Maefese

2 Hape Mulimu naa mi pilisize niha ne mu shwile mwa lifoso ni libi za mina, 2 ili mo ne mu zamaile ku likana ni mukwa wa lifasi le, ka ku lumelelana ni mubusi wa moya o zamaisa batu, ona moya o sebeza cwale kwa bana ba ba sa utwi. 3 Ki cwalo, kaufelaa luna ka nako ye ñwi ne lu pilile mwahalaa bona ka ku ya ka litakazo za nama ya luna, lu nze lu eza ze lakazwa ki nama ni mihupulo ya luna, mi ne lu li bana ba buhali ka sipepo sina ba bañwi kaufela. 4 Kono Mulimu u na ni muhau o mutuna, mi kabakala lilato la hae le lituna la naa lu latile ka lona, 5 naa lu pilisize hamoho ni Kreste, niha ne lu shwile mwa lifoso—mu pilisizwe ka sishemo sa Mulimu. 6 Hape a lu zusa hamoho kwa bafu ni ku lu inisa hamoho mwa mabaka a lihalimu ka ku swalisana ni Kreste Jesu, 7 kuli mwa linako ze taha a bonise bufumu bo bu si na bo bu likana ni bona bwa sishemo sa hae ka musa wa hae wa bonisa ku luna ba ba swalisana ni Kreste Jesu.

8 Ki ka sishemo sa Mulimu se, ha mu pilisizwe ka tumelo; mi haki kabakala mina ha ku ezahalile cwalo. Kono ki mpo ye zwa ku Mulimu. 9 Kutokwa, haki kabakala misebezi, kuli kutokwe mutu ya ka ba ni libaka la ku itumba. 10 Lu pupo ya Mulimu; ne lu bupilwe ka swalisano ni Kreste Jesu kuli lu eze misebezi ye minde, yeo Mulimu naa lelezi cimo kuli lu zamaye ku yona.

11 Hakulicwalo mu hupule kuli ka nako ye ñwi, mina batu ba macaba ka sipepo, ki mina ba ne ba bizwa “ba ba si ka ya kwa mupato” ki batu ba ba bizwa “ba mupato,” ili mupato o ezwa mwa nama ka mazoho a batu. 12 Ka nako yani ne mu si ka ziba Kreste, ne mu li kwahule ni sicaba sa Isilaele, ne mu siyo mwa tumelelano ya sepiso, ne mu si na sepo, mi ne mu si ka ziba Mulimu mwa lifasi. 13 Kono cwale ha mu se mu swalisani ni Kreste Jesu, mina ba ne ba li kwahule sapili se mu li fakaufi ka mali a Kreste. 14 Kakuli ki yena kozo ya luna, yena ya naa fetuzi likwata ze peli ku li eza si li siñwi ni ya naa wisize limota le ne li kauhanya likwata zeo. 15 Ka nama ya hae, naa felisize sitoyo, ona Mulao* wa litaelo, kuli a fetule likwata ze peli zeo ku ba mutu a li muñwi yo munca ka ku swalisana ni yena ni kuli a tahise kozo; 16 ni kuli ka kota ya linyando a kone ku kutiseza hamoho macaba a mabeli ku Mulimu, ili ku a eza mubili u li muñwi, kakuli naa felisize sitoyo ka mubili wa hae. 17 Mi a taha ni ku to shaela taba ye nde ya kozo ku mina ba ne ba li kwahule, ni kozo ku ba ne ba li fakaufi, 18 kakuli ka yena, luna macaba a mabeli, lu na ni tukuluho ya ku taha ku Ndate ka moya u li muñwi.

19 Hakulicwalo, kaniti ha mu sa li batu ba sili ni bazwahule, kono mu yahile hamoho ni ba ba kenile mi mu ba ndu ya Mulimu, 20 mi mu yahilwe fa mutomo wa baapositola ni bapolofita, mi Kreste Jesu yena ki licwe la mutomo la mwa kokozo. 21 Muyaho kaufela u kopani hamoho ku yena, u hula ku ba tempele ye kenile ya Jehova. 22 Ni mina, ka ku swalisana ni yena, mu sweli mwa yahiwa hamoho kuli mu be sibaka sa ka ina ku sona Mulimu ka moya.