2 Malena

16 Ka silimo sabu 17 sa puso ya Peka mwanaa Remalia, Akazi+ mwanaa Mulena Jotami wa Juda akala kubusa. 2 Akazi naanani lilimo ze 20 hakala kubusa, mi abusa lilimo ze 16 inzaa li mwa Jerusalema. Naasika eza zelukile mwa meeto a Jehova Mulimu wahae, sina mwanaaezelize Davida kuku wahae.+ 3 Kono azamaya mwa nzila ya malena ba Isilaele,+ mane acisa mwanaa hae mwa mulilo,+ ka kulikanyisa mikwa yenyenyisa ya macaba+ anaalelekilwe ki Jehova fapilaa Maisilaele. 4 Hape azwelapili kuezezanga matabelo ni kutushaniseza musi wa matabelo fa libaka zelumbile,+ fa malundunyana, ni mwatasaa likota kaufela za matali amañata.+

5 Ka yona nako yeo, Mulena Rezini wa Siria ni Peka mwanaa Remalia mulena wa Isilaele, bataha kuto lwanisa Jerusalema.+ Baambeka Akazi, kono bapalelwa kuhapa muleneñi. 6 Ka yona nako yeo, Mulena Rezini wa Siria akutiseza Maedomo muleneñi wa Elati,+ mi hamulaho aleleka Majuda* mwa Elati. Mi Maedomo bakena mwa Elati, mi ki mona mobasa pila ni kacenu le. 7 Akazi kihaa luma linumwana ku Mulena Tigilati-pilezeri+ wa Asiria, ali: “Ni mutangaa hao mi ni mwanaa hao. Taha uto nilamulela ku mulena wa Siria ni mulena wa Isilaele, baba nilwanisa.” 8 Akazi kihaa nga silivera ni gauda zeneli kwa ndu ya Jehova ni mwa mabulukelo a bufumu a ndu ya mulena, mi alilumela mulena wa Asiria sina kweta.+ 9 Mulena wa Asiria aeza mwanaa mukupezi, mi aya kwa Damaseka, ayo hapa muleneñi ni kuisa batu ba mwateñi mwa buhapiwa kwa Kiri,+ mi abulaya Rezini.+

10 Cwale Mulena Akazi aya kwa Damaseka kuyo kopana ni Mulena Tigilati-pilezeri wa Asiria. Mulena Akazi habona aletare yeneli mwa Damaseka, alumela muprisita Uria mulalo wa aletare yeo, obonisa siswaniso sayona ni mone ipangezwi.+ 11 Muprisita Uria+ ayaha aletare+ ka kuya ka litaelo kaufela zanaa mulumezi Mulena Akazi yanaali kwa Damaseka. Mi muprisita Uria afeza kuyaha aletare yeo Mulena Akazi asika kuta kale kuzwa kwa Damaseka. 12 Mulena hanaakutile kuzwa kwa Damaseka mi abona aletare, asutelela ku yona mi afela fateñi linubu.+ 13 Mi azwelapili kutushaniseza linubu zahae za kucisa ni linubu zahae za bubeke fa aletare yeo; hape asela fateñi linubu zahae za zenwiwa ni kusasa fateñi mali a matabelo ahae a kuikabela. 14 Kihona atutisa aletare ya kopa+ yeneli fapilaa Jehova, aizwisa mwa sibaka sayona fapilaa ndu, mwahalaa aletare yahae ni ndu ya Jehova, mi ayo ibeya kwa mutulo wa aletare yahae. 15 Mulena Akazi alaela muprisita Uria,+ ali: “Utushaniseze nubu ya kucisa ya kakusasana fa aletare yetuna,+ ni nubu ya bubeke ya manzibwana, ni nubu ya mulena ya kucisa, ni nubu yahae ya bubeke,+ hamohocwalo ni linubu za kucisa za sicaba kaufela, ni linubu zabona za bubeke, ni linubu zabona za zenwiwa. Hape usase fateñi mali kaufela a linubu za kucisa ni mali kaufela a matabelo amañwi. Haili aletare ya kopa yona, nikabona mwaku iezeza.” 16 Mi muprisita Uria aeza lika kaufela zanaalaezi Mulena Akazi.+

17 Hape Mulena Akazi apumaka mabala a mwa maneku a likoloi+ ni kuzwisa mikeke yeneli fa likoloi zeo,+ mi azwisa Liwate fa lipoho za kopa+ fone litomilwe, alibeya fa bulilo bwa macwe.+ 18 Mi ashimbulula sibaka sesinani situwa sene siitusiswanga la Sabata ili sene siyahilwe mwa ndu ni kushimbulula munyako wa mulena wa kwande, alitutiseza kwahule ni ndu ya Jehova; naaezize cwalo kabakala mulena wa Asiria.

19 Haili litaba zeñwi za Akazi, zona lika zanaaezize, kana halisika ñolwa mwa buka ya litaba za linako za malena ba Juda?+ 20 Akazi ashwa, mi abulukiwa sina bo kuku wahae, apumbekwa kone bapumbekezwi bo kuku wahae mwa Muleneñi wa Davida; mi Ezekiasi*+ mwanaa hae amuyola fa bulena.