LITEYA 28
Monisá botɔndi mpo na oyo Yehova ná Yesu basalelá yo
Oyokaka ndenge nini soki moninga moko akabeli yo eloko moko ya kitoko? Na ntembe te, oyokaka esengo mpe ozalaka na mposa ya komonisa moninga yango ete osepeli na eloko yango. Yehova ná Yesu bapesá biso likabo moko ya monene oyo eleki makabo nyonso. Likabo yango nini, mpe tokoki kosala nini mpo na komonisa ete tozali na botɔndi mpo na yango?
1. Ndenge nini tokoki komonisa ete tozali na botɔndi mpo na oyo Yehova ná Yesu basalelá biso?
Biblia elobi ete “moto nyonso oyo akomonisa kondima epai na ye” [Yesu] akoki kozwa bomoi ya seko. (Yoane 3:16) Kondimela Yesu elakisi nini? Esuki kaka te na kozala na kondima epai na ye. Tosengeli mpe komonisa kondima na makambo oyo toponaka mpe oyo tosalaka. (Yakobo 2:17) Ntango tozali komonisa kondima na makambo oyo tosalaka mpe oyo tolobaka, boninga na biso ná Yesu mpe Tata na ye, Yehova ekómaka makasi.—Tángá Yoane 14:21.
2. Molulu nini ya ntina mingi esalisaka biso tómonisa botɔndi mpo na oyo Yehova ná Yesu basalelá biso?
Na mpokwa ya nsuka liboso Yesu akufa, ayebisaki bayekoli na ye eloko bakoki kosala mpo na komonisa botɔndi na mbeka na ye. Asalaki molulu moko ya ntina mingi oyo Biblia ebengi “Bilei ya mpokwa ya Nkolo,” ebengamaka mpe Ekaniseli ya liwa ya Yesu. (1 Bakorinti 11:20) Yesu asalaki yango mpo alingaki ete bantoma na ye mpe bakristo nyonso ya solo bábosanaka te ete apesá bomoi na ye mpo na bango. Mpo na molulu yango, Yesu apesaki mobeko ete: “Bókoba kosala boye mpo na kokanisa ngai.” (Luka 22:19) Soki oyangani na Ekaniseli, okomonisa ete ozali na botɔndi mpo na bolingo mingi oyo Yehova ná Yesu bazali na yango mpo na biso.
KƆTÁ NA MOZINDO
Luká koyeba makambo mosusu mpo na komonisa botɔndi na bolingo monene oyo Yehova ná Yesu bamoniselaki biso. Luká koyeba mpe mpo na nini Ekaniseli ya liwa ya Yesu ezali mpenza na ntina.
3. Tokoki kosala nini mpo na komonisa ete tozali na botɔndi?
Kanisá ete olingaki kozinda na mai, kasi moto moko ayei kobikisa yo. Okobosana likambo moto yango asali kaka boye? To okoluka nde komonisela ye botɔndi mpo na oyo asali?
Ndenge apesaki mwana na ye lokola mbeka, Yehova abikisaki biso na liwa. Tángá 1 Yoane 4:8-10, mpe na nsima yanolá na mituna oyo:
Mpo na nini mbeka ya Yesu ezali likabo oyo eleki makabo nyonso?
Oyokaka ndenge nini mpo na oyo Yehova ná Yesu basalelá yo?
Ndenge nini okoki komonisa botɔndi mpo na yango? Tángá 2 Bakorinti 5:15 mpe 1 Yoane 4:11; 5:3. Nsima ya kotánga vɛrsɛ mokomoko, yanolá na motuna oyo:
Na kotalela bavɛrsɛ oyo, tokoki kosala nini mpo na komonisa ete tozali na botɔndi?
4. Mekolá Yesu
Ndenge mosusu ya komonisa ete tozali na botɔndi ezali ya komekola Yesu. Tángá 1 Petro 2:21, mpe na nsima yanolá na motuna oyo:
Ndenge nini okoki kolanda matambe ya Yesu malamumalamu?
Yesu alingaki Liloba ya Nzambe, asakolaki nsango malamu mpe asalisaki basusu
5. Yanganáká na Ekaniseli ya liwa ya Kristo
Mpo na koyeba makambo oyo esalemaki na molulu ya liboso ya Bilei ya mpokwa ya Nkolo, tángá Luka 22:14, 19, 20. Na nsima yanolá na mituna oyo:
Makambo nini esalemaki na molulu ya Bilei ya mpokwa ya Nkolo?
Limpa mpe vinyo elakisi nini?—Talá vɛrsɛ 19 mpe 20.
Yesu alingaki ete bayekoli na ye básalaka Ekaniseli ya liwa na ye mbala moko na mbula na dati oyo akufaki. Yango wana, Batatoli ya Yehova bayanganaka mbula na mbula mpo na kokanisa liwa ya Kristo ndenge asɛngaki bango básala. Mpo na koyeba makambo mosusu oyo etali likita yango ya ntina mingi, talá VIDEO. Mpe na nsima yanolá na motuna oyo elandi.
Makambo nini esalemaka na Ekaniseli?
Limpa mpe vinyo elakisi nini? Limpa elakisi nzoto ya kokoka ya Yesu oyo apesaki yango mbeka mpo na biso. Vinyo elakisi makila na ye
SOKI MOTO ALOBI NA YO: “Mpo obika osengeli kaka kondimela Yesu.”
Ndenge nini okoki kosalela Yoane 3:16 mpe Yakobo 2:17 mpo na komonisa ete esengeli mpe kosala makambo mosusu?
NA MOKUSE
Tokomonisa ete tozali na botɔndi mpo na oyo Yesu asalelá biso soki tondimeli ye mpe tozali koyangana na Ekaniseli ya liwa na ye.
Bozongeli
Kondimela Yesu elakisi nini?
Okoki kosala nini mpo na komonisa botɔndi na oyo Yehova ná Yesu basalelá yo?
Mpo na nini ezali na ntina mingi koyangana na Ekaniseli ya liwa ya Kristo?
MAKANISI MOSUSU
Liwa ya Kristo etindi yo osala nini?
Luká koyeba makambo mosusu etali kondima mpe oyo okoki kosala mpo na komonisa ete ozali na kondima.
“Monisá kondima na bilaka ya Yehova” (Linɔ́ngi ya Mosɛnzɛli ya 10/2016)
Tángá lisolo “Nakómi na bomoi ya malamu mpe ya esengo,” mpo na komona ndenge bomoi ya mwasi moko ebongwanaki ntango ayebaki malamumalamu bolamu oyo mbeka ya Kristo ememeli ye.
“Biblia ebongolaka bato” (Linɔ́ngi ya Mosɛnzɛli ya 01/08/2011)
Talá ntina oyo bato moke kaka nde balyaka limpa mpe bamɛlaka vinyo na Ekaniseli.