53 Ki mañi yabile ni tumelo mwa litaba zebautwile ku luna?+
Mi lizoho la Jehova+ lipatululezwi mañi?+
2 Yena ukataha fapilaa hae sina katai,+ sina mubisi omela mwa naha yeomile.
Haana sibupeho sesikateleha, mi hakutekiwi;+
Mi halu mubona, ponahalo yahae hai lusutelezi ku yena.
3 Naakendiwa mi batu neba mutokolomoha,+
Mutu yanaapepezwi kuutwiswa butuku ni yanaatwaezi makulanu.
Nekuswana inge kuli nelupatezwi pata yahae.
Naakendiwa, mi nelu muunga kuli haki sesiñwi.+
4 Kaniti ki yena yanaalwezi makulanu aluna,+
Mi naalwezi matuku aluna.+
Kono nelu muunga sina mutu yautwisizwe butuku, yanatilwe ki Mulimu, ni yanyandiswa.
5 Kono naatabilwe+ kabakala bufosi bwaluna;+
Naanyandisizwe kabakala lifoso zaluna.+
Naalwezi koto kuli lube ni kozo,+
Mi kabakala mañiba ahae, lwafoliswa.+
6 Kaufelaa luna luyambaezi sina lingu,+
Yomuñwi ni yomuñwi uile ka nzila yahae,
Mi Jehova utahisize kuli bufosi bwaluna kaufela buwele fahalimwaa hae.+
7 Naahatelezwi+ mi naaituhelezi kuli anyandiswe,+
Kono naasika atumulusa mulomo wahae.
Naaisizwe sina ngu yeiswa kwa kubulaiwa,+
Sina ngu yamusali yekuzize fapilaa bakuti bayona,
Mi naasika atumulusa mulomo wahae.+
8 Aangiwa kabakala kusaatulelwa hande;
Mi ki mañi yakaisa pilu kwa litaba za lusika lwahae?
Kakuli naazwisizwe mwa naha ya babapila;+
Bakeñisa bufosi bwa sicaba saka, anatiwa.+
9 Mi abulukiwa hamoho ni babamaswe,+
Ni hamoho ni bafumi ka nako ya lifu lahae,+
Nihaike kuli naasika fosa
Mi mwa mulomo wahae nekusina bupumi.+
10 Kono neli tato ya Jehova kuli amunyandise, mi amutuhelela kuli akule.
Haiba ufa bupilo bwahae sina nubu ya mulatu,+
Yena ukabona bana bahae, ukaekeza kwa mazazi ahae,+
Mi ka yena, sesilatwa ki Jehova sikakonda.+
11 Kabakala butuku bwautwa, ukabona mi ukakolwa.
Ka zibo yahae, yalukile, yena mutangaaka,+
Ukatahisa kuli batu babañata babe babalukile,+
Mi ukalwala lifoso zabona.+
12 Kabakaleo, nika mufa kabelo mwahalaa babañata,
Mi ukaikabela tutu yehapilwe ni babamaata,
Kakuli naasuluzi bupilo bwahae mane kuisa lifu+
Mi abalelwa kwa lifosi;+
Alwala libi za batu babañata,+
Mi ayangwela lifosi.+