Numere
14 Kopano kaufela kiha ipahamisa linzwi, mi sicaba sazwelapili kuhuwa ni kulila busihu bo kaufela.+ 2 Mi Maisilaele kaufela bakala kutongoka Mushe ni Aruni,+ mi kopano kaufela yababilaela, yali: “Neikaba hande kambe nelushwezi feela mwa naha ya Egepita, kamba kambe lushwezi feela mwa lihalaupa le! 3 Ki kabakalañi Jehova haalutisize mwa naha ye kuli luto bulaiwa ka mukwale?+ Basali baluna ni bana baluna bakahapiwa.+ Kana nekusike kwaba hande hane lukakutela kwa Egepita?”+ 4 Mane nebabulelisana, bali: “Haluiketeleñi mueteleli mi lukutele kwa Egepita!”+
5 Mushe ni Aruni kiha bawa ka lipata fafasi fapilaa kopano kaufela ya Maisilaele yeputehani. 6 Joshua+ mwanaa Nuni ni Kalebu+ mwanaa Jefune, bane bali mwahalaa sikwata sene sizo twela naha, bapazula liapalo zabona, 7 mi babulelela kopano kaufela ya Maisilaele, bali: “Naha yene luizo twela, ki naha yende hahulu.+ 8 Haiba Jehova alukatelwa, kaniti uka lutisa mwa naha ye, ni kulufa yona, ili naha mokububa mabisi ni linosi.+ 9 Kono musike mwakwenuhela Jehova, mi musike mwasaba batu ba mwa naha yeo,+ kakuli luka bamiza.* Habasana masabelo, mi Jehova uinzi ni luna.+ Musike mwabasaba.”
10 Kono kopano kaufela yabulela za kuli babapobaule ka macwe.+ Kono kanya ya Jehova yabonahala fahalimwaa tende ya makopanelo kwa sicaba kaufela sa Isilaele.+
11 Jehova kihaa li ku Mushe: “Batu ba, baka nishwaula ka nako yekuma kai,+ mi bakaanga nako yekuma kai basabonisi tumelo ku na niha baboni liponiso kaufela zeniezize mwahalaa bona?+ 12 Nika banata ka butuku bobuyambukela bobubulaya ni kubayundisa, mi nika kueza sicaba sesituna ni sesimaata kubafita.”+
13 Kono Mushe ali ku Jehova: “Maegepita, bona kone uzwisize sicaba se ka maata ahao, bakautwa taba ye,+ 14 mi baka ibulelela batu babayahile mwa naha ye. Bao ni bona bautwile kuli wena Jehova, u mwahalaa batu ba,+ mi ubonahezi ku bona pata ka pata.+ Ki wena Jehova, mi lilu lahao li fahalimwaa bona, mi musihali ubazamaya kwapili mwa lilu leliyemi nonga, mi busihu ubazamaya kwapili mwa mulilo oyemi nonga.+ 15 Haiba ubulaya batu ba kaufela ka nako iliñwi,* macaba autwile za libubo lahao akabulela kuli: 16 ‘Jehova upalezwi kuisa batu ba, mwa naha yanaakonkile kuli uka bafa yona, ki lona libaka hababulaezi mwa lihalaupa.’+ 17 Cwale nakupa shangwe, Jehova, haike maata ahao abe amatuna, sina mone usepiselize hane uize: 18 ‘Jehova ki yasaakufi kuhalifa ni yanani lilato lelituna lelisa feli,*+ yaswalela bufosi ni bumaswe, kono nikamuta haana kutuhelela lifosi asa baoti, yatisa koto kabakala bufosi bwa bashemi fahalimwaa bana, fahalimwaa baikulu ni baikulu ba baikulu.’+ 19 Nakukupa, uswalele bufosi bwa sicaba se ka lilato lahao lelituna lelisa feli, sina mouswalelezi sicaba se kuzwa nako yesizwa mwa Egepita kufitela cwale.”+
