96 Muopelele Jehova pina yenca.+
Muopelele Jehova, mina lifasi kaufela!+
2 Muopelele Jehova; mulumbeke libizo lahae.
Zazi ni zazi muzibahaze taba yende ya kupilisa kwahae.+
3 Muzibahaze kanya yahae mwahalaa macaba,
Misebezi yahae yekomokisa mwahalaa macaba kamukana.+
4 Jehova ki yomutuna mi uswanelwa hahulu kulumbekwa.
Usabisa hahulu kufita milimu yemiñwi kaufela.
5 Milimu kaufela ya macaba ki milimu yesina tuso,+
Kono Jehova ki yena yaezize mahalimu.+
6 Likute ni kanya li fapilaa hae;+
Maata ni bunde li mwa sibaka sahae sesikenile.+
7 Mufe Jehova sesi muswanela, mina mabasi a macaba,
Mufe Jehova sesi muswanela kabakala kanya ni maata ahae.+
8 Mufe Jehova kanya yeswanela libizo lahae;+
Mutise mpo mi mukene mwa malapa ahae.
9 Mukubamele Jehova inze mukabile zekenile;
Mungangame fapilaa hae, mina lifasi kaufela!
10 Muzibahaze mwahalaa macaba, muli: “Jehova seli Mulena!+
Lifasi litiisizwe, halikoni kusutiswa.
Ukaatula macaba ka kuluka.”+
11 Mahalimu awabelwe, mi lifasi litabe;
Liwate lilume ni zetezi ku lona kaufela;+
12 Masimu ni zemwateñi kaufela liwabelwe.+
Likota kaufela za mwa mushitu ni zona lihuweleze ka tabo+
13 Fapilaa Jehova, kakuli wataha,
Wataha kuto atula lifasi.
Ukaatula lifasi ka kuluka+
Ni macaba ka busepahali bwahae.+