2 Samuele

8 Hamulaho wa nako, Davida atula Mafilisita+ mi abakokobeza,+ mi Davida aanga Metegi-ama kwa Mafilisita.

2 Atula Mamoabi+ mi abalobaza fafasi ni kubapima ka muhala. Apima mindandwe yemibeli ya batu bane bakabulaiwa, mi apima mundandwe ulimuñwi wa batu bane bakapiliswa.+ Mi Mamoabi baba batanga ba Davida mi bamuzwiseza ñamba.+

3 Davida atula Hadadezeri mwanaa Rehobo mulena wa Zoba+ ka nako yanaaya Hadadezeri kuyo tiisa bulena bwahae kwa Nuka ya Eufrati.+ 4 Davida ahapa bapahami ba lipizi ba 1,700 ni masole ba 20,000 babazamaya ka mahutu. Mi Davida apuma misifa ya kwa mahutu a lipizi kaufela zenehoha likoloi, asiya feela kwateñi lipizi ze 100.+

5 Masiria ba mwa Damaseka+ hane batilo tusa Mulena Hadadezeri wa Zoba, Davida abulaya Masiria ba 22,000.+ 6 Cwale Davida abeya litopa za masole mwa Siria wa Damaseka, mi Masiria baba batanga ba Davida, mi bamuzwiseza ñamba. Jehova atusa Davida kutula* mwa lindwa zahae kwanaaya kaufela.+ 7 Kutuha fo, Davida aanga litebe za gauda za laundi kwa batanga ba Hadadezeri mi alitisa mwa Jerusalema.+ 8 Mulena Davida aanga kopa yeñata mwa Beta ni Berotai, yona mileneñi ya Hadadezeri.

9 Cwale Mulena Toi wa Hamati+ autwa kuli Davida utuzi mpi kaufela ya Hadadezeri.+ 10 Toi kihaa luma mwanaa hae Jorami ku Mulena Davida kuli ayo mubuza mwazuhela ni kuyo itumela ku yena bakeñisa kulwanisa Hadadezeri ni kumutula (kakuli Hadadezeri naalwanisanga Toi hañata), mi amutiseza lika za silivera, za gauda, ni za kopa. 11 Mulena Davida afa Jehova lika zeo, hamoho ni silivera ni gauda zanaangile kwa macaba kaufela anaakomile:+ 12 kwa Masiria ni Mamoabi,+ kwa Maamoni, Mafilisita,+ Maamaleke,+ ni zanaahapile ku Hadadezeri+ mwanaa Rehobo mulena wa Zoba. 13 Davida hape atuma hahulu haazwa kwa kubulaya Maedomo ba 18,000 mwa Musindi wa Lizwai.+ 14 Davida abeya litopa za masole mwa Edomo. Abeya litopa za masole mwa Edomo kamukana, mi Maedomo kaufela baba batanga ba Davida.+ Jehova atusa Davida kutula* mwa lindwa zahae kwanaaya kaufela.+

15 Davida azwelapili kubusa Isilaele kaufela,+ mi aatulela batu bahae kaufela+ ka kuluka ni ka mulao.+ 16 Joabi+ mwanaa Zeruya naazamaisa mpi, mi Josafati+ mwanaa Akiludi neli muñoli wa litaba. 17 Zadoki+ mwanaa Akitubu ni Akimeleki mwanaa Abiatare neli baprisita, mi Seraya neli muñoli. 18 Benaya+ mwanaa Jehoyada naazamaisa Makereti ni Mapeleti.+ Mi bana ba Davida neli manduna.*