Mituna ya batángi

“Etumba . . . ya Nzambe Mozwi-ya-Nguya-Nyonso” na Hala–Magedona ezali nini, mpe nini ekoya na nsima?​—Emoniseli 16:14, 16.

Na mokuse, etumba ya Hala-Magedona ezali etumba oyo ekosalema na mokili mobimba, ntango Yesu Klisto, Mokonzi oyo Yehova atyá, akoboma banguna ya Nzambe. Biblia elobi ete “maloba mapemami na bademo” ezali koyanganisa banguna yango, “bakonzi ya mabelé mobimba oyo efandami . . . mpo na etumba ya mokolo monene ya Nzambe mozwi-ya-Nguya-Nyonso . . . na esika oyo ebengami na Liebele ete Hala-Magedona.”​—Emoniseli 16:14, 16.

Esika oyo etumba yango ekozala ezali esika ya elilingi. Nkombo Hala-Magedona, oyo Babiblia mosusu ebongoli na Armagedon to Alamakɛndɔ, elimboli Ngomba ya Megido. (Emoniseli 16:16) Ezali na ngomba moko te oyo ezali na nkombo wana. Lisusu, “bakonzi ya mabelé mpe mampinga na bango” bakoki te koyangana bango nyonso na esika moko. (Emoniseli 19:19) “Esika” yango ezali nde ezaleli oyo bakonzi ya politiki ya mokili oyo ná bato na bango bazali kokóma na yango: Bazali kotɛmɛla Yehova mpe ‘mampinga oyo ezali na likoló,’ oyo etambwisami na Yesu Klisto, “Mokonzi ya bakonzi mpe Nkolo ya bankolo.​—Emoniseli 19:14, 16.

Likambo ya ntina mingi ezali ete liloba “Hala-Magedona” euti na Megido, nkombo ya engumba moko ya Yisalaele ya kala. Engumba yango, oyo ezalaki na ɛsti ya Ngomba Kalemele, ezalaki na esika moko ya malamu mpenza; banzela ya minene oyo bato ya mimbongo mpe basoda bazalaki kosalela elekaki wana. Ezalaki mpe esika oyo bato bandongwanaki na bitumba ya nsɔmɔnsɔmɔ. Na ndakisa, Balaka, mosambisi moko ya Yisalaele, alongaki limpinga moko ya basoda ya nguya ya Bakanana, oyo Sisela azalaki kokamba, na “pembeni ya mai ya Megido.” (Basambisi 4:12-24; 5:19, 20) Mosambisi Gideona mpe alongaki Bamidyani Kaka na esika yango. (Basambisi 7:1-22) Lokola Biblia elobi ete etumba yango ekosalema na Megido, yango emonisi ete Nzambe, na nzela ya Mwana na ye, akolonga banguna na ye nyonso.

Nini ekoya na nsima? Etumba ya Hala-Magedona ekolongola mabe nyonso na mabelé. Ekokɔtisa bato na eleko moko ya nkembo na nkembo. (Emoniseli 21:1-4) Na boyangeli ya Bokonzi ya Nzambe, mabelé ekobongwana paladiso mpe bayengebene bakofanda wana libela na libela.​—Nzembo 37:29.