Mokapo 1

Emoniseli—Tozali na esengo na komona kokokana na yango!

 1. Ndenge nini toyebi ete Nzambe alingi komona biso tozala na esengo?

EMONISELI NA YOANE—mokanda oyo ya kokamwa kati na Biblia esukisi mokano na Nzambe na esengo nyonso. “Esengo” mpo na nini? Mpamba te Mobandisi na Biblia abengami “Nzambe na esengo,” ye oyo apesi “nsango malamu na nkembo” epai na baoyo balingaka ye. Alingi ete biso mpe tozala na esengo. Yango wana mokanda na Emoniseli ebandi na maloba oyo: “Esengo na motangi . . . na maloba na kosakola oyo.” Mpe esuki na maloba oyo: “Esengo na oyo akotosa maloba na kosakola oyo.”—1 Timote 1:11; Emoniseli 1:3; 22:7.

 2. Tokoki kosala nini mpo na kozwa bolamu na nzela na mokanda na Emoniseli?

² Ndenge nini tokoki kozwa bolamu na nzela na mokanda na Emoniseli? Na kotyaka mayele na biso nyonso ete toyeba ndimbola na bilembo na yango, mpe kotosa makambo mazali kati na yango. Na mokanda yango, tokoyekola motindo nini mokili oyo ekosuka, ntango Nzambe mpe Yesu Klisto bakoboma biloko mabe ya ntango oyo mpe kotya na esika na yango “biloko ya sika mpe mabelé ya sika,” epai kuna ata “kufa ekozala lisusu te.” (Emoniseli 21:1, 4) Biso banso tolingi kofanda na mokili wana, epai kimya ekozala, boye te? Tokokoka kokota na mokili yango soki tolendisi kondima na biso na nzela na boyekoli ya Liloba na Nzambe kati na yango tokokuta mokanda na Emoniseli, esakweli oyo na kokamwa.

Apokalipse ezali nini?

 3. Mpo na bato mingi, maloba Apokalipse mpe Armagedon elimboli nini?

³ Mokanda na Emoniseli ebengamaka mpe Apokalipse. Liloba “emoniseli” ebongolami uta na liloba ya Lifalanse “révélation” mpe yango moko ezali libongoli na liloba na greke apokalupsis. Mingi bakanisaka ete Apokalipse ekozala nsuka ya molongo na nzela na etumba ya nikleere. Na mboka moko ya Texas epai bazalaki kosala ebele ya ba bombe nikleere, bato oyo basambelaka bazalaki na momeseno ya koloba: “Tokozala bato ya liboso na kokufa.” Ezali kolobama ete bakonzi na mangomba na eteni wana na mokili, “bandimi ete Armagedon ekoki kopengolama te, nde koleka esili kobelema penepene, mpe etumba ya nsuka kati na mabe mpe malamu, kati na Nzambe mpe Satana, ekozala etumba ya nikleere oyo ekoboma bato mingi.”a

 4. Nzokande liloba “apokalipse” mpenza elimboli nini, mpe mpo na nini mokanda ya nsuka ya Biblia ebengami ete “Emoniseli”?

⁴ Kasi Apokalipse mpenza ezali nini? Diksionere ezali kolimbola yango ete ezali “mobulungano moko makasi ekobima na biloko na mokili mosika te.” Nzokande liloba ya greke apokalupsis ezali nde na likanisi ya “koyeba mabombami” to “kobimisa mabombami polele.” Ntina wana mokanda ya nsuka kati na Biblia ebengami ete “Emoniseli.” Tokokuta kuna bobele makambo matali nsuka na molongo te, kasi makambo mingi na solo mauti na Nzambe, oyo ntina na yango ezali ya kolamusa kati na motema na biso elikya mpenza mpe kondima makasi.

 5. (a) Nani akobomama na Armagedon, mpe nani akobika? (b) Bolamu nini ezali kozela baoyo bakobika na Armagedon?

⁵ Ya solo, mokanda ya nsuka ya Biblia elobeli Armagedon ete ezali “etumba na mokolo monene na Nzambe Mozwi-na-Nguya-nyonso.” (Emoniseli 16:14, 16) Kasi etumba yango ekozala lokola etumba ya nikleere te. Mpamba te, etumba ya nikleere ekoki kosilisa bato nyonso awa na mokili. Nzokande, Liloba na Nzambe elobi polele ete bobele bato mabe, banguna na Nzambe, bango nde bakobomama, mpe akotinda baanzelu mpo na kosala mosala yango. (Nzembo 37:9, 10; 145:20) Ebele monene na bato bauti na mabota nyonso bakobika na Armagedon ntango Nzambe akoboma bato mabe. Nsima na yango Klisto akobatela bato yango mpe akokamba bango na bomoi ya seko kati na Paradis na mabelé. Olingi kozala moko na bango? Mokanda na Emoniseli elakisi ete ezali likambo likoki kosalema!—Emoniseli 7:9, 14, 17.

