Maheberu

Kwa Maheberu

1 Kwakale Mulimu naa bulezi ku bo kukwaa luna hañata ni ka ku itusisa linzila ze ñata ka bapolofita. 2 Cwale mwa mazazi a,* u bulezi ku luna ka Mwana, yo a ketile ku ba shwana wa linto kamukana, ni yo naa ezize ka yena ze bupilwe kaufela. 3 Ki yena ya bonahaza kanya ya Mulimu mi ki siswaniso luli sa seo Mulimu a li sona, mi u tamahanya lika kaufela ka linzwi la maata a hae; mi a mano kenisa libi za luna, a ina ku la bulyo la Bulena kwa lihalimu. 4 Hakulicwalo u fetuhile ya maata ku fita mangeloi, kuli mane u yolisizwe libizo le li kutekeha hahulu ku fita mabizo a ona.

5 Ka mutala, kwa mangeloi, ki lifi la kile a bulelela kuli: “Ki wena mwanaka; na, kacenu, ni bile ndataho”? Ni kuli: “Na luli ni ka ba ndatahe, mi yena ka sibili u ka ba mwanaka”? 6 Kono ha tahisa Mweli wa hae lwa bubeli mwa lifasi, u li: “Mi mangeloi a Mulimu kamukana a mu kubamele.”

7 Hape u bulela ka za mangeloi, u li: “U eza mangeloi a hae ku ba mioya, ni likombwa za hae lilimi la mulilo.” 8 Kono ka za Mwana, u li: “Mulimu ki yena lubona lwa hao kamita ni mita, mi mulamu wa bulena wa mubuso wa hao ki mulamu wa ku luka. 9 Ne u latile ku luka, mi wa toya bumaswe. Ki lona libaka Mulimu, yena Mulimu wa hao, ha naa ku tozize ka oli ya ku nyakalala ku fita balikani ba hao.” 10 Hape u li: “Kwa makalelo, wena Mulena, ne u yalile mutomo wa lifasi tota, mi mahalimu ki musebezi wa mazoho a hao. 11 Zeo li ka sinyeha, kono wena u ka ba teñi ku ya ku ile; mi sina siapalo, kaufelaa zona li ka fela, 12 mi u ka li puta sina kubo, sina siapalo; mi li ka cinciwa, kono wena u nze u li ya swana, mi lilimo za hao ha li na ku fela.”

13 Kono kwa mangeloi, ki lifi la kile a bulelela kuli: “Ina kwa lizoho la ka la bulyo, ku fitela ni beya lila za hao sina sipula fo a hata mahutu a hao”? 14 Kaufelaa ona, kikuli haki mioya ye eza sebelezo ye kenile, ye lumilwe ku sebeleza ba ba ka amuhela puluso?