Lisamu

28 Nizwelapili kuhuweleza ku wena, wena Jehova Licwe laka;+

Usike wanitibela zebe yahao.

Haiba unikuzeza,

Nikaba sina batu babashetumukela mwa mukoti.*+

 2 Uutwe likupo zaka za kuli unituse

Haninanulela mazoho aka mwahalimu ninze nitalimezi kwa muzuzu wa mwahali wa sibaka sahao sesikenile.+

 3 Usike wanishimbelela hamoho ni babamaswe, babaeza zemaswe,+

Bababulelelana manzwi a kozo ni banabahabo bona kono mwa lipilu zabona kuinzi lunya.+

 4 Ubakutiseze ka kuya ka likezo zabona,+

Ka kuya ka likezo zabona za lunya.

Ubakutiseze kabakala misebezi ya mazoho abona,

Ka kuya ka zebaezize.+

 5 Kakuli habaisi pilu kwa misebezi ya Jehova,+

Kamba kwa musebezi wa mazoho ahae.+

 6 Jehova alumbekwe,

Kakuli uutwile likupo zaka za kuli anituse.

 7 Jehova ki maata aka+ ni tebe yaka;+

Pilu yaka isepile yena.+

Niamuhezi tuso yahae, mi pilu yaka itabile,

Kabakaleo nika mulumbeka ka pina yaka.

 8 Jehova ki maata a batu bahae;

Ki musilelezi, upilisa mutoziwa wahae ka puluso yetuna.+