19 Mi Mikaya ali: “Kabakaleo, utwa linzwi labulela Jehova: Niboni Jehova ainzi mwa lubona lwahae+ ni mpi kaufela ya mahalimu inze iyemi kwatuko ahae, ku la bulyo lahae ni ku la nzohoto lahae.+ 20 Cwale Jehova ali: ‘Ki mañi yakapuma Akabe kuli akambamele kwa Ramoti-giliadi, ayo bulaelwa kwateñi?’ Yo naabulela cwana, mi yomuñwi naabulela cwana. 21 Cwale moya omuñwi*+ wasutelela mi wato yema fapilaa Jehova, wali: ‘Nika mupuma.’ Jehova aubuza, ali: ‘Ukaeza cwalo ka mukwa ufi?’ 22 Waalaba, wali: ‘Nikaya niyo beya moya wa buhata mwa milomo ya bapolofita bahae kaufela.’+ Cwale Mulimu ali: ‘Uka mupuma, mi mane ukayo kondisa. Zamaya uyo eza cwalo.’ 23 Mi cwale Jehova ubeile moya wa buhata mwa milomo ya bapolofita bahao ba kaufela,+ kono Jehova ukuatulezi ziyezi.”+