Baatuli

12 Cwale baana ba Efraimi babiziwa, mi basilela kwa Zafoni,* mi bali ku Jefita: “Ki kabakalañi hane usika lubiza kuli luye ni wena hane usila kuyo lwanisa Maamoni?+ Lukacisa ndu yahao inze uli mwateñi.” 2 Kono Jefita abaalaba kuli: “Na ni sicaba saka, nenili mwa mufilifili omutuna ni Maamoni. Neni mibizize kuli muto nitusa, kono nemusika to nilamulela mwa lizoho labona. 3 Hane niboni kuli hamuna kuto nilamulela, kiha seniikatulela feela kutoboha bupilo bwaka* mi nayo lwanisa Maamoni,+ mi Jehova anifa bona. Cwale semutilo nilwaniseza kacenu ki sifi?”

4 Jefita kihaa kopanya baana kaufela ba Giliadi,+ mi balwanisa Efraimi; baana ba Giliadi bafenya Maefraimi, bane baize: “Mina Magiliadi baba mwa Efraimi ni Manase, mu bayambaeli feela babazwa ku Efraimi.” 5 Magiliadi bahapa mipao ya Jordani+ ye fapilaa Maefraimi; baana ba Efraimi hane balika kutoba, nebabulela kuli: “Nikupa kusila”; mi baana ba Giliadi nebabuza mutu ni mutu kuli: “Kana u Muefraimi?” Haiba mutu aalaba kuli: “Batili!” 6 kipeto neba mubulelela kuli: “Bulela kuli Shiboleti.” Kono yena naali: “Siboleti,” kabakala kupalelwa kubulela hande linzwi leo. Mi cwale nebaswala mutu yo ni kumubulaela fa mipao ya Jordani. Ka mukwa ocwalo, kwabulaiwa Maefraimi babaeza 42,000 ka nako yeo.

7 Jefita aatulela Isilaele ka lilimo ze 6, mi hasamulaho Jefita wa Mugiliadi ashwa mi abulukiwa mwa muleneñi wahabo wa Giliadi.

8 Mwamulaho wahae, Ibizani wa kwa Betelehema aatulela Isilaele.+ 9 Naanani bana babashimani ba 30 ni bana babasizana ba 30. Anyalisa bana bahae babasizana kwa baana ba masika asili, mi atisa basali ba 30 kuli bato nyalwa kwa bana bahae babashimani. Aatulela Isilaele ka lilimo ze 7. 10 Mi Ibizani ashwa mi abulukiwa mwa Betelehema.

11 Mwamulaho wahae, Eloni wa lusika lwa Zabuloni aatulela Isilaele; naaatulezi Isilaele ka lilimo zelishumi. 12 Mi Eloni wa lusika lwa Zabuloni ashwa mi abulukiwa mwa Aijaloni mwa naha ya Zabuloni.

13 Mwamulaho wahae, Abidoni mwanaa Hilele wa kwa Piratoni aatulela Isilaele. 14 Naanani bana babashimani ba 40 ni baikulu babashimani ba 30 bane bapahama limbongolo ze 70. Aatulela Isilaele ka lilimo ze 8. 15 Cwale Abidoni mwanaa Hilele wa kwa Piratoni ashwa mi abulukiwa mwa Piratoni mwa naha ya Efraimi kwa lilundu la Maamaleke.+