Luka

14 Ka nako ye ñwi, Jesu naa ile ku yo ca lico mwa ndu ya yo muñwi wa babusi ba Bafalisi ka la Sabata, mi ne ba talimezi ku bona sa naa ka eza kaufela. 2 Mi ha mu bone! fapilaa hae ne ku na ni mutu yo muñwi ya naa kula butuku bwa nañwe.* 3 Cwale Jesu kihaa li ku ba ba ziba Mulao ni Bafalisi: “Kana kwa lumelelwa ku folisa mutu la Sabata kamba kutokwa?” 4 Kono ba kuza. Jesu kihaa swala mutu yo, a mu folisa, mi a mu lukulula. 5 Kihona a li ku bona: “Ki mañi ku mina ya si ke a zwisa kapili mwanaa hae kamba pulu ya hae mwa lisima ha i wezi mwateñi ka lizazi la Sabata?” 6 Mi ba palelwa ku mu alaba se siñwi mwa litaba zeo.

7 Cwale Jesu ha lemuhile ba ne ba memilwe mo ne ba ketela libaka ze kutekeha hahulu, a ba bulelela swanisezo ye. A li: 8 “Ha u memiwa ki mutu kwa mukiti wa linyalo, u si ke wa yo ina mwa sibaka se si kutekeha hahulu. Kakuli mwendi ka nako ye swana ku na ni yo muñwi ya kutekeha hahulu ku fita wena ya memilwe ki yena, 9 mi yena ya mi memile mwa sibeli sa mina u ka taha ni ku to li ku wena, ‘Ha ku siyele yo sibaka.’ Mi cwale wena u ka ya ka maswabi ku yo ina mwa sibaka sa kwatasi ku feleleza. 10 Kono ha u memilwe, u yo ina mwa sibaka sa kwatasi ku feleleza, kuli cwale yena ya ku memile ha ka fita, a to li ku wena, ‘Mulikani, ha ku ye mwa sibaka se si pahami sani.’ Mi wena u ka kutekiwa fapilaa bo memilwe ni bona kaufela. 11 Kakuli mutu kaufela ya ipahamisa u ka kokobezwa, mi ya ikokobeza u ka pahamiswa.”

12 Mi cwale a fetuhela ku ya naa mu memile, a li: “Ha u lukisa sico sa musihali kamba mulalelo, u si ke wa biza balikani ba hao, banyani kamba bahulwani ba hao, bahabo wena, kamba bafumi bo yahile ni bona. Kakuli mwendi ba ka suhana ba ku mema ni bona ka nako ye ñwi, mi yeo i fetuhe tifo ku wena. 13 Kono ha u lukisa mukiti, u meme babotana, liyanga za mahutu, lihole, libofu, 14 mi u ka taba, kakuli ha ba na se ba ka ku kutiseza. Kakuli wena u ka kutisezwa ka nako ya zuho ya ba ba lukile.”

15 Yo muñwi wa ba ne ba memilwe ha utwa litaba zeo, a li ku Jesu: “U na ni tabo mutu ya ka ca sinkwa mwa Mubuso wa Mulimu.”

16 Jesu a li ku yena: “Mutu yo muñwi naa lukisa mulalelo o mutuna, mi a mema batu ba bañata. 17 Mi a luma mutangaa hae ka nako ya mulalelo kuli a yo taluseza ba ba memilwe, a li, ‘Ha mu te, kakuli lika cwale li lukile.’ 18 Kono kaufelaa bona ba kala ku itatula ka nzila ye swana. Wa pili a li ku yena, ‘Ni lekile simu mi ni tokwa ku yo i bona; u ni swalele, ni palezwi ku taha.’ 19 Mi yo muñwi a li, ‘Ni lekile lipulu za licoko liketalizoho mi ni sa yo li lika; u ni swalele, ni palezwi ku taha.’ 20 Ni yo muñwi hape a li, ‘Kihona ni sa zo nyala, mi kabakaleo ha ni koni ku taha.’ 21 Cwale mutanga yo a kuta mi a biha lika zeo kaufela ku mulenaa hae. Cwale muñaa ndu a halifa mi a li ku mutanga yo, ‘Ha ku ye kapili mwa makululu ni mwa linzila za muleneñi mi u yo tisa babotana ni liyanga za mahutu ni libofu ni lihole.’ 22 Hamulahonyana, mutanga yo a li, ‘Mulena, se u laezi si ezizwe, kono sibaka si sa li teñi.’ 23 Mi mulenaa hae a li ku yena, ‘Ha ku ye mwa mikwakwa ni mwa tunzilanyana, mi u yo hapeleza batu ku taha kuli ndu ya ka i tale. 24 Kakuli na mi bulelela ni li: Ha ku na nihaiba a li muñwi kwa baana ba ne ba memilwe ya ka lupa kwa mulalelo wa ka.’”

25 Cwale buñata bo butuna ne bu zamaya hamoho ni yena, mi a fetuhela ku bona, a li: 26 “Haiba mutu a taha ku na a sa toyi ndatahe, mahe, musalaa hae, bana ba hae, banyani kamba bahulwani ba hae, ni likaizeli za hae, mane nihaiba moyo wa hae ka sibili, ha koni ku ba mulutiwa wa ka. 27 Mutu kaufela ya sa lwali kota ya hae ya linyando ni ku ni latelela ha koni ku ba mulutiwa wa ka. 28 Ka mutala, ki mañi ku mina ya bata ku yaha tawala ya si ke a ina fafasi pili ni ku bala lisinyehelo kuli a bone haiba u na ni masheleñi a ku i feza? 29 Hakusicwalo, a ka suhana a yaha mutomo wa yona ni ku palelwa ku i feza, mi ba ba bona kaufela ba kale ku mu sheununa, 30 ba li: ‘Mutu yo, naa kalile ku yaha kono u palezwi ku feza.’ 31 Kamba ki ufi mulena ya caula ku yo kopana ni mulena yo muñwi mwa ndwa, ya sa ini pili fafasi ni ku lelisana ni ba bañwi kuli a bone haiba ka mpi ya hae ya baana ba ba eza likiti ze lishumi wa kona ku yo lwanisa mulena yo ya taha ni mpi ya ba ba eza likiti ze mashumi a mabeli? 32 Mi haiba ha koni, u luma sitopa sa lindumeleti za hae ni ku yo kupa kozo, mulena yo muñwi yo a sa li kwahule. 33 Kamukwaoswana, ha ku na mutu mwahalaa mina, ya kona ku ba mulutiwa wa ka, haiba a sa tobohi maluwo a hae kaufela.

34 “Lizwai kaniti ki le linde. Kono haiba ni lona li sampuka, maata a lona a ka kutiswa ka ñi? 35 Ha li na tuso kwa mubu kamba kwa musutelo. Batu ba li latela kwande. Yena ya na ni lizebe za ku teelezisa, a teeleze.”