Liñolo Labubeli Makorinte

5 Mane mwahalaa mina kubihiwa kuli kunani muzamao wa buhule,*+ mi ki buhule* bobusa fumanehi nihaiba mwahalaa ba macaba—bwa kuli mutu yomuñwi upila ni musalaa ndatahe.+ 2 Mi kana mwaitumba ka taba yeo? Kana hamuswaneli kulila,+ kuli mutu yaezize kezo ye uswanela kuzwiswa mwahalaa mina?+ 3 Niha nisiyo mwahalaa mina ka mubili, niteñi ku mina ka moya, mi niatuzi kale mutu yo yaezize cwalo, inge kuli mane niteñi mwahalaa mina. 4 Hamuka kopana hamoho ka libizo la Mulenaa luna Jesu, mi muziba kuli ni mwahalaa mina ka moya hamoho ni maata a Mulenaa luna Jesu, 5 muswanela kufa mutu yo ku Satani+ kuli nama isinyiwe, ilikuli moya ukone kupiliswa mwa lizazi la Mulena.+

6 Kuitumba kwamina haki kokunde. Kana hamuzibi kuli mumela omunyinyani utundulukisa* bupi kaufela bobulubilwe?+ 7 Muzwise mumela wakale, kuli mube liñende lelinca, sina hamusina mumela. Kakuli Kreste yena ngunyana ya Paseka+ yaluna ufilwe sina sitabelo.+ 8 Ka mukwa ocwalo, luezange mukiti,+ isiñi ka mumela wakale, kamba ka mumela wa bumaswe ni lunya, kono ka sinkwa sesisina mumela sa busepahali ni niti.

9 Mwa liñolo laka neni miñolezi kuli mutuhele kuswalisana* ni batu babapila ka muzamao wa buhule,* 10 isiñi kutalusa kuli mukauhane luli ni batu babapila ka muzamao wa buhule* ba lifasi le+ kamba batu babanani mukwañuli kamba babukuli kamba babalapela milimu ya maswaniso. Kambe kucwalo, nemuka tokwa kuzwa mwa lifasi.+ 11 Kono cwale nimiñolela kuli mutuhele kuswalisana*+ ni mutu yabizwa muzwale yapila ka muzamao wa buhule* kamba yanani mukwañuli+ kamba yalapela milimu ya maswaniso kamba wa matapa* kamba cakolwa+ kamba mubukuli,+ mane nihaiba kuca ni mutu yacwalo musike mwaca ni yena. 12 Kakuli ninani taba mañi ni kuatula baba kwande? Kana hamuatuli baba mwahali, 13 haubona Mulimu yena uatula baba kwande?+ “Muzwise mutu yamaswe mwahalaa mina.”+