Bwanya mpo na lolemo

‘SOKI nakokaka ata kozongisa maloba na ngai!’ Osilá koloba ndenge wana? Ya solo, biso nyonso tozalaka na mokakatano mpo na kopekisa lolemo na biso. Biblia elobi ete tokoki kosala ete nyama nyonso etosa biso, “kasi moto moko te akoki kosala ete lolemo etosa ye.” (Yakobo 3:7, 8) Na yango, tosengeli nde kotika kaka mpe koloba ete tokokoka te kopekisa yango? Te! Tótalela mwa mitinda ya Biblia oyo ekoki kosalisa biso tókoka kopekisa enama wana ya nzoto na biso oyo ezali moke kasi ezali na nguya mingi.

● “Na ebele ya maloba, makambo ya kobuka mibeko ezangaka te, kasi ye oyo apekisaka mbɛbu na ye azali kosala na mayele.” (Masese 10:19) Soki tozali koloba mingi, tokomitya mingi na likama ya kobimisa maloba ya bozoba mpe ya kozokisa. Kutu, lolemo oyo epekisami te ezali lokola mɔtɔ, epanzaka noki bilobaloba mpe matɔngi ya mabe. (Yakobo 3:5, 6) Nzokande, soki tozali ‘kopekisa mbɛbu na biso,’ to kokanisa liboso ya koloba, tokoyeba ndenge maloba na biso ekoki kosala na nsima. Na ndenge yango, tokoyebana ete tozali bato ya mayele, mpe bato bakomemya biso mpe bakotyela biso motema.

● ‘Osengeli koyokaka noki, kowelaka koloba te, koyokaka nkanda noki te.’ (Yakobo 1:19) Bato basepelaka soki tozali koyoka makambo oyo bazali koloba, mpo na ndenge wana tozali komonisa kaka te ete tosepelaka na bango kasi mpe ete tozali komemya bango. Kasi, okosala nini soki moto moko alobi eloko moko oyo ezokisi yo to epesi yo nkanda? Na ntango wana tosengeli kosala makasi mpo ‘tóyoka nkanda noki te’ mpe tóyanola lokola ye te. Nani ayebi soki moto yango azalaki kotungisama na likambo moko boye mpe akoki kosɛnga bolimbisi mpo na liloba ya mabe oyo abimisaki? Omonaka ete ezali mpasi “koyokaka nkanda noki te”? Boye bondelá Yehova asalisa yo ozala na komipekisa. Akoboya te koyoka libondeli na yo oyo osali na motema mobimba.​—Luka 11:13.

● “Lolemo ya boboto ekoki kobuka mokuwa.” (Masese 25:15) Na bokeseni na makanisi ya bato mingi, boboto ezali na nguya. Na ndakisa, eyano ya boboto ekoki kolonga botɛmɛli oyo emonani ete ezali makasi lokola mokuwa, mbala mosusu mpo na nkanda to mpo bazali kokanisela biso mabe. Ezali solo ete komonisa boboto ezali mpenza mokakatano, mingimingi soki likambo moko epesi yo nkanda. Na yango, kanisá matomba oyo okozwa soki osali makambo oyo Biblia elobi mpe mbuma oyo okoki kobuka soki osali yango te.

Mitinda ya Biblia ezali mpenza “bwanya oyo euti na likoló.” (Yakobo 3:17) Soki tosaleli bwanya wana na lolemo na biso, maloba na biso ekopesa basusu lokumu, ekosepelisa bato, mpe ekolendisa bango. Ezali lokola “bapɔme ya wolo na kati ya eloko ya mayemi ya palata” na ntango na yango mpenza.​—Masese 25:11.