‘Misala na ye mizali kolanda ye’
NA NGONGA ya 8:50 na ntongo, na mokolo ya minei, Yulí 28, 1994, George D. Gangas asukisaki bomoi na ye awa na mabelé. Azalaki na mibu 98. George Gangas azalaki moko na bapakolami mpe moko kati na Lisangani ya Mikóló-bakambi ya Batatoli ya Yehova uta Ɔkɔtɔ́bɛ 15, 1971.
Baoyo bazalaki baninga ya penepene ya ndeko Gangas bayebaki ete ye alingaki boyengebene mpe ayinaki mabe. Bazali komikundwela lolenge oyo azalaki mbala na mbala koloba na ntina na Satana ete azali mokósi monene, ya nsɔ́mɔ, ya mabe, ya mbindo mpe ya kotyolama. Nzokande, azalaki koloba na ntina na Yehova ete azali Tata ya bolingo, ya boboto, ya motema mawa, mpe mobateli. Mingi bazali mpe komikundwela ete azalaki kolinga mingi kotuna mituna ya Biblia. Na masoló na ye nyonso elongo na baninga, azalaki kozanga te kotuna mituna—misusu ya pɛtɛɛ, misusu mpe ya makasi. Ya solo, Ndeko Gangas alingaki mpenza solo ya Biblia.
Ndeko Gangas azwaki batisimo na Yulí 15, 1921. Abandaki mosala ya mosakoli ya ntango nyonso (mobongisi-nzela) na Mársi ya mobu 1928. Na yango, eleko mobimba oyo alekisi kati na mosala ya ntango nyonso ezali bongo mibu 66. Akómaki mosali na biro monene ya Watch Tower Bible and Tract Society na Brooklyn na Ɔkɔtɔ́bɛ 31, 1928.
Lisoló ya bomoi na ye ebimaki na Linɔ́ngi ya Mosɛnzɛli ya Sɛtɛ́mbɛ 1, 1967 (ebimeli ya Lifalansé). Ezali komonisa mpenza moto ya Nzambe, na bizaleli malamu ya elimo. Kati na lisoló yango, alobaki maloba oyo ya kitoko: “Nalingi bomoi mpe nalingi ete bandeko na ngai bazwa bomoi. Lolenge moko na ntoma Paulo, nazali kotalela biloko nyonso mosusu ete ezali ‘mpamba liboso na motuya moleki monene ya koyeba Klisto Yesu.’”—Bafilipi 3:8, NW.
Ndeko Gangas amonisaki na nzela ya misala na ye ete, ya solo mpenza, alingaki bomoi mpe, na molende nyonso, azalaki kokabola ‘boyebi na ye ya Klisto Yesu’ epai na bato mosusu. Tokozanga ye; kasi, oyo nde esengo tozali na yango, ete asili kozwa mbano na ye na likoló! Sikawa, ‘akopema na bwale na ye, mpo ete misala na ye mizali kolanda ye.’—Emɔnisɛli 14:13, NW.