20 Jehova kihaa li: “Nabaswalela kulikana ni moukupezi.+ 21 Kono ka na luli yapila, lifasi kaufela likatala kanya ya Jehova.+ 22 Haili batu bababoni kanya yaka ni liponiso zaka+ zene niezize mwa Egepita ni mwa lihalaupa, kono bazwezipili kunilika+ halishumi cwana mi habasika utwa linzwi laka,+ 23 hakuna ku bona yakabona naha yene nisepisize ka luci ku bo ndataa bona. Ku baba nishwauzi kaufela, hakuna ku bona yaka ibona.+ 24 Kono bakeñisa kuli mutangaaka Kalebu+ naabonisize moya osaswani ni wabona mi naazwezipili kunilatelela ka pilu kaufela, kaniti nika mutisa mwa naha yanaaile ku yona, mi bana bahae baka iluwa.+ 25 Cwale bakeñisa kuli Maamaleke ni Makanana+ bayahile mwa musindi* wo, muswanela kukuta kamuso ni kuya kwa lihalaupa ka nzila ya Liwate Lelifubelu.”+
26 Jehova kihaa bulela ku Mushe ni Aruni, ali: 27 “Kopano yemaswe ye, ikaanga nako yekuma kai inze initongoka?+ Niutwile zeba nitongoka+ Maisilaele. 28 Mubabulelele, muli: ‘“Ka na luli yapila,” kubulela Jehova, “Nika mieza kulikana ni semubulezi inze niikutwela!+ 29 Litupu zamina likawela mwa lihalaupa le,+ ki cwalo, kaufelaa mina ba lilimo ze 20 kuisa kwahalimu, bane bañolisizwe, mina kaufela baba nitongokile.+ 30 Hakuna ku mina yakakena mwa naha yene nimisepisize ka luci* kuli mukayaha mwateñi,+ konji Kalebu mwanaa Jefune ni Joshua mwanaa Nuni.+
31 “‘“Mi nikatisa bana bamina, bona bene muize bakahapiwa,+ mi bakaziba naha yemuhanile.+ 32 Kono litupu zamina likawela mwa lihalaupa le. 33 Cwale bana bamina bakaba balisana mwa lihalaupa ka lilimo ze 40,+ mi bakaikalabela kabakala likezo zamina za kusasepahala,* kufitela situpu sa mafelelezo siwela mwa lihalaupa.+ 34 Mukaikalabela bufosi bwamina ka lilimo ze 40,+ kulikana ni mazazi ene muizo twela naha, kikuli mazazi a 40,+ lizazi lililiñwi liyemele silimo silisiñwi, lizazi lililiñwi liyemele silimo silisiñwi, mi mukaziba sekutalusa kunihanyeza.*
35 “‘“Na Jehova, nibulezi. Ki se, senika eza kwa kopano kaufela yemaswe ye, bona babakopani hamoho kunilwanisa: Bakayundela mwa lihalaupa le, mi bakashwela ona mo.+ 36 Baana banaalumile Mushe kuli bayo twela naha, bane batahisize kuli kopano kaufela imutongoke hane batisize piho yemaswe ka za naha yene baizo twela,+ 37 bona baana bane batisize piho yemaswe ka za naha, bakanatwa mi bakashwela fapilaa Jehova.+ 38 Kono Joshua mwanaa Nuni ni Kalebu mwanaa Jefune, bane bali mwahalaa sikwata sene sizo twela naha, bona bakazwelapili kupila.”’”+
39 Mushe habulelela Maisilaele kaufela manzwi a, sicaba sakala kulila hahulu. 40 Mi habusa bazuha isali kakusasana mi nebali bakambamele fa ngo ya lilundu, banze bali: “Cwale luitukiselize kukambamela kwa sibaka sanaabulezi Jehova, kakuli luezize sibi.”+ 41 Kono Mushe ali: “Kiñi hamutula taelo ya Jehova? Hamuna kukondisa. 42 Musike mwakambama, kakuli Jehova hayo ni mina; mukatulwa ki lila zamina.+ 43 Kakuli Maamaleke ni Makanana balibelezi kumilwanisa,+ mi mukabulaiwa ka mukwale. Bakeñisa kuli mutuhezi kulatelela Jehova, Jehova haana kuba ni mina.”+
44 Nihakulicwalo, bapihelela kukambamela fa ngo ya lilundu,+ kono aleka ya tumelelano ya Jehova neisika zwa mwa mafulo, ni yena Mushe naasika zwa mwa mafulo.+ 45 Cwale Maamaleke ni Makanana bane bayahile fa lilundu leo bashetumuka ni kubanata, babahasanya mi mane bayo fita kwa Horoma.+