2 Makolonika

27 Jotami+ naanani lilimo ze 25 hakala kubusa, mi abusa lilimo ze 16 inzaa li mwa Jerusalema. Libizo la mahe neli Jerusha mwanaa Zadoki.+ 2 Azwelapili kueza zelukile mwa meeto a Jehova, sina mwanaaezelize Oziasi ndatahe,+ kono yena naasika kena mwa libaka zehanisizwe za mwa tempele ya Jehova.+ Nihakulicwalo, batu nebasa zwelapili kueza lika zemaswe. 3 Ayaha munyako wa kwahalimu wa ndu ya Jehova,+ mi aekeza kuyaha kwa limota la Ofele.+ 4 Hape ayaha mileneñi+ mwa naha ya malundu ya mwa Juda,+ mi ayaha libaka zesilelelizwe+ ni litawala+ mwa mishitu. 5 Alwanisa mulena wa Maamoni+ mi hamulaho abatula, mi silimo seo Maamoni bamufa litalenta* za silivera ze 100, buloto bobueza litikanyo za kori* ze 10,000, ni mabele aeza litikanyo za kori ze 10,000. Hape Maamoni bamulifa lika zeo mwa silimo sabubeli ni sabulaalu.+ 6 Ka mukwa ocwalo, Jotami azwelapili kuba ni maata, kakuli naakondisize* linzila zahae fapilaa Jehova Mulimu wahae.

7 Haili litaba zeñwi za Jotami, za lindwa zahae kaufela ni linzila zahae, liñozwi mwa Buka ya Malena ba Isilaele ni ba Juda.+ 8 Naanani lilimo ze 25 hakala kubusa, mi abusa lilimo ze 16 inzaa li mwa Jerusalema.+ 9 Jotami kihaa shwa, abulukiwa sina bo kuku wahae, mi bamupumbeka mwa Muleneñi wa Davida.+ Mi Akazi mwanaa hae amuyola fa bulena.+