1 Makolonika

14 Mulena Hiramu+ wa Tire aluma batu ku Davida, likota za sidare, bayahi babayaha ka macwe,* ni babeti kuli bamuyahele+ ndu.* 2 Mi Davida aziba kuli Jehova umutiisize kuli abe mulena wa Isilaele,+ kakuli bulena bwahae nebupahamisizwe hahulu kabakala sicaba Sahae sa Isilaele.+

3 Davida anyala basali babañwi+ mwa Jerusalema, mi Davida apepa bana babañwi babashimani ni babasizana.+ 4 A ki ona mabizo a bana bahae bane bapepezwi mwa Jerusalema:+ Shamua, Shobabi, Natani,+ Salumoni,+ 5 Ibari, Elishua, Elipeleti, 6 Noga, Nefegi, Jafia, 7 Elishama, Beeliada, ni Elifeleti.

8 Mafilisita habautwa kuli Davida utozizwe kuba mulena wa Isilaele kaufela,+ Mafilisita kaufela bataha kuto bata Davida.+ Davida hautwa cwalo, azwa kuyo balwanisa. 9 Mi Mafilisita bakala kulwanisa batu bane bapila mwa Musindi* wa Refaimi.+ 10 Davida abuza Mulimu, ali: “Kana naswanela kuyo lwanisa Mafilisita? Kana uka bafa mwa mazoho aka?” Jehova ali ku yena: “Zamaya, mi luli nika bafa mwa mazoho ahao.”+ 11 Davida kihaa kambamela kwa Baale-perazimi,+ mi ayo babulaela kwateñi. Mi Davida ali: “Ka lizoho laka, Mulimu wa niti upunyize lisuba mwahalaa lila zaka, sina lisuba lelipunyizwe ki mezi.” Ki lona libaka hane babeile sibaka seo libizo la Baale-perazimi.* 12 Mafilisita basiya milimu yabona hona ko, mi Davida hasaafile taelo, milimu yeo yacisiwa mwa mulilo.+

13 Hasamulaho, Mafilisita hape bato lwanisa batu ba mwa musindi* wo.+ 14 Davida hape abuza Mulimu, kono Mulimu wa niti ali ku yena: “Usike wayo bakatanyeza. Kono ubapotolohe kwamulaho, uyo bataseza fapilaa macacani a baaka.+ 15 Mi hauka utwa misindo ya babacaula fahalimwaa macacani a baaka, ushokomoke uyo lwana, kakuli Mulimu wa niti uka kuzamaya kwapili kuyo bulaya mpi ya Mafilisita.”+ 16 Davida aeza mwanaa mulaelezi Mulimu wa niti,+ mi bayo bulaya mpi ya Mafilisita kukalela mwa Gibioni kuyo fita kwa Gezeri.+ 17 Mi libubo la Davida laya mwa linaha kaufela, mi Jehova akenya sabo ya kumusaba mwa macaba kaufela.+