Liproverbia

19 Ki hande kuba mubotana ni kuzamaya ka busepahali+

Kufita kuba sitoto ni kubulela buhata.+

 2 Mutu yasina zibo haki yomunde,+

Mi yaeza lika ka kayeye* ueza sibi.

 3 Bukuba bwa mutu ki bona bobukopamisa nzila yahae,

Mi pilu yahae inyemela Jehova.

 4 Bufumu butahisa balikani babañata,

Kono mubotana ukayubekwa nihaiba ki mulikanaa hae.+

 5 Paki ya buhata haana kutuhelelwa asafiwi koto,+

Mi mutu yabulela buhata nako kaufela haana kubanduka.+

 6 Babañata babata kushemubiwa ki mutu yakutekeha,*

Mi mutu kaufela ki mulikanaa mutu yafanga limpo.

 7 Mubotana utoilwe ki banabahabo yena kaufela;+

Nihaiba balikani bahae bamutokolomoha!+

 9 Paki ya buhata haana kutuhelelwa asafiwi koto,

Mi mutu yabulela buhata nako kaufela ukashwa.+

10 Haki nto yeswanela kuli sikuba sipile mwa mbombolelwa;

Nihaiba mutanga haswaneli kubusa manduna!+

11 Kutwisiso ya mutu ikuyula buhali bwahae,+

Mi nto yende ku yena ki kutuhelela mutu yamufoselize.*+

12 Buhali bwa mulena buswana sina kubuluma kwa tau,*+

Kono hashemuba mutu kuswana inge puka yewela fa bucwañi.

13 Mwana wa sitoto utahiseza ndatahe ziyezi,+

Mi musali wa likomano* uswana sina situwa sesisa tuheli kunela.+

14 Ndu ni bufumu ki saanda sesizwa ku bo ndate-bana,

Kono musali yabutali uzwa ku Jehova.+

15 Buzwa bulobaza mutu buloko bobutuna,

Mi mutu yalondile ukalapa.+

16 Mutu yamamela mulao ubabalela bupilo* bwahae;+

Yasaisi pilu kwa linzila zahae ukashwa.+

17 Yashemuba mubotana ukolotisa Jehova,+

Mi Yena uka mukutiseza* kabakala saezize.+

18 Kalimela mwanaa hao hakusanani sepo,+

Mi usike waba ni mulatu wa lifu lahae.+

19 Mutu wa kacimacima ukafiwa koto;

Haiba ulika kumulamulela, ukatokwa kuezanga cwalo hape ni hape.+

20 Utwa kelezo mi uamuhele kalimelo,+

Kuli kwapili ube yabutali.+

21 Mwa pilu ya mutu kunani milelo yemiñata,

Kono tato* ya Jehova ki yona yekakonda.+

22 Nto yelakazeha ku mutu ki lilato lahae lelisa feli;+

Mi sesinde ki kuba mubotana kufita kuba lihata.

23 Kusaba Jehova kulibisa kwa bupilo;+

Mutu yanani sabo yeo ukaipumulela hande, asatahelwi ki kozi.+

24 Yabuzwa ukenya lizoho lahae mwa mukeke wa lico,

Kono wapalelwa nihaiba kulikutiseza kwa mulomo wahae.+

25 Unate musheununi,+ kuli yasina zibo atalife,+

Mi unyaze yanani kutwisiso, kuli zibo yahae iekezehe.+

26 Yanyandisa ndatahe ni kuleleka mahe

Ki mwana yatahisa maswabi ni kashwau.+

27 Mwanaka, haiba utuhela kuutwa kalimelo,

Ukakeluha kwa lipulelo za zibo.

28 Paki yasina tuso usheununa katulo yelukile,+

Mi mulomo wa babamaswe umizaka bumaswe inge yamiza sico.+

29 Katulo ibulukezwi basheununi,+

Mi lipafa libulukezwi mikokoto ya litoto.+