Mateu

15 Cwale Bafalisi ni bañoli ba Mulao ba taha ku Jesu ku zwa kwa Jerusalema, ba li: 2 “Ki kabakalañi balutiwa ba hao ha ba tula sizo sa baikale? Ka mutala, ha ba tapi kwa mazoho ha ba bata ku ca lico.”

3 A ba alaba, a li: “Ki kabakalañi ni mina ha mu tula mulao wa Mulimu kabakala lizo za mina? 4 Ka mutala, Mulimu naa ize: ‘Kuteka ndataho ni maho,’ ni kuli, ‘Yena ya nyefula ndatahe kamba mahe a bulaiwe.’ 5 Kono mina mu li, ‘Mutu ufi kamba ufi ya bulelela ndatahe kamba mahe kuli: “Nto kaufela ye ni na ni, ye ne ni ka mi tusa ka yona, i neezwi sina mpo ku Mulimu,” 6 kipeto mutu yo haa sa tokwa ku kuteka ndatahe.’ Kamukwaocwalo mu fetuzi linzwi la Mulimu ku ba le li si na tuso kabakala lizo za mina. 7 Mina baipi, Isaya u polofitile hande za mina ha naa ize: 8 ‘Batu ba, ba ni kuteka ka milomo ya bona, kono lipilu za bona li kwahule ni na. 9 Ku ni lapela kwa bona ki kwa mbango, kakuli lituto ze ba luta ki milao ya batu feela.’” 10 Kiha bizeza buñata fakaufi ni yena mi a li ku bona: “Mu teeleze mi mu utwisise manzwi a: 11 Se si kena mwa hanu hasi silafazi mutu, kono se si zwa mwa hanu ki sona se si silafaza mutu.”

12 Cwale balutiwa ba taha ku yena, mi ba li: “Kana wa ziba kuli Bafalisi ba sitatalile ha ba utwile ze u bulezi?” 13 A ba alaba, a li: “Sicalo kaufela saa si ka cala Ndate ya kwa lihalimu si ka kumulwa. 14 Ha mu ba tuhele. Ki baeteleli ba ba li libofu. Mi cwale, haiba sibofu si etelela sibofu se siñwi, bubeli bwa zona li ka wela mwa musima.” 15 Pitrosi a mu alaba kuli: “Ha ku lu bulelele taluso ya swanisezo yani.” 16 Kihaa li: “Kikuli ni mina ha mu utwisisi ni nako ye?” 17 Kana ha mu zibi kuli sika kaufela se si kena mwa mulomo si fita mwa mala ni ku yo zwela kwande? 18 Kono lika ze zwa mwa mulomo li simuluha mwa pilu, mi lika zeo ki zona ze silafaza mutu. 19 Ka mutala, mwa pilu ki mona mo ku zwa mihupulo ye maswe, lipulayano, bubuki, buhule, busholi, bupaki bwa buhata, linyefulo. 20 Zeo ki zona lika ze silafaza mutu, haili ku ca lico ka mazoho aa si ka tapa ha ku silafazi mutu.”

21 Jesu ha zwile fo, a ya mwa libaka za Tire ni Sidoni. 22 Mi ha mu bone! musali yo muñwi wa Mufenisia* a taha ku zwa mwa libaka zeo mi a huwa, a li: “U ni hauhele, Mulena, Mwanaa Davida. Mwanaka wa musizana u katazwa hahulu ki madimona.” 23 Kono a tokwa ku mu alaba se siñwi. Cwale balutiwa ba hae ba taha mi ba kala ku mu kupa, ba li: “Ha ku mu bulelele a ye kakuli u swalelezi ku huwaka mwamulaho wa luna.” 24 A ba alaba kuli: “Ne ni si ka lumelwa ku mutu ufi kamba ufi, haisi kwa lingu ze latehile za ndu ya Isilaele.” 25 Musali yo ha saa tile, a kala ku kubamela Jesu, a li: “Mulena, ha ku ni tuse!” 26 Kihaa mu alaba kuli: “Ha ku si ka luka ku nga buhobe bwa banana ni ku bu nepela tunjanana.” 27 Mi musali a li: “Ki cwalo, Mulena, kono ni tona tunjanana tu canga kwa buungululwa bo bu wa kwa tafule ya malenaa tona.” 28 Cwale Jesu kihaa li ku yena: “Wena Musali, tumelo ya hao ki ye tuna; ku ezahale ku wena mo u batela.” Mi mwanaa hae a fola ka yona nako yeo.

29 Jesu ha zwa fo, a taha bukaufi ni Liwate la Galilea, mi ha saa kambamezi fa lilundu, a ina fateñi. 30 Buñata bo butuna kiha bu taha ku yena, bwa tisa lihole, liyanga, libofu, limumu, ni bakuli ba bañwi ba bañata, ba to ba beya kwa mahutu a hae, mi a ba folisa, 31 kuli mane buñata bwa komoka hahulu ku bona limumu ha li bulela ni lihole ha li zamaya ni libofu ha li bona, mi bwa kanyisa Mulimu wa Isilaele.

32 Kono Jesu a biza balutiwa ba hae mi a li ku bona: “Ni utwela buñata makeke kakuli se li mazazi a malaalu ba inzi ni na mi ha ba na sa ku ca, mi ha ni lati ku ba lukulula ba si ka ca. Ba ka suhana ba palelelwa mwa nzila.” 33 Kono balutiwa ba li ku yena: “Ki kai ko lu ka fumana linkwa ze ka kwana buñata bo bu kuma fa, kwahule ni batu kwanu?” 34 Jesu kihaa ba buza, a li: “Mu na ni linkwa ze kai?” Ba li: “Ze supile, ni tutapi tu sikai.” 35 Cwale ha saa laezi buñata ku ina fafasi, 36 a nga linkwa ze supile ni litapi, mi hamulaho wa ku fa buitumelo, a komauna linkwa mi a kala ku li abela balutiwa, mi bona ba li abela buñata. 37 Mi kaufela ba ca, ba kula, mi ba kubukanya buemba-emba bo bu siyezi, bwa taza lizuma ze tuna ze supile. 38 Mi palo ya ba ne ba cile ne li baana ba ba eza likiti zee ne, ku sa balwi basali ni banana ba banyinyani. 39 Hasamulaho, ha saa lukuluzi buñata, a kena mwa sisepe mi a ya mwa libaka za Magadana.