Mituna ya batángi

Nini ezali kosala ete “biloko kitoko ya bikólo” ekɔta na “ndako” ya losambo ya solo?​—Hagai 2:7, NW.

Na nzela ya Mosakoli Hagai, Yehova alobaki boye: “Nakoningisa bikólo nyonso, mpe biloko kitoko ya bikólo nyonso ekokɔta; mpe nakotondisa ndako oyo na nkembo.” (Hagai 2:7, NW) Tokoki nde koloba ete koningana ya “bikólo nyonso” nde ezali kosala ete “biloko kitoko” ya bikólo nyonso, elingi koloba bato ya mitema sembo, báya na losambo ya solo? Te.

Tótalela likambo oyo ezali koningisa bikólo mpe oyo koningana yango ezali komema. Biblia elobi ete ‘bikólo ezali na yikiyiki mpe bato ya bikólo bazali kolobaloba na nse likambo ya mpamba.’ (Nzembo 2:1, NW) “Likambo ya mpamba” oyo bazali “kolobaloba na nse” to komanyola, ezali makanisi oyo bazali kokanisa mpo na kobatela bokonzi na bango. Ezali na eloko mosusu te oyo ezali koningisa bikólo yango koleka eloko oyo ekoki kosukisa bokonzi na bango.

Mosala ya kosakola Bokonzi ya Nzambe oyo ezali sikoyo koyangela na likoló, oyo Batatoli ya Yehova bazali kosala na mokili mobimba, ezali kobangisa bikólo. Esengeli mpenza kobangisa bango mpamba te Bokonzi ya Nzambe oyo apesi na mabɔkɔ ya Yesu Klisto “ekobuka mpe ekosilisa makonzi oyo nyonso [ya bato].” (Danyele 2:44) Nsango ya kosambisa oyo tozali kosakola ezali koningisa bikólo. (Yisaya 61:2) Koningana yango ezali kokóma makasi wana mosala ya kosakola ezali se kokóma monene mpe ezali kokende liboso. Koningisama oyo Hagai 2:7 esakolaki ekosuka na likambo nini?

Na Hagai 2:6 (NW), tozali kotánga boye: “Yehova ya bibele alobi boye: ‘Mbala moko lisusu—ezali mwa ntango moke—nakoningisa likoló, mabelé, mbu, mpe mabelé ekauká.’” Ntoma Paulo azongelaki makanisi ya vɛrsɛ yango ntango akomaki boye: “Apesi elaka, kolobáká ete: ‘Etikali mbala moko lisusu oyo nakoningisa kaka mabelé te kasi mpe likoló.’ Nzokande maloba oyo ete ‘Etikali mbala moko lisusu’ ezali kolakisa kolongolama ya biloko oyo ezali koningana makasi lokola biloko oyo esalemá, mpo biloko oyo ezali koningana te [Bokonzi] etikala.” (Baebele 12:26, 27) Etikali moke ebongiseli ya makambo ya ntango oyo ebomama nyɛɛ mpe etika esika na mokili ya sika ya Nzambe.

Ezali te koningisama ya bikólo nde ezali kosala ete bato ya mitema sembo báya na losambo ya pɛto. Likambo oyo ezali kobenda bango epai ya Yehova mpe na losambo na ye ezali se likambo oyo ezali koningisa bikólo, elingi koloba mosala ya kosakola Bokonzi na mokili mobimba. Mosala ya kosakola “nsango malamu ya seko” to “nsango ya esengo” ezali kobenda na losambo ya Nzambe ya solo bato oyo bazali na ezaleli oyo ebongi.​—Emoniseli 14:6, 7.

Nsango ya Bokonzi ezali nsango ya kosambisa, kasi ezali mpe nsango ya lobiko. (Yisaya 61:1, 2) Mosala ya kosakola nsango yango ezali kokokisa makambo mibale: ezali koningisa bikólo mpe ezali kokɔtisa biloko kitoko ya bikólo mpo na nkembo ya Yehova.