Muapositola Paulusi neli zemaata hahulu kumufita. Hañata, nebalumanga batu kuli bamunate ni kumukenya mwa tolongo. Hape Paulusi naanyandisizwe ki batu bane baswanela kuba balikani bahae. Mane batu babañwi mwa puteho neba mulwanisa. (2 Makor. 12:11; Mafil. 3:18) Kono Paulusi naatuzi batu kaufela bane bamulwanisa. Ka mukwa ufi? Naazwezipili kukutaza kusina taba ni twaniso. Naazwezipili kulata mizwale ni likaizeli bahae niha nebasa muezi hande. Mi mane sa butokwa nikufita kikuli naazwezipili kusepahala ku Mulimu mwa bupilo bwahae kaufela. (2 Tim. 4:8) Paulusi naakonile kueza lika zeo kaufela isiñi kabakala kuli naanani maata kono kabakala kuli naaitingile ku Jehova. Kana ni mina musweli mwasheununwa kamba kunyandiswa? Lubata kueza molukonela kaufela kutusa batu kuituta ka za Jehova. Mukona kueza cwalo ka kuitusisa Bibele kuli mualabe lipuzo zebabuza batu, ka kubonisa likute ni musa hamuambola ni batu baba mieza maswe, ni ka kueza zende kwa batu kaufela, mane nihaiba kwa lila zamina.—Mat. 5:44; 1 Pit. 3:15-17. w20.07 17-18 ¶14-15

Kana luli kwaswanela kubulela kuli Jehova unani buikokobezo? Eni, sina mwanaabulelezi Davida mwa liñolo la zazi la kacenu. (Samu 18:35) Davida hanaabulela manzwi ao mwendi naanahana ka za lizazi lanaatile mupolofita Samuele kwa ndu ya ndatahe kuto toza mutu yanaakaba mulena wa Isilaele. Nihaike kuli Davida neli yena mwanana ka kufitisisa kwa bana ba Jese ba 8, Jehova naamuketile kuyola Mulena Saule. (1 Sam. 16:1, 10-13) Davida ni yena naaikutwa sina muñoli yomuñwi wa samu yanaabulezi cwana ka za Jehova: “Uinama kuli abone lihalimu ni lifasi, kuli azwise wa mayemo a kwatasi mwa liluli. Unanula mubotana . . . kuli amuinise ni babakutekeha.” (Samu 113:6-8) Jehova ubonisa kuli waikokobeza ka mwasebelisanela ni batanga bahae babasika petahala. Jehova habati feela kuli lumulapele, kono hape ubata kuli lube balikani bahae. (Samu 25:14) Jehova naafile Mwanaa hae sina sitabelo kuli alutuse kuba balikani bahae, mi sitabelo seo sitahisa kuli libi zaluna liswalelwe. Kaniti luli, Jehova unani musa, mi ulubonisize mukekecima! w20.08 8 ¶1-3

Jehova utomile lizazi ni nako lakasinya lifasi lelimaswe le. (Mat. 24:36) Kono haana kusinya lifasi pili nako yeo isika fita kale. Nihaike kuli Jehova unyolelwa kuzusa babashwile, uzwelapili kuba ni pilu-telele. (Jobo 14:14, 15) Ulibelela kuli nako yeswanela ya kubazusa kwa bafu ifite. (Joa. 5:28) Kaniti luli, kwaswanela kuitumela ku Jehova kabakala pilu-telele yahae. Munahane feela taba ye: Bakeñisa pilu-telele ya Jehova, batu babañata hamohocwalo ni luna, lubile ni nako ya ‘kubaka.’ Jehova ubata kuli batu babañata bafumane bupilo bobusa feli. Kacwalo, haike lubonise kuli lwaitebuha pilu-telele ya Jehova. Ka mukwa ufi? Ka kueza molukonela kaufela kubata batu “ba lipilu zende bababata bupilo bobusa feli” ni kubatusa kulata Jehova ni kumusebeleza. (Lik. 13:48) Haiba lueza cwalo, ni bona bakatusiwa ki pilu-telele ya Jehova, sina luna. w20.08 18 ¶17