka mpe asungaka biso esalisaka biso na mosala ya kosakola?
10 Lokola Mose, bayekoli ya liboso ya Yesu bazalaki kobanga banguna na bango te oyo bazalaki komona na miso. Bayekoli ya Yesu bazalaki na kondima epai ya Nzambe, mpe yango esalisaki bango báyikela minyoko oyo bakutanaki na yango mpiko. Ya solo, batikalaki ngwi lokola nde bazalaki komona Ye oyo amonanaka te. Lelo oyo, lokola toyebi ete Yehova azali kosunga mpe kobatela biso, yango elendisaka biso mpenza, epesaka biso mpiko mpe elongolaka biso kobanga na mosala na biso ya kosakola Bokonzi. Liloba ya Nzambe elobi ete “kobanga bato ekoyeisa motambo; nde oyo akotalela [Yehova] akotombolama.” (Masese 29:25) Yango wana, tózongaka nsima te mpo na kobanga minyoko; tóyokelaka mpe mosala na biso nsɔni te. Kondima na biso etindaka biso tótatola na molende nyonso epai ya baninga na biso ya kartye, ya mosala, ya kelasi mpe epai ya bato mosusu.—Baloma 1:14-16.
Nzambe oyo amonanaka te azali kotambwisa basaleli na ye
11. Na kotalela maloba ya Petelo na Yuda, ndenge nini bato mosusu oyo bazalaki na lisangá ya boklisto bamonisaki ete bazalaki bato ya elimo te?
11 Kondima esalisaka biso tómona ete Yehova nde moto atambwisaka ebongiseli na ye awa na mabele. Yango wana, toboyaka kotɔngatɔnga bato oyo bazali na mikumba na kati ya lisangá. Ntoma Petelo na Yuda, ndeko ya Yesu, bakebisaki na ntina na bato mosusu oyo bazalaki bato ya elimo te; bato yango bazalaki koloba mabe mpo na baoyo bazalaki kotambwisa makambo na kati ya baklisto. (2 Petelo 2:9-12, NW; Yuda 8, NW) Bato yango oyo bazalaki komona kaka mabe, bakokaki koloba ndenge wana na miso ya Yehova soki bamonaki ye? Te! Kasi, lokola Nzambe amonanaka te, bato yango oyo bazangi elimo babosanaki ete bakozongisa monɔkɔ epai na ye.
12. Ndenge nini tosengeli kotalelaka baoyo bazali kokamba lisangá?
12 Ya solo, bato oyo bazali na lisangá ya boklisto bazali bato ya kozanga kokoka. Ntango mosusu, bankulutu basalaka mabunga oyo ekoki mpe kopesa biso mpasi. Atako bongo, Yehova azali kosalela bato yango lokola babateli ya mpate ya etonga na ye. (1 Petelo 5:1, 2) Bato ya elimo bayebaka ete yango ezali lolenge moko oyo Yehova azali kotambwisa basaleli na ye. Yango wana, biso baklisto toboyaka elimo ya kotɔnga mpe komilelalela mpe tozalaka na limemya na bibongiseli ya Teokrasi oyo Nzambe atii. Ntango tozali kotosa baoyo bazali kokamba biso, tozali komonisa ete tozali komona Ye oyo amonanaka te.—Baebele 13:17.
Tótalela Nzambe lokola molakisi na biso Monene
13, 14. Kotalela Yehova lokola Molakisi Monene elimboli nini mpo na yo?
13 Ezali mpe na likambo mosusu oyo ezali kosɛnga bososoli ya elimo. Yisaya asakolaki ete: “Miso na yo ekozala mpenza miso oyo ezali komona Molakisi na yo Monene.” (Yisaya 30:20, NW) Moto asengeli kozala na kondima mpo na kotalela ete Yehova nde azali koteya biso na nzela ya ebongiseli na ye awa na mabele. (Matai 24:45-47) Kotalela Nzambe lokola Molakisi na biso Monene elimboli kaka te kozala na mimeseno malamu ya koyekola Biblia mpe koyanganaka na makita. Elimboli kozwa litomba mingi koleka na bibongiseli ya elimo oyo Nzambe azali kozwa. Na ndakisa, tosengeli kotya likebi mingi koleka na ndenge oyo Yehova azali kotambwisa biso na nzela ya Yesu mpo tópɛngwa te na elimo.—Baebele 2:1.
14 Esɛngaka ntango mosusu molende mingi mpenza mpo na kozwa litomba mingi koleka na bilei ya elimo. Na ndakisa, tokoki kokóma na ezaleli ya kotánga likolólikoló masolo mosusu ya Biblia oyo tomonaka ete ezali mpasi mpo na kokanga ntina na yango. Na ntango tozali kotánga Linɔ́ngi ya Mosɛnzɛli mpe Lamuká!, ntango mosusu tolekaka masolo mosusu mpo makambo oyo ezali kolobela esepelisi biso te. To mpe, ntango tozali na makita ya lisangá, tokoki kotika ete makanisi na biso eyengayenga. Nzokande, tokolala mpɔngi te na elimo soki tozali kokanisa malamu makambo oyo ezali kolobama. Soki tozali na botɔndi mingi mpo na mateya ya elimo oyo tozali kozwa, ekomonisa ete tozali kondima ete Yehova azali Molakisi na biso Monene.
Tokozongisa monɔkɔ liboso ya Nzambe
15. Ndenge nini bato mosusu basalaki lokola nde Yehova azalaki komona bango te?
15 Lokola mabe ekómi mingi na “ntango [oyo] ya nsuka,” ezali mpenza na ntina tózala na kondima epai na Ye oyo amonanaka te. (Danyele 12:4) Kozanga bosembo, pite na ekobo epalangani mingi. Ekozala mpenza malamu tóbosanaka te ete Yehova amonaka makambo oyo tosalaka ata soki bato bazali na makoki ya komona biso te. Bato mosusu babosani ete ezalaka bongo. Ntango bazali na esika oyo bato mosusu bazali komona bango te, bakoki kosala makambo oyo Makomami eboyi. Na ndakisa, bato mosusu bakokaki kokanga motema te na mposa ya kotala masano ya mabe to bafilme oyo ezali kolakisa bato bazali bolumbu na nzela ya Internet, na televizyo to na ndenge mosusu. Lokola moto akoki komipesa na makambo wana ntango azali ye moko, bato mosusu basalaki lokola nde Yehova azalaki komona bango te.
16. Nini esengeli kosalisa biso na kotosa mibeko ya Yehova oyo eleki nyonso?
16 Tosengeli te kobosanaka maloba ya ntoma Paulo ete: “Moko moko na biso akozongisa monɔkɔ mpo na ye moko epai ya Nzambe.” (Baloma 14:12, NW) Tosengeli kobosanaka te ete ntango nyonso oyo tosali lisumu yango, tosaleli nde Yehova lisumu. Soki tozali kobosana yango te, ekosalisa biso tólanda mitinda na ye oyo eleki nyonso mpe tóboya etamboli ya mabe. Biblia elobi na biso ete: “Eloko moko ezali te oyo ebombami liboso na ye, kasi nyonso ezali bolumbu mpe emonisami polele na miso na ye oyo azali na biso na makambo.” (Baebele 4:13) Ya solo, tokozongisa monɔkɔ liboso ya Nzambe, kasi ezali nde bolingo ya mozindo oyo tozali na yango mpo na Yehova nde ntina mpenzampenza oyo tosalaka mokano na ye mpe totosaka mibeko na ye ya sembo. Yango wana, tóyebaka kozwa bikateli ya malamu na makambo lokola kopona masano mpe ndenge na biso ya kozala na moto nyonso oyo azali mobali to mwasi na biso te.
17. Makanisi ya Yehova ezalaka nini ntango atalaka biso?
17 Ya solo, Yehova amibanzabanzaka mpo na biso mpenza, kasi yango elingi koloba te ete azelaka ete tósala mabunga mpo apesa biso etumbu. Kutu, atalaka biso na bolingo lokola tata oyo azali na mposa ya kopesa bana na ye ya botosi mbano. Ezali mpenza libɔndisi lokola toyebi ete Tata na biso ya likoló asepelaka na kondima na biso mpe “apesaka lifuta na baoyo bazali koluka ye”! (Baebele 11:6, Boyokani ya Sika) Tiká ete tózalaka na kondima makasi epai ya Yehova mpe ‘tósalela ye na motema mobimba.’—1 Ntango 28:9.
18. Lokola Yehova atalaka biso mpe amonaka bosembo na biso, Makomami endimisi biso nini?
18 Masese 15:3 elobi ete: “Miso na [Yehova] izali na bipai nyonso, kotalaka [bato, NW] mabe mpe [bato, NW] malamu.” Ya solo, Nzambe atalaka bato mabe mpe asalelaka bango makambo na kolanda etamboli na bango. Nzokande, soki tozali na kati ya “bato malamu,” tóyeba ete Yehova azali komona bosembo na biso. Kondima na biso elendisamaka mpenza na koyeba ete ‘kati na Nkolo mosala na biso ezali mpamba te’ mpe ete ye oyo amonanaka te ‘akobosana te mosala na biso mpe bolingo oyo tomonisaka mpo na nkombo na ye’!—1 Bakolinti 15:58; Baebele 6:10.
Tósɛnga Yehova ete atalela biso malamumalamu
19. Tángá mwa matomba ya kozala na kondima makasi epai ya Yehova.
19 Na miso ya Yehova, biso basaleli na ye ya sembo tozali na motuya mingi. (Matai 10:29-31) Atako amonanaka te, tokoki komona mpenza ete azali solo, mpe tokoki kopesa motuya mingi na boyokani na biso na ye. Soki tozali kotalela Tata na biso ya likoló ndenge wana, tokozwa matomba mingi. Kondima makasi na biso esalisaka biso na kozala na motema ya pɛto mpe na lisosoli malamu liboso ya Yehova. Kondima oyo ezangi bokosi epekisaka biso tózala bato oyo bazali lokolo moko na kati lokolo mosusu na libándá. (1 Timote 1:5, 18, 19) Kondima na biso makasi epai ya Nzambe ezali kopesa ndakisa malamu mpe ekoki komema litomba epai ya baoyo tofandaka na bango esika moko. (1 Timote 4:12) Longola yango, kondima ya ndenge wana elendisaka etamboli oyo esepelisaka motema ya Yehova.—Masese 27:11.
20, 21. (a) Mpo na nini ezali malamu ete Yehova atalaka biso? (b) Ndenge nini biso moko tokoki kosalela maloba oyo ezali na Nzembo 139:23, 24 ?
20 Soki tozali mpenza na mayele, tosengeli kosepela ete ntango nyonso Yehova atalaka biso malamumalamu. Tozali koluka kaka te ete amonaka biso, kasi tolingi mpe ete aluka koyeba makanisi mpe misala na biso nyonso. Ntango tozali kobondela, ezali malamu tóyebisaka Yehova atalaka kati na biso mpe aluka soki tozali na bamposa ya mabe. Akoki kosalisa biso tólonga mikakatano na biso mpe tóbongisa bisika nyonso oyo esɛngi tóbongisa. Mokomi ya nzembo ayembaki malamu mpenza ete: “Meká ngai, ɛ Nzambe, mpe yebá motema na ngai; sosolá ngai mpe yebá kobanza na ngai. Talá soko nazali kotambola na nzela mabe, mpe kambá ngai na nzela ya seko.”—Nzembo 139:23, 24.
21 Davidi asɛngaki Yehova ete aluka epai na ye mpo na kotala soki “nzela mabe” ezalaki kati na ye. Lokola mokomi ya nzembo, mposa na biso ezali ete Nzambe atala na mitema na biso mpe aluka soki tozali na bamposa ya mabe, boye te? Na bongo, na kondima, tósɛnga Yehova ete atala biso. Bongo soki motema na biso ezali kotungisama na ntina na libunga to likambo moko ya mabe? Soki ezali bongo, tóbondela ntango nyonso Yehova, Nzambe na biso ya bolingo, mpe tólanda nzela oyo elimo santu na ye ezali kolakisa biso mpe tótosa toli ya Liloba na ye. Tokoki kozala na elikya ete akosunga biso mpe akosalisa biso tólanda nzela oyo ekomema biso na bomoi ya seko.—Nzembo 40:11-13.
22. Tosengeli kozala na ekateli nini na ntina na Ye oyo amonanaka te?
22 Ya solo, Yehova akopesa biso bomoi ya seko soki tozali kokokisa masɛngami na ye. Mpo na yango, tosengeli kondima nguya mpe bokonzi na ye, ndenge ntoma Paulo asalaki ntango akomaki ete: “Epai na mokonzi ya seko, ye Nzambe bobele moko oyo akokufa te oyo mpe akomonanaka te, lokumu ezala mpe nkembo libela na libela, Amen.” (1 Timote 1:17) Tiká ete biso mpe tózala na limemya motindo wana epai ya Yehova. Mpe ata soki tokutani na likambo nini, tólɛmba te na ekateli na biso ya kotikala ngwi lokola nde tozali komona Ye oyo amonanaka te.
Okopesa eyano nini?
• Ndenge nini bato bakoki komona Nzambe?
• Soki tondimaka mpenza ete Yehova azali, tokosala ndenge nini ntango bazali konyokola biso?
• Kotalela Yehova lokola Molakisi na biso Monene elimboli nini?
• Mpo na nini tosengeli kozala na mposa ete Yehova atalela biso malamumalamu?
[Elilingi na lokasa 18]
Mose abangaki nkanda ya Falo te, asalaki lokola nde azalaki komona Yehova, Nzambe oyo amonanaka te
[Elilingi na lokasa 21]
Tósalaka makambo te lokola nde Yehova akoki te komona yango te
[Elilingi na lokasa 23]
Tolukaka na etingya mpenza boyebi ya Nzambe mpamba te totalelaka ye lokola Molakisi na biso Monene