2 Makolonika

16 Ka silimo sabu 36 sa puso ya Asa, Mulena Baasha+ wa Isilaele ato lwanisa Juda mi akala kuyaha* Rama+ kuli atibele mutu ufi kamba ufi kuzwa kamba kukena ku* Mulena Asa wa Juda.+ 2 Asa kihaa nga silivera ni gauda mwa mabulukelo a bufumu a ndu ya Jehova+ ni mwa ndu ya mulena mi alilumela Mulena Beni-hadadi wa Siria,+ yanaapila mwa Damaseka, mi ali: 3 “Kunani tumelelano mwahalaa ka ni wena, ni mwahalaa ndate ni ndataho. Nikulumela silivera ni gauda. Taha uto felisa tumelelano yene uezize ni Mulena Baasha wa Isilaele, kuli azwe ku na.”

4 Beni-hadadi autwa Mulena Asa mi aluma bazamaisi ba limpi zahae kuyo lwanisa mileneñi ya Isilaele, mi bahapa Ijoni,+ Dani,+ Abele-maimi, ni mabulukelo kaufela a mwa mileneñi ya Nafetali.+ 5 Baasha hautwa taba yeo, honafo atuhela kuyaha* Rama mi asiya musebezi wanaaeza wo. 6 Mulena Asa kihaa kopanya Majuda kaufela, mi bayo nga macwe ni likota za kwa Rama+ zanaaitusisa Baasha kwa kuyaha,+ mi aitusisa zona kuyaha* Geba+ ni Mizipa.+

7 Ka nako yeo, muboni Hanani+ ataha ku Mulena Asa wa Juda mi atoli ku yena: “Bakeñisa kuli neusepile* mulena wa Siria mi neusika sepa* Jehova Mulimu wahao, mpi ya mulena wa Siria ikubolomokile.+ 8 Kana Maetopia ni Malibia nebasina mpi yetuna hahulu yenenani likoloi zeñata ni bapahami ba lipizi babañata? Kono kabakala kuli neusepile Jehova, abafa mwa lizoho lahao.+ 9 Kakuli meeto a Jehova atalimisisa mwa lifasi kaufela,+ kuli abonise maata ahae kutusa babasepahala ku yena ka lipilu zabona kaufela.*+ Mwa taba ye, wena uezize ka bukuba; kuzwa cwale ukana utahelwa ki lindwa.”+

10 Kono Asa ahalifiswa ki muboni mi amukenya mwa tolongo* kakuli naamunyemezi kabakala taba yanaabulezi. Mi ka yona nako yeo, Asa akala kunyandisa babañwi mwahalaa sicaba. 11 Mi litaba za Asa, za makalelo ni za mafelelezo, liñozwi mwa Buka ya Malena ba Juda ni ba Isilaele.+

12 Ka silimo sabu 39 sa puso yahae, Asa akenelwa ki butuku bwa mahutu kufitela akula hahulu; mi niha naakula cwalo, naasika sikuluhela ku Jehova, kono asikuluhela kwa liñaka. 13 Mi Asa shwa, abulukiwa sina bo kuku wahae;+ ashwa ka silimo sabu 41 sa puso yahae. 14 Cwale bamubuluka mwa libita lelikutekeha lanaaicepezi mwa Muleneñi wa Davida,+ mi bamulobaza fa mumbeta one utezi oli ya balusamu ni mafula anunka hande anaaezizwe ka kukopanya lika za mifuta-futa.+ Kutuha fo, bamuciseza mulilo wa kepelo omutuna hahulu.*