Mituna ya batángi

Ntango ntoma Yoane akomaki ete “bolingo ya kokoka ebwakaka nde kobanga libándá,” alingaki koloba nini na maloba “bolingo ya kokoka,” mpe kobanga nini ebwakamaka libándá?

Ntoma Yoane akomaki ete “na kati ya bolingo kobanga ezalaka te,” kasi “bolingo ya kokoka ebwakaka nde kobanga libándá, mpamba te kobanga etyaka na nkaka. Ya solo, moto oyo azali na kati ya kobanga akómisami te moto ya kokoka na kati ya bolingo.”​—1 Yoane 4:18.

Lisolo mobimba ezali komonisa ete Yoane azalaki kolobela likambo ya kozala na elobeli ya polele​—mingimingi boyokani oyo ezali kati na bolingo ya Nzambe mpe elobeli ya polele liboso na Ye. Tokoki komona boyokani yango ntango tozali kotánga vɛrsɛ 17 oyo elobi ete: “Bolingo ekómi ya kokoka epai na biso na ndenge oyo, ete biso tózala na elobeli ya polele na mokolo ya lisambisi.” Soki moto alingaka mpenza Nzambe mpe amonaka bolingo ya Nzambe na bomoi na ye, yango ekomonana na elobeli na ye ya polele ntango azali kobondela Nzambe.

Maloba “bolingo ya kokoka” ezali na ndimbola mingi. Na Biblia, liloba “kokoka” elimbolaka mbala nyonso te kozala ata na mbeba moko te, kasi mbala mingi elimbolaka oyo ezali ndambo te. Na ndakisa, na Lisolo Likoló ya Ngomba, Yesu alobaki ete: “Bosengeli kozala bato ya kokoka, ndenge Tata na bino ya likoló azali moto ya kokoka.” Yesu azalaki koyebisa bayekoli na ye ete soki bazali kolinga kaka baoyo balingaka bango, bolingo na bango ekozala ya kokoka te. Mpo bolingo na bango ezala ya kokoka, to ezala ndambo te, basengelaki kolinga mpe banguna na bango. Ndenge moko mpe, ntango Yoane asalelaki maloba “bolingo ya kokoka,” azalaki kolobela kolinga Nzambe na motema mobimba, na makambo nyonso ya bomoi na ye.​—Matai 5:46-48; 19:20, 21.

Ntango moklisto azali kobondela Nzambe, ayebaka malamu ete azali moto ya masumu mpe ya kozanga kokoka. Nzokande, soki bolingo na ye mpo na Nzambe ezali ya kokoka mpe soki ayebi ete Nzambe alingaka ye mpenza, akobanga te ete Nzambe akopesa ye etumbu to akoboya ye. Akozala nde na elobeli ya polele mpo na koyebisa Nzambe makambo nyonso oyo azali na yango na motema na ye mpe akosɛnga bolimbisi ya masumu na nzela ya mbeka ya lisiko oyo, na bolingo nyonso, Nzambe abongisi na nzela ya Yesu Klisto. Akozala mpenza na kondima ete Nzambe akoyoka mabondeli na ye.

Ndenge nini moto akoki ‘kokómisama moto ya kokoka na kati ya bolingo’ mpe na bongo, ‘kobwaka libándá’ nsɔmɔ ya kozwa etumbu to koboyama? Ntoma Yoane alobaki boye: “Moto nyonso oyo azali kotosa liloba na ye [Nzambe], ya solo mpenza na kati ya moto wana bolingo ya Nzambe ekómi ya kokoka.” (1 Yoane 2:5) Kanisá naino: Soki Nzambe alingaki biso ntango tozalaki naino bato ya masumu, okanisi te ete akolinga biso lisusu mingi koleka soki tobongoli mpenza mitema mpe ‘totosi’ na molende nyonso “liloba na ye”? (Baloma 5:8; 1 Yoane 4:10) Ya solo, soki totikali sembo, tokozala na elikya ndenge moko na oyo ntoma Paulo azalaki na yango ntango alobaki mpo na Nzambe boye: “Moto oyo abombaki kutu te Mwana na ye moko kasi akabaki ye mpo na biso nyonso, mpo na nini akopesa biso mpe te elongo na ye biloko mosusu nyonso na boboto mpenza?”​—Baloma 8:32.