Mokapo 37

Nasengeli kozwa batisimo?

Tyá elembo soki makambo oyo elandi ezali solo to lokuta:

Batisimo ezali likambo oyo esɛngami mpo na bakristo.

□ Solo

□ Lokuta

Ntina mpenza ya batisimo ezali mpo na kobatela yo osalaka masumu te.

□ Solo

□ Lokuta

Batisimo ekoki kosalisa yo obika.

□ Solo

□ Lokuta

Soki ozwi naino batisimo te, Nzambe akokipe te makambo oyo osalaka.

□ Solo

□ Lokuta

Soki baninga na yo bazali kozwa batisimo, yango elakisi ete yo mpe okoki mpo na kobatisama.

□ Solo

□ Lokuta

SOKI otosaka makambo oyo Nzambe alobaka, obatelaka boninga ná ye, mpe oyebisaka basusu mateya ya Biblia, mabe ezali te okanisa kozwa batisimo. Kasi, ndenge nini okoyeba soki obongi mpo na kozwa batisimo? Mpo na kozwa eyano na motuna yango, tótalela naino makambo oyo touti kolobela.

● Batisimo ezali likambo oyo esɛngami mpo na bakristo.

Solo. Yesu apesaki etinda ete bayekoli na ye basengeli kozwa batisimo. (Matai 28:19, 20) Kutu, Yesu ye moko mpe azwaki batisimo. Mpo na kolanda ndakisa ya Kristo, osengeli kozwa batisimo soki okɔmɛli mpenza mpe ozali na mposa na yango.

● Ntina mpenza ya batisimo ezali mpo na kobatela yo osalaka masumu te.

Lokuta. Batisimo emonisaka na miso ya bato ete omipesi epai ya Yehova. Batisimo ezali te kɔntra moko boye, oyo ekopekisa yo kosala makambo mosusu ya mabe oyo okokaki kosala na kobatama. Kasi, ezali nde komipesa epai ya Yehova mpo olingi kotosa makambo oyo alobaka.

● Batisimo ekoki kosalisa yo obika.

Solo. Biblia elobi ete batisimo ezali likambo ya ntina oyo moto asengeli kosala mpo abika. (1 Petro 3:21) Kasi, yango elingi koloba te ete batisimo ezali lokola mokanda ya asiranse oyo moto akoki kosomba mpo ebatela ye soki likama ebimi. Osengeli kozwa batisimo mpo olingi Yehova mpe olingi kosalela ye libela na libela na motema na yo mobimba.​—Marko 12:29, 30.

● Soki ozwi naino batisimo te, Nzambe akokipe te makambo oyo osalaka.

Lokuta. Mokanda ya Yakobo 4:17 elobi ete: “Soki moto ayebi kosala oyo ezali malamu kasi azali kosala yango te, ezali lisumu.” Makambo oyo vɛrsɛ oyo elobi, etali baoyo bazwá batisimo to te. Na yango soki oyebi oyo ezali malamu oyo osengeli kosala mpe okɔmɛli mpenza mpo otalela bomoi na yo malamumalamu, mbala mosusu ntango ekoki mpo osolola likambo yango ná moboti na yo moko to ná Motatoli ya Yehova mosusu oyo akɔmɛli. Yango ekosalisa yo oyeba makambo mosusu oyo osengeli kosala mpo ozwa batisimo.

● Soki baninga na yo bazali kozwa batisimo, yango elakisi ete yo mpe okoki mpo na kobatisama.

Lokuta. Ekateli ya kozwa batisimo esengeli mpenza kouta na motema na yo moko. (Nzembo 110:3) Osengeli kozwa batisimo kaka ntango oyebi malamumalamu soki kozala Motatoli ya Yehova esɛngi nini mpe ntango omoni ete okoki mpenza mpo na kokokisa mokumba yango.​—Mosakoli 5:4, 5.

Batisimo ebongolaka bomoi ya moto

Batisimo ebongolaka bomoi ya moto mpe ememaka mapamboli mingi. Kasi batisimo esɛngaka mpe likambo moko ya ntina mingi: osengeli kosala makambo oyo eyokani na komipesa na yo epai ya Yehova.

Okómi pene ya komipesa epai ya Nzambe? Soki ezali bongo, ezali mpenza na ntina ozala na esengo. Libaku oyo eleki nyonso ezali liboso na yo, elingi koloba kosalela Yehova na motema mobimba mpe kozala ntango nyonso na bomoi oyo ekomonisa ete omipesi mpenza epai na ye.​—Matai 22:36, 37.

VƐRSƐ OYO EKOSALISA YO

“Bókaba nzoto na bino mbeka ya bomoi, ya bosantu, oyo Nzambe akoki kondima: mosala mosantu oyo bozali kosala na makoki na bino ya kokanisa.”​—Baroma 12:1.

TOLI

Na lisalisi ya baboti na yo, luká ndeko moko na lisangá oyo akoki kosalisa yo okola tii ozwa batisimo.​—Misala 16:1-3.

OYEBAKI YANGO . . . ?

Batisimo ezali likambo ya ntina mingi oyo ekomonisa ete ozwi “elembo” mpo na kobika.​—Ezekiele 9:4-6.

MAKAMBO OYO NAKOSALA

Mpo nakola tii kozwa batisimo, nakobakisa boyebi na ngai na mateya oyo ya Biblia:

Na mokapo oyo, nakosepela kotuna moboti (baboti) boye:

OKANISI NINI?

● Mpo na nini batisimo ezali likambo ya kozwa na lisɛki te?

● Nini ekoki kotinda elenge azwa batisimo liboso ete akɔmɛla?

● Makambo nini ekoki kosala ete elenge moko akakatana mpo na komipesa epai ya Nzambe mpe kozwa batisimo?

[Likanisi ya paragrafe na lokasa 306]

“Koyeba ete nazwá batisimo, esalisaki ngai nazwa bikateli ya malamu mpe epekisaki ngai nalanda nzela ya mabe oyo ekokaki komemela ngai makama.”​—Holly

[Etanda/​Elilingi na lokasa 307]

Mituna oyo bato batunaka mingi na oyo etali batisimo

Batisimo emonisaka nini? Kozindisama mobimba na mai mpe kobimisama elimboli ete okufi na bomoi oyo ozalaki na yango ya koluka kaka matomba na yo moko, mpe ozongi na bomoi mpo na kosala mokano ya Nzambe.

Kopesa bomoi na yo epai ya Yehova elimboli nini? Yango elimboli ete olingi lisusu te komitambwisa yo moko, mpe olaki ete kosala mokano ya Nzambe esengeli kozala eloko ya liboso na bomoi na yo. (Matai 16:24) Ebongi mpenza omipesa epai ya Yehova na libondeli, mwa mikolo liboso ete ozwa batisimo.

Makambo nini osengeli kosala na bomoi na yo liboso ya kozwa batisimo? Osengeli kozala na etamboli oyo eyokani na makambo oyo Liloba ya Nzambe elobaka mpe oyebisa basusu makambo ya Nzambe. Osengeli mpe kokolisa boninga na yo ná Nzambe na nzela ya libondeli mpe boyekoli ya Liloba na ye. Osengeli kosalela Yehova na bolingo na yo moko, kasi te mpo bato mosusu bazali kotya yo mbamba.

Na mbula nini moto asengeli kozwa batisimo? Mbula ezali te likambo ya ntina mingi. Ata bongo, ekozala malamu okola naino mpe okɔmɛla na makanisi mpo okanga ntina ya komipesa epai ya Nzambe.

Okosala nini soki ozali na mposa ya kozwa batisimo kasi baboti na yo bayebisi yo ozela naino? Ekoki kozala ete balingaka omesana naino na makambo oyo esɛngami mpo na bakristo. Yokelá bango mpe salelá ntango wana oyo ozali kozela, mpo na kokolisa boninga na yo ná Yehova.​—1 Samwele 2:26.

[Etanda na lokasa 308, 309]

Etanda ya mituna

Okanisaka kozwa batisimo?

Salelá mituna mpe biyano oyo elandi mpo na koyeba soki ozali kokokisa masɛngami mpo na kozwa batisimo. Ekozala malamu otánga naino bavɛrsɛ oyo bapesi liboso okoma biyano na yo.

Makambo nini ozali kosala mpo na komonisa ete otyelaka Yehova motema?​—Nzembo 71:5. ․․․․․

Ndenge nini omonisi ete osalelaka makoki na yo ya kososola mpo na kokesenisa malamu ná mabe?​—Baebre 5:14. ․․․․․

Obondelaka mbala boni? ․․․․․

Mabondeli na yo ezalaka ya sikisiki? Emonisaka mpenza ete olingaka Yehova?​—Nzembo 17:6. ․․․․․

Komá awa na nse mikano oyo olingi komityela mpo na oyo etali mabondeli na yo. ․․․․․

Oyekolaka Biblia yo moko mbala na mbala?​—Yosua 1:8. ․․․․․

Na boyekoli na yo moko, otalelaka makambo nini? ․․․․․

Komá awa na nse mikano oyo olingi komityela na oyo etali boyekoli na yo. ․․․․․

Mosala na yo ya kosakola ebotaka mpenza mbuma? (Na ndakisa, okoki kolimbwela basusu mateya ya ebandeli ya Biblia? Ozongelaka bato oyo basepelaki na nsango malamu? Ozali kosala makasi ozwa moto oyo okoki koyekola na ye Biblia?)

□ Ɛɛ □ Te

Obimaka na mosala ya kosakola ata soki baboti na yo babimi te?​—Misala 5:42.

□ Ɛɛ □ Te

Komá awa na nse mikano oyo olingi komityela na oyo etali mosala ya kosakola.​—2 Timote 2:15. ․․․․․

Oyanganaka na makita mbala na mbala to te?​—Baebre 10:25. ․․․․․

Opesaka biyano na makita? ․․․․․

Okendaka na makita ata soki baboti na yo bakei te (Soki bapesi yo nzela)?

□ Ɛɛ □ Te

Okoki koloba ete osepelaka mpenza kosala mokano ya Nzambe?​—Nzembo 40:8.

□ Ɛɛ □ Te

Okoki kotánga mabaku mosusu oyo oboyaki kolanda baninga?​—Baroma 12:2. ․․․․․

Makambo nini okani kosala mpo bolingo na yo epai ya Yehova ezala ntango nyonso makasi?​—Yuda 20, 21. ․․․․․

Okokoba kosalela Yehova ata soki baboti to baninga na yo batiki?​—Matai 10:36, 37.

□ Ɛɛ □ Te

[Elilingi na lokasa 310]

Batisimo ezali lokola libala, ebongolaka bomoi ya moto, mpe ezali likambo ya kozwa na lisɛki te