Mabombami na Nzambe mamonisami

 6. Mikanda nini Batatoli ya Yehova basila kobimisa mpo na kolimbola Emoniseli?

⁶ Uta 1917, Batatoli ya Yehova babimisaki mokanda Le mystère accompli, oyo ezalaki kolimbola verset mokomoko ya mokanda ya Ezekiele mpe ya mokanda ya Emoniseli. Na nsima, wana makambo mazalaki kobima kati na mokili mazalaki komonisa kokokana na bisakweli na Biblia, babimisaki lisusu, na 1930, mokanda Lumière, volume mibale oyo ezongelaki kolimbola Emoniseli. Lokola kongenga ezalaki se kobakisama mpo na bayengebene, Batatoli ya Yehova babimisaki na 1963 mokanda ya nkasa 704 na motó na likambo “Babilone la Grande est tombée!” Le Royaume de Dieu a commencé son règne! Mokanda yango elimbolaki makambo nyonso matali kokola mpe kokwea ya Babilone Monene, lisangá ya mangomba ya lokuta na mokili mobimba, mpe eteni ya nsuka ya mokanda yango ezali kolimbola na lolenge kitoko mikapo libwa ya nsuka ya Emoniseli. Wana ‘nzela na bayengebene ezalaki se kongenga ntango nyonso,’ mingimingi na makambo matalaki mosala kati na masangá, Batatoli ya Yehova babimisaki na 1969 mokanda ya nkasa 414 na motó na likambo “Alors sera consommé le mystère de Dieu,” bolimboli ya mikapo 13 ya liboso ya Emoniseli.—Nzembo 97:11; Masese 4:18.

 7. (a) Mpo na nini Batatoli ya Yehova babimisi mokanda oyo likoló na Emoniseli? (b) Eloko nini ekosalisa batangi ya mokanda oyo na makambo matali mateya?

⁷ Mpo na nini mokanda mosusu ebimisamaki mpo na kolimbola Emoniseli mpe mpo na nini tonyati lisusu mokanda yango? Mikanda oyo mibimisamaki liboso mizali na makambo mingi oyo likoki ezalaki te ya kobongola yango na minoko mingi. Ntina wana tozwi mokano ya kobimisa mokanda se moko likoló na Emoniseli mpe na lolenge oyo ekoki kobongolama na minoko mingi. Epai mosusu, tosaleli libaku malamu oyo mpo na kobongisa lisusu mateya yango na nzela na bililingi, batablo mpe barezimé, oyo ekosalisa batangi na kososola malamumalamu ntina nyonso na esakweli oyo ya kokamwa.

 8. Ntina ya liboso mpenza ya kobimisa mokanda oyo ezali nini?

⁸ Nzokande ntina ya liboso mpenza ya kobimisa mokanda oyo ezali mpo na kolanda solo ndenge ekoli na mikolo na biso. Jéhovah azali ntango nyonso kongengisa Liloba na ye; mpo na yango, ntembe ezali te ete bososoli na biso na mokanda na Emoniseli, mpe na bisakweli mosusu, ekobakisama koleka, awa ezali biso kobelema na bolozi monene. (Matai 24:21; Emoniseli 7:14) Ebongi ete tolakisama malamu. Na ntina yango, tala makambo makomaki ntoma Petelo mpo na oyo etali bisakweli ya Nzambe: “Bokosala malamu kotia mitema na yango, [liloba na esakweli] lokola na mwinda oyo ezali kopela na esika na molili mabe, kino ekotana ntongo mpe monzoto na ntongo ekobima na mitema na bino.”—2 Petelo 1:19.

 9. (a) Nzambe akozalisa nini, engebene Emoniseli mpe bisakweli mosusu? (b) Mokili ya sika ezali nini mpe ndenge nini tokoki kobika mpo na kokota na yango?

⁹ Emoniseli ebakisi litatoli na yango na ebele na bisakweli mosusu bizwami na Biblia, komonisaka ete Jéhovah Nzambe akani kozalisa makolo ya sika mpe mabelé ya sika. (Yisaya 65:17; 66:22; 2 Petelo 3:13; Emoniseli 21:1-5) Makambo makomami kati na yango matali mingimingi baklisto bapakolami oyo Yesu asombaki bango na makila na ye mpo ete bazala mikonzi elongo na ye kati na makóló ya sika. ( Emoniseli 5:9, 10) Kasi nsango malamu oyo ekolendisa mpe kondima ya bamilió ya bato oyo bazali koluka kozala na bomoi ya seko na nse na Bokonzi na Klisto. Ozali moko na bango? Soki ezali boye, Emoniseli ekokolisa elikya na yo ya kozala na bomoi kati na Paradis, kozala mosangani na mabelé ya sika, epai kuna okokoka kosepela na kimya mingi, na nzoto kolongono mpe na bolamu mingi oyo Nzambe akopesa. (Nzembo 37:11, 29, 34; 72:1, 7, 8, 16) Olingi kobika mpe kokota na mokili wana ya sika? Na bongo sala noki, ee, koumela te mpo na kotya likebi na makambo oyo Emoniseli ezali koloba na ntina na eleko oyo esili kobelema, epai makambo nyonso makokokana.—Sofoni 2:3; Yoane 13:17.

[Maloba na nse ya lokasa]

[Elilingi na lokasa mobimba 7]