Liñolo Labulaalu la Joani

1 Sene siliteñi kwa makalelo, seluutwile, seluiponezi ka meeto aluna, selulemuhile ni kuswala ka mazoho aluna, sesiama linzwi la bupilo,+ 2 (ki cwalo, bupilo bo, nebubonahalizwe, mi luboni ni kupaka+ ni kumibihela za bupilo bobusa feli,+ bone buli ku Ndate mi nebubonahalizwe ku luna), 3 sona seluboni ni seluutwile ki sona hape selu mibihela,+ kuli ni mina muswalisane ni luna. Mi kuswalisana kwaluna kuinzi ku Ndate ni ku Mwanaa hae Jesu Kreste.+ 4 Mi lumiñolela litaba ze kuli tabo yaluna ikone kutalelela.

5 Ye ki yona taba yene luutwile ku yena ni yeluzibisa ku mina: Mulimu ki liseli,+ mi hakuna lififi nihanyinyani ku yena.* 6 Haiba lubulela kuli: “Luswalisana ni yena,” kono inze luzwelapili kuzamaya mwa lififi, fo lwapuma mi halupili ka niti.+ 7 Kono haiba luzamaya mwa liseli sina yena haali mwa liseli, luswalisana hamoho yomuñwi ku yomuñwi, mi mali a Jesu Mwanaa hae alukenisa kwa sibi kaufela.+

8 Haiba lubulela kuli: “Haluna sibi,” fo lwaipuma ili luna+ mi niti haiyo ku luna. 9 Haiba lubulela libi zaluna, Mulimu ki yasepahala mi ulukile, ukaswalela libi zaluna ni kulukenisa kwa kusaluka kaufela.+ 10 Haiba lubulela kuli: “Halusika eza sibi,” fo lumufetula kuba lihata, mi linzwi lahae haliyo ku luna.