Deuteronoma

16 “Ubuluke kweli ya Abibi,* mi uezeze Jehova Mulimu wahao Paseka,+ kakuli mwa kweli ya Abibi, Jehova Mulimu wahao naakuzwisize mwa Egepita busihu.+ 2 Mi uswanela kuezeza Jehova Mulimu wahao sitabelo sa Paseka,+ sesizwa mwa mutapi wahao wa lingu ni wa likomu,+ usiezeze mwa sibaka sakaketa Jehova kuli abeye ku sona libizo lahae.+ 3 Usike waca sitabelo seo hamoho ni nto ifi kamba ifi yebeilwe mumela;+ ka mazazi a 7, uswanela kuca sinkwa sesisika ya mumela, sona sinkwa sa manyando, kakuli neuzwile mwa naha ya Egepita ka putako.+ Ueze cwalo, ilikuli mwa bupilo bwahao kaufela uhupulange lizazi lene uzwile mwa naha ya Egepita.+ 4 Ka mazazi a 7, usike wafumanwa ni fulaulo yelubilwe yeile mumela, mwa naha yahenu kaufela,+ mi kwa nama ya folofolo yeuka eza sitabelo manzibwana fa lizazi lapili, kusike kwasiyala sesiñwi busihu kaufela kuisa kakusasana.+ 5 Kwa mileneñi yakufa Jehova Mulimu wahao, hauna kulumelezwa kuiketela feela muleneñi ufi kamba ufi kuli uezeze ku ona sitabelo sa Paseka. 6 Kono siswanela kuezezwa mwa sibaka sakaketa Jehova Mulimu wahao kuli abeye libizo lahae ku sona. Ueze sitabelo sa Paseka manzibwana, lizazi lisalikela feela,+ ka nako yene uzwile ka yona mwa Egepita. 7 Uswanela kubesa nama yeo ni kuicela+ mwa sibaka sakaketa Jehova Mulimu wahao,+ mi habusa wakona kukutela kwa litende zahao. 8 Ka mazazi a 6, uswanela kuca sinkwa sesisika ya mumela, mi ka lizazi labu 7 kukaezwa mukopano oipitezi wa Jehova Mulimu wahao. Usike waeza musebezi ufi kamba ufi ka lizazi leo.+

9 “Uswanela kubala lisunda ze 7. Ukale kubala lisunda zeo ze 7 kuzwa foukalela kukenyeza cekesi yahao kukutula bubeke.+ 10 Kihona ukaezeza Jehova Mulimu wahao Mukiti wa Lisunda,+ ka linubu za kuitatela zezwa mwa lizoho lahao, zeufa kulikana ni mwakufuyaulezi Jehova Mulimu wahao.+ 11 Mi ukawabelwa fapilaa Jehova Mulimu wahao mwa sibaka sakaketa Jehova Mulimu wahao kuli abeye libizo lahae ku sona; ukawabelwa hamoho ni mwanaa hao wamushimani ni wamusizana, mutangaa hao wamuuna ni wamusali, Mulivi yapila mwa mileneñi* yahenu, muzwahule, mwana yasina ndatahe,* ni mbelwa, babapila mwa sicaba sahenu.+ 12 Uhupule kuli neukile waba mutanga mwa Egepita,+ mi umamele litaelo ze, ni kulilatelela.

13 “Uswanela kueza Mukiti wa Minganda*+ ka mazazi a 7, haukubukanya lico zezwa mwa mapulelo ahao ni mwa silubelo sahao sa oli ni waine. 14 Uwabelwe ka nako ya mukiti wahao,+ wena, ni mwanaa hao wamushimani ni wamusizana, mutangaa hao wamuuna ni wamusali, Mulivi, muzwahule, mwana yasina ndatahe, ni mbelwa, babapila mwa mileneñi yahenu. 15 Ukaezeza Jehova Mulimu wahao mukiti wo ka mazazi a + mwa sibaka sakaketa Jehova, kakuli Jehova Mulimu wahao ukafuyaula kutulo yahao kaufela ni lika kaufela zeueza,+ mi ukawabelwa hahulu.+

16 “Halaalu ka silimo, baana kaufela mwa sicaba sahenu baswanela kuitahisa fapilaa Jehova Mulimu wahao mwa sibaka sakaketa: fa Mukiti wa Linkwa zesika ya Mumela,+ fa Mukiti wa Lisunda,+ ni fa Mukiti wa Minganda,*+ mi hakuna mutu ku bona yaswanela kutaha feela mazoho-zoho fapilaa Jehova. 17 Yomuñwi ni yomuñwi uswanela kutisa mpo ka kuya ka mwamufuyaulezi Jehova Mulimu wahao.+

18 “Mwa lusika ni lusika uswanela kuketa mwateñi baatuli+ ni manduna mwa mileneñi kaufela* yakufa Jehova Mulimu wahao, mi batu bao baswanela kuatula sicaba ka katulo yelukile. 19 Usike wakelusa katulo yelukile,+ kuatula ka sobozi,+ kamba kuamuhela kweta, kakuli kweta ikwala meeto a bababutali+ ni kukopamisa manzwi a babalukile. 20 Uye ka katulo yelukile, ulatelele katulo yelukile,+ kuli uzwelepili kupila ni kuluwa naha yakufa Jehova Mulimu wahao.

21 “Usike wacala kota ya kulapela*+ ya mufuta ufi kamba ufi kwatuko ni aletare ya Jehova Mulimu wahao yeuka ikezeza.

22 “Mi usike waitomela musumo wa licwe wa kulapela,+ yona nto yatoile Jehova Mulimu wahao.