Joani

21 Zeo ha li felile, Jesu a iponahaza hape kwa balutiwa kwa liwate la Tiberiya. Naa iponahalize ka mukwa wo. 2 Simoni Pitrosi, Tomasi, ya naa bizwa Wa Mambile, Natanaele ya naa zwa mwa Kana wa mwa Galilea, bana ba Zebedea, ni balutiwa ba hae ba bañwi ba babeli, ne ba li hamoho. 3 Simoni Pitrosi a li ku bona: “Ni ya kwa ku yamba.” Ba li ku yena: “Ni luna lwa ya ni wena.” Ba ya, mi ba longana mwa sisepe, kono ba tokwa ku sela se siñwi busihu bo.

4 Kono ha ne ku se ku patalala, Jesu a yema fa likamba, kono balutiwa ne ba si ka lemuha kuli ki Jesu. 5 Jesu kihaa li ku bona: “Bana ba banyinyani, ha mu na sa ku ca, nji cwañi?” Ba mu alaba, ba li: “Ha lu na!” 6 A li ku bona: “Mu nepele kanyandi ku la bulyo la sisepe mi mu ka fumana.” Kiha ba nepa kanyandi, kono se ba palelwa ku ka yambula kabakala buñata bwa litapi. 7 Kamukwaocwalo, mulutiwa ya naa latwa ki Jesu a li ku Pitrosi: “Ki mulena!” Mi Simoni Pitrosi ha utwa kuli ki Mulena, a apala siapalo sa hae sa fahalimu, kakuli naa si ka tina,* mi a tulela mwa liwate. 8 Kono balutiwa ba bañwi ba taha mwa kasepenyana ba nze ba hoholola kanyandi ka ka tezi litapi, kakuli ne ba si kwahule ni likamba, ibato ba feela limita ze mwanda ku zwa fa likamba.

9 Kono ha se ba longokezi fa likamba, ba bona mulilo wa mashala ni litapi fateñi ni sinkwa. 10 Jesu a li ku bona: “Ha mu tise kwa litapi ze mu sa zo swala.” 11 Simoni Pitrosi kihaa kena mwa sisepe mi a yo hohela kanyandi ka ka tezi litapi ze tuna ze 153 fa likamba. Kono litapi niha ne li li ze ñata cwalo kanyandi ne ka si ka pazuha. 12 Jesu a li ku bona: “Ha mu te, mu to kushuka.” Mi ha ku na niheba a li muñwi kwa balutiwa ya naa na ni bundume bwa ku mu buza kuli: “Ki wena mañi?” kakuli ne ba ziba kuli ki yena Mulena. 13 Jesu a taha mi a nga sinkwa ni ku ba fa sona, mi a eza cwalo ni kwa litapi. 14 Cwale lo ne se li lona lwa bulaalu Jesu a nzaa iponahaza kwa balutiwa ba hae ku zwa fa zusezwa kwa bafu.

15 Cwale ha se ba felize ku kushuka, Jesu a li ku Simoni Pitrosi: “Simoni, mwanaa Joani, kana u ni lata ku fita ze?” A li ku yena: “Ku cwalo, Mulena, wa ziba kuli na ku lata.” Jesu a li ku yena: “Fepa lingunyana za ka.” 16 Hape a li ku yena lwa bubeli: “Simoni mwanaa Joani, kana wa ni lata?” A li ku yena: “Ku cwalo, Mulena, wa ziba kuli na ku lata.” Jesu a li ku yena: “Lisa lingunyana za ka.” 17 A li ku yena lwa bulaalu: “Simoni mwanaa Joani, kana wa ni lata?” Pitrosi a swaba hahulu kuli Jesu u mu buza lwa bulaalu kuli: “Kana wa ni lata?” Kihaa li ku yena: “Mulena, u ziba linto kamukana; wa ziba kuli na ku lata.” Jesu a li ku yena: “Fepa lingunyana za ka. 18 Kaniti-niti na ku bulelela ni li, ha ne u li mwanana, ne u itinisanga ili wena ni ku ikela ko ne u lata. Kono ha u ka supala u ka yandulula mazoho a hao mi mutu yo muñwi u ka ku tinisa ni ku ku isa ko u sa lati.” 19 Naa bulela cwalo ku talusa mufuta wa lifu la naa ka kanyisa Mulimu ka lona. Ha saa bulezi cwalo, a li ku Pitrosi: “U zwelepili ku ni latelela.”

20 Pitrosi a itemuna mi a bona mulutiwa ya naa latwa ki Jesu a nzaa ba latelela, yena mulutiwa ya naa kile a yendamela fa sifuba sa Jesu ka nako ya mulalelo mi naa ize: “Mulena, ya ku beteka ki mañi?” 21 Cwale Pitrosi ha boni mulutiwa yo, a li ku Jesu: “Mulena, yo yena bo?” 22 Jesu a li ku Pitrosi: “Haiba ni lata kuli a ine ku fitela ni taha, butata ki bufi ku wena?” Wena u zwelepili ku ni latelela.” 23 Kabakaleo, taba yeo ya hasana mwahalaa balutiwa, kuli kuti mulutiwa yo ha na ku shwa. Kono Jesu naa si ka mu bulelela kuli mulutiwa yo ha na ku shwa, kono naa ize: “Haiba ni lata kuli a ine ku fitela ni taha, butata ki bufi ku wena?”

24 Yo ki yena mulutiwa ya paka lika ze, ni ya naa ñozi lika ze, mi lwa ziba kuli bupaki bwa fa ki bwa niti.

25 Mane hape ku na ni lika ze ñwi ze ñata za naa ezize Jesu, ili zeo kambe ne li ñozwi ka butungi bwa zona, ni sepa kuli miputo ye ne ka ñolwa ne i si ke ya kwana mwa lifasi.