Kana mabizo buñata bobutuna bwa batu ba lingu zeñwi akazwelapili kuba mwa buka ya bupilo hamulaho wa kupunyuha Armagedoni? Eni. (Sin. 7:14) Jesu naabulezi kuli batu bao babaswanisezwa kwa lingu, bakafumana “bupilo bobusa feli.” (Mat. 25:46) Kono haki kuli batu bao bakafiwa bupilo bobusa feli basapunyuha feela Armagedoni. Mwa Puso ya Lilimo ze 1,000, Jesu “uka baetelela kwa maweluwelu a mezi a bupilo.” Babaka latelela ketelelo ya Kreste mi bazwelapili kusepahala ku Jehova kuisa nako ya katulo ya mafelelezo, mabizo abona akañolwa mwa buka ya bupilo kusina kutakulwa. (Sin. 7:16, 17) Kono batu babaswanisezwa kwa lipuli bakatimezwa fa Armagedoni. Jesu naabulezi kuli “bakayundiswa kuya kuile.” (Mat. 25:46) Muapositola Paulusi, ka kususumezwa ki moya wa Mulimu, naabulezi kuli “bona bao bakafiwa koto ya sinyeho ya kuya kuile.”—2 Mates. 1:9; 2 Pit. 2:9. w22.09 16 ¶7-8

Lika zabupile Jehova likona kutusa mabasi kuba ni nako yende ya kuikatulusa ni kuikola siango, mi kueza cwalo kukona kubatusa kuswalisana hahulu. Jehova ubupile lika zende kolukona kuezeza lika zelulata. Mabasi amañata atabela hahulu kuya hamoho kwa sibaka sesiñwi kuyo buha pupo, kuya kwa libaka za matakanyani, kwa malundu, kamba kwa makamba. Mwa lifasi lelinca la Mulimu, bashemi ni bana babona bakaikola hahulu lika zabupile Jehova kufita lili kaufela. Ka kushutana ni kacenu, ka nako yeo haluna kusaba lifolofolo mi ni zona halina kulusaba. (Isa. 11:6-9) Lukaikola lika zaezize Jehova kuya kuile. (Samu 22:26) Kono bashemi, hamutokwi kulibelela nako yeo kuli mutuse bana bamina kuikola lika zebupilwe. Haiba muitusisa lika zebupilwe kuluta bana bamina ka za Jehova, mwendi bakalumelelana ni manzwi anaabulezi Mulena Davida, hanaaize: “Wena Jehova hakuna misebezi yeswana ni yahao.”—Samu 86:8. w23.03 25 ¶16-17

Kana Nduna wa kwa Etopia naaitukiselize kukolobezwa luli? Munyakisise taba ye: Muuna wa Muetopia yo “naaile kwa Jerusalema kuyo lapela.” (Lik. 8:27) Kubonahala kuli naali muproselite wa Mujuda; naacincize bulapeli bwahae ni kukala kuswalisana ni bulapeli bwa Sijuda. Kusina kukakanya, naaitutile ka za Jehova mwa Mañolo A Siheberu akenile. Nihakulicwalo, naasabata kuituta zeñata. Mane Filipi hakopana ni muuna yo mwa nzila, naamufumani inze abala muputo wa litaba zeneñozwi ki mupolofita Isaya. (Lik. 8:28) Naabata kuzwelapili kuituta zeñata. Naazamaile musipili omutelele kuzwa kwa Etopia kuya kwa Jerusalema kuyo lapela Jehova kwa tempele. Nduna wa Muetopia naaitutile ku Filipi litaba za niti za butokwa, ili litaba zanaasa zibi, mi yeñwi ya litaba zanaaitutile neli kuli Jesu neli yena Mesia. (Lik. 8:34, 35) Lilato lahae ku Jehova ni Mwanaa hae nelitiile. Naasusuelizwe kueza katulo ya butokwa mwa bupilo bwahae ya kukolobezwa sina mulateleli wa Jesu Kreste. Filipi hanaalemuhile kuli muuna yo naaitukiselize, amukolobeza. w23.03 8-9 ¶3